Matvei 28 - Uz' Zavet

Iisusan eläbzumine

¹ Jäl՚ghe sobatad, nedalin ezmäižel päiväl, homendezhämäräižes tuliba Magdalan Maria i se toine Maria kacmaha kaumad.

² Ühtnägoi ma zavodi lujas säregata, sikš ku Ižandan angel laskihe taivhaspäi. Hän tuli kaumale, heiti kiven kauman verajaspäi i ištuihe sen päle.

³ Hän hošti kuti samalduz, i hänen sädod oliba vauktad kuti lumi.

⁴ Varjoičijad pöl՚gästuiba händast muga, miše säreganziba i lanksiba maha kuti kollijad.

⁵ Angel sanui naižile: «Algat tö varaikoi! Minä tedan, miše tö ecit Iisusad, kudamb oli nagloitud ristha.

⁶ Händast ei ole tägä, hän om eläbzunu, muga kut iče sanui. Tulgat kacmaha, naku om sija, kus Ižand venui.

⁷ Mängat teramba sanumaha hänen openikoile: ‘Hän om eläbzunu kollijoišpäi. Hän mäneb edel teid Galilejaha, sigä tö nägištat händast.’ Necen minä tahtoin-ki teile sanuda.»

⁸ Naižed läksiba rigol kaumalpäi. Hö oliba pöl՚gästusiš i ihastusiš ühtes, i hö tacihe vemha vestid Iisusan openikoile.

⁹ Konz hö astuiba sanumaha hänen openikoile, ühtnägoi Iisus tuli heile vastha i sanui: «Tervhen elät!» Hö mäniba hänennoks, sebaziba hänen jaugad i kumarzihe hänele.

¹⁰ Siloi Iisus sanui heile: «Algat varaikoi! Mängat sanumaha minun vellile, miše heile tarbiž mända Galilejaha. Sigä hö nägištaba mindai.»

¹¹ Konz nene naižed oliba matkas, erased varjoičijad mäniba lidnaha i sanuiba ülembaižile papile kaiken, midä oli tehnus.

¹² Siloi papid kogozihe rahvahan vanhembidenke paginale. Hö andoiba saldatoile äi rahad

¹³ i sanuiba: «Sanugat, miše hänen openikad tuliba sinna öl, konz tö magazit, i vargastiba händast.

¹⁴ I ku necen polhe kulištab manižand, ka mö tüništoitam händast i tegem muga, miše teil ei oliži hol՚t.»

¹⁵ Saldatad otiba rahad i tegiba muga, kut oli käsktud. Nene paginad leveniba evrejalaižiden keskes. I nügüd՚-ki völ pagištas ninga.

Iisusan käsk openikoile

¹⁶ Kaik üks՚toštkümne openikad läksiba Galilejaha sille mägele, kuna Iisus käski mända.

¹⁷ Konz hö nägištiba händast, hö kumarzihe hänele, no erased ei usknugoi.

¹⁸ Iisus tuli heidennoks i pagižeškanzi heile muga: «Minei om anttud kaik vald taivhas i man päl.

¹⁹ Mängat-žo i tehkat kaik rahvahad minun openikoikš: valatagat heid Tatan i Poigan i Pühän Hengen nimes

²⁰ i opekat heid eläda kaikes muga, kut minä olen käsknu teile eläda. I tekat, minä kaiken olen teidenke mirun lophusai.» Amin՚.