Mark 8 - Uz' Zavet

Iisus sötab nel՚l՚tuhad mest

¹ Nenil päivil kerazihe ani äi rahvast, i heil ei olend nimidä söda. Iisus kucui openikoid ičezennoks i sanui:

² «Minei om žal՚ necidä rahvast. Hö oma minunke jo koume päiväd, a heil ei ole nimidä söda.

³ Ku oigendan heid kodihe näl՚gäl, ka hö väzuba tel. Erased heišpäi oma tulnuded edahanpäi-ki.»

⁴ Openikad sanuiba hänele: «Kuspäi tägä rahvahatomas mas ken-ni voiži sada leibäd, miše heid kaikid sötta?»

⁵ «Kuverz՚ teil om leibäd?» – Iisus küzui. Hö sanuiba: «Seičeme.»

⁶ Iisus käski rahvahale išttas maha. Sid՚ hän oti nene seičeme leibäd, kiti Jumalad, lohkaiži leibäd i andoi palad openikoile, miše hö jagaižiba. Openikad jagoiba leibäd rahvahan keskes.

⁷ Heil oli mugažo kuvert-se kalašt. Iisus kiti Jumalad kalas i käski jagada ned-ki.

⁸ Rahvaz söi külläks, i jänuzid supaloid keratihe seičeme puzud.

⁹ Söjid oli läz nellädtuhad. Iisus pästi heid

¹⁰ i kerdalaz ištuihe openikoidenke veneheze i läksi Dalmanufan tahoze.

Kuspäi Iisusan vägi om?

¹¹ Erased farisejad tuliba i zavodiba ridelta Iisusanke. Hö tahtoiba kodvda händast i pakičiba hänel tundmuztegod, kudamb tuliži taivhaspäi.

¹² Iisus hengahti süväs i sanui: «Mikš nece rahvaz pakičeb tundmuztegod? Todeks sanun teile: necile rahvahale ei antkoi mugošt tundmuztegod.»

¹³ I hän jäti heid, ištuihe möst veneheze i läksi toižele randale.

Iisus lajib openikoid, miše hö oma el՚getomad

¹⁴ Openikad oliba unohtanuded otta leibäd kerdale. Heil oli venehes vaiše üks՚ leibpärp.

¹⁵ Iisus käski heile: «Olgat herkhil! Varaikat farisejiden muigotest i Irodan muigotest.»

¹⁶ No hö pagižiba kesknezoi: «Meil ei ole leibäd.»

¹⁷ Iisus homaiči necen i sanui: «Mikš tö pagižet siš, miše teil ei ole leibäd? Et-ik tö völ-ki el՚gekoi, et tärtkoi? Oma-k teiden südäimed völ-ki kovidunuded?

¹⁸ Oma ved՚ teil sil՚mäd, et-ik tö nähkoi? Oma ved՚ teil korvad, et-ik tö kulgoi? I et-ik tö muštkoi:

¹⁹ konz jagoin ned viž leibäd videletuhale mehele, äjak täut puzud supaloid tö kerazit?» «Kaks՚toštkümne», hö sanuiba.

²⁰ «A konz jagoin ned seičeme leibäd nelläletuhale? Äjak täut puzud supaloid tö siloi kerazit?» Hö sanuiba: «Seičeme.»

²¹ Iisus sanui heile: «Kutak tö et el՚gekoi?»

Iisus tegeb tervheks sogedan Vifsaidas

²² Hö tuliba Vifsaidaha. Sigä Iisusannoks todihe soged mez՚ i pakitihe kosketada händast.

²³ Iisus oti sogedan kädes i vei händast külän taga. Sid՚ hän sül՚gi mehen sil՚mihe, pani käded hänen päle i küzui: «Näged-ik midä?»

²⁴ Mez՚ kacui i sanui: «Minä nägen mehid – hö oma kuti pud, vaiše käveleba.»

²⁵ Iisus pani udes käded mehen sil՚mile, i käski hänele kacta. Hän tegihe ani tervheks i nägi kaiken hüvin.

²⁶ Iisus oigenzi händast kodihe i sanui: «Ala mäne neche külähä, ala sanu nikenele küläs.»

MATK JERUSALIMHA 8:27–10:52 Petr sanub Iisusan Messiaks

²⁷ Iisus i hänen openikad läksiba külihe, kudambad oliba Filippan Kesarian ümbrištos. Matkas hän küzui openikoil: «Ken minä olen mehiden sil՚miš?»

²⁸ Hö sanuiba: «Ühted sanuba, miše sinä oled Joan Valatai, toižed – Ilja, koumanded sanuba, miše mitte-se Jumalan sanankandai.»

²⁹ «Nu a kut tö?» – küzui Iisus. «Ken minä olen teiden sil՚miš?» Petr sanui hänele: «Sinä oled Messia.»

³⁰ Iisus käski heile, miše hö ei sanuiži hänen polhe nikenele.

Iisus sanub ičeze surman polhe

³¹ Sid՚ Iisus zavodi starinoita openikoile, miše Mehen Poigale tarbiž äi mokitas. Rahvahan vanhembad, ülembaižed papid, käskištonopendajad käraudasoiš hänehe sel՚gin, i händast surmitas, no koumandel päiväl hän eläbzub.

³² Hän pagiži necen polhe ani peitmata. Siloi Petr vei händast eriži i zavodi laida händast.

³³ No Iisus kärauzihe, kacuhti openikoihe i sanui kovas Petrale: «Mäne sen tehe, soton! Sinä ed meleta kut Jumal, a meletad kut mez՚!»

Iisus tomotab elämaha hänen mödhe

³⁴ Iisus kucui rahvast i ičeze openikoid i sanui heile: «Ku ken-ni tahtoib eläda minun mödhe, ka unohtagha ičtaze, otkaha ičeze rist i astkaha minunke.

³⁵ Ved՚ ken tahtoib kaita ičeze henged, ka kadotab sen, no ken kadotab ičeze hengen minun tagut i hüvän vestin tagut, ka kaičeb sidä.

³⁶ No midä ližad om mehele, ku hän sab ičeleze kaiken mirun, no kadotab ičeze hengen?

³⁷ Miččel maksul mez՚ voib ostta ičeze hengen tagaze?

³⁸ Ken huiktelese mindai i minun sanoid necen jumalatoman i grähkhižen sugupol՚ven keskes, sidä Mehen Poig-ki huikteleškandese, konz hän tuleb Tataze hoštoteses pühiden angeloidenke.»