Mark 7 - Uz' Zavet

Jumalan käsköd i tatoiden käsköd

¹ Erased käskištonopendajad tuliba Jerusalimaspäi, i ühtes farisejidenke kogozihe Iisusannoks.

² Konz hö homaičiba, miše erased hänen openikad söškanziba paganoil, pezmatomil käzil, ka hö lajiškanziba heid.

³ Ved՚ farisejad, kut i kaik evrejalaižed, eläba tatoiden käsköiden mödhe: hö ei sögoi nikonz pezmata käzid heiden uskondan käsköiden mödhe.

⁴ I konz hö tuleba bazaralpäi, ka hö ei sögoi čorskmata vet päle. Heil om äi toižid-ki käsköid, kudambiš hö pidäsoiš: jondastijoiden, savipadoiden, katliden i laučoiden pezemine heiden veron mödhe.

⁵ Sid՚ farisejad i käskištonopendajad küzuiba Iisusal: «Mikš sinun openikad ei elägoi tatoiden käsköiden mödhe, i söba pezmatomil käzil?»

⁶ Hän sanui heile: «Tö, koiverdelijad! Oikti endusti teiden polhe Isaija. Ved՚ Jumal om sanunu Pühiš Kirjutusiš: – Nece rahvaz pidäb mindai korktas arvos vaiše hulil, no heiden südäin om edahan minuspäi.

⁷ Tühjan hö kumardasoiš minei, ku opendaba ičeze opendushe, rahvahal tehtud käsköihe.

⁸ Tö kärauzitoiš Jumalan käsköspäi i elät rahvahal tehtud käsköiden mödhe: tö pezet savipadad i jomastijad, i teget äi tošt-ki mugošt.»

⁹ I hän völ sanui: «Mahtat tö tehta tühjaks Jumalan käskön, miše voižit eläda ičetoi käsköiden mödhe!

¹⁰ Moisei om sanunu: ‘Ole hüvä ičeiž tatale i mamale’ i ‘Ken sanub pahad tatale i mamale, ka todeks händast tarbiž surmita’.

¹¹ No tö sanut: Ken sanub ičeze tatale vai mamale: ‘Midä tö tahtoit minuspäi sada, ka se om «korvan», sen olen toivotanu Jumalale lahjaks’,

¹² i tö et antkoi enamba hänele abutada ičeze tatale i mamale.

¹³ Muga tö eläden i opeten ezitatoiden käsköiden mödhe teget tühjaks Jumalan sanan. I äi tošt-ki tö teget, mugošt-žo.»

Mi tegeb mehen paganaks?

¹⁴ Iisus kucui kaiken rahvahan ičezennoks i sanui: «Kulgat kaik mindai i el՚gekat.

¹⁵ Se, mi tuleb meheze irdalpäi, ei voi tehta händast paganaks, a se tegeb mehen paganaks, mi tuleb hänen südäimespäi irdale.

¹⁶ Kenel oma korvad kulda, ka se kulgaha!»

¹⁷ Konz Iisus läksi rahvahan keskespäi i tuli kodihe, openikad pakičiba händast sel՚genzoitta nene ozoitezsanad.

¹⁸ Hän sanui heile: «Olet-ik tö-ki mugoižed el՚getomad? Et-ik voigoi el՚geta, miše se, mi tuleb meheze irdalpäi, ei voi tehta händast paganaks?

¹⁹ Se ei mäne hänen südäimehe – se mäneb vacha, i sigäpäi irdale i sil kaik söm՚ puhtastase.»

²⁰ I hän sanui völ: «Mi tuleb mehen südäimespäi irdale, se tegeb händast paganaks.

²¹ Ani mehen südäimespäi lähteba pahad meletused, verhan akanke magadamine, vedeluzelo, rikond,

²² vargastuz, ažlakuz՚, pahuz՚, manitelend, kebn elo, kadehsil՚m, pahad sanad Jumalad vaste, ülendeluz, meletomuz՚.

²³ Kaik nece paha lähteb mehen südäimespäi i tegeb händast paganaks.»

Finikialaižen naižen uskond

²⁴ Iisus läksi sigäpäi Tiran i Sidonan tahoze. Hän mäni ühthe pert՚he i tahtoi olda tundmatoman, no ei voind jäda.

²⁵ Hänen polhe kulišti üks՚ naine, kudamban tütres eli pagan heng, i naine tuli hänennoks i lanksi hänen jaugoihe.

²⁶ Hän ei olend evrejalaine, a oli Sirian finikialaine. Hän pakičeškanzi Iisusad küksta pahan hengen hänen tütrespäi,

²⁷ no Iisus sanui: «Anda ezmäi lapsile söda külläks. Ei ole hüvä otta lapsil leibäd i antta sidä koiraižile.»

²⁸ Naine sanui: «Hüvä opendai, ved՚ koirad-ki voiba stolan al söda leibmuruid, kudambad lankteba lapsilpäi.»

²⁹ Siloi Iisus sanui hänele: «Ku ninga sanuid, mäne. Paha heng om lähtnu sinun tütrespäi.»

³⁰ Naine tuli kodihe i nägišti, miše paha heng oli lähtnu lapsespäi. Hän venui sijal.

Iisus tegeb tervheks kurdhon mehen

³¹ Iisus läksi möst Tiran i Sidonan tahospäi i tuli Kümnen lidnan tahon kal՚t Galilejajärvele.

³² Sigä hänennoks todihe kurdiž mez՚, kudamb ei voind hüvin pagišta, i pakitihe, miše Iisus paniži käden mehen päle.

³³ Iisus oti händast eriži rahvahaspäi, pani sormed hänen korvihe, sül՚gi i kosketi hänen kel՚t.

³⁴ Sid՚ hän kacuhti taivhaze, hengahti i sanui kurdhole: «Effafa», mi om «avaite».

³⁵ Siloi mehen korvad avaižihe, i hänen kel՚ välleni, i hän pagižeškanzi hüvin.

³⁶ Iisus ei käskend mehile sanuda neciš nikenele, no midä enamba hän ei käskend, sidä enamba hö saneliba vestid neciš kaikjal.

³⁷ Kaik lujas čududelihe i saneliba: «Hüvin hän om kaiken tehnu. Kurdhoid hän tegeb kulijoikš, lamanoid – pagižijoikš.»