Mark 4 - Uz' Zavet

OZOITEZSTARINAD JUMALAN VALDKUNDAN POLHE 4:1-34 Semendai

¹ Kerdan Iisus möst openzi järven randal. Ümbri hänes kogozihe muga äi rahvast, miše hänele pidi mända veneheze. Hän ištui venehes järvel, i kaik rahvaz oli randal.

² Hän openzi heid ozoitezstarinoil äjihe azjoihe. Ninga hän heid openzi:

³ «Kulgat! Mez՚ läksi semendamha.

⁴ I konz hän semenzi, tegihe muga, miše erased semned lanksiba teverhe, i lindud tuliba i söiba jüväd.

⁵ Erased semned lanksiba kivimaha, kus semnile oli vähä mad. Nene semned teravas läksiba orahaižile, sikš ku ma ei olend süvä.

⁶ No konz päiväine paštaškanzi, orahaižed vänttuiba, i ku niil ei olend jurid, ned kuivehtuiba.

⁷ Erased semned lanksiba ogahheiniden keskhe, ogahhein kazvoi i täpsi orahaižid, i villäd ei kazvand-ki.

⁸ No erased semned lanksiba hüvähä maha. Ned läksiba orahaižile, kazvoiba i andoiba hüvän villän, eraz andoi koumekümne jüväd, eraz kuz՚kümne, eraz sada jüväd.»

⁹ I hän sanui: «Kenel oma korvad kulda, ka se kulgaha!»

Min täht Iisus pagižeb ozoitezstarinoil?

¹⁰ Konz Iisus jäi ičeze ümbriolijoidenke i kahtentoštkümnen openikanke, hö küzuiba händast necen ozoitezstarinan polhe.

¹¹ Hän sanui heile: «Teile om anttud teta Jumalan valdkundan peitazjad. No toižile, irdpoližile, kaik tuleb vaiše ozoitezstarinoiden kal՚t,

¹² muga miše hö ičeze sil՚mil kacuba i ei nähkoi, ičeze korvil kuleba i ei el՚gekoi. A ku hö käraudaižihe Jumalaha, siloi hö päzuižiba grähkišpäi.»

Midä om ozoitezstarin semendajan polhe?

¹³ Sid՚ Iisus sanui: «Ku tö et voigoi el՚geta necidä ozoitezstarinad, ka kut voit el՚geta toižid ozoitezstarinoid?

¹⁴ Semendai semendab sanan.

¹⁵ Semen, kudamb oli semetud teverhe, om neniden mehiden polhe, kudambad kuleba sanan, no sid՚-žo soton tuleb i tembaidab sen, mi oli semetud heiden südäimihe.

¹⁶ Mugažo semenduz kivimaha oma nene mehed, kudambad kuleba sanan i ihastusenke kerdalaz otaba sen,

¹⁷ no heil ei ole jurid, hö uskoba vaiše lühüdan aigan. Konz tuleb ahtištuz vai küksend sanan tagut, ka hö sid՚-žo hül՚gäidaba necen sanan.

¹⁸ Semen, kudamb oli semetud ogahheiniden keskhe, znamoičeb nenid mehid, kudambad kuleba sanan,

¹⁹ no nece sana ei to villäd, sikš miše necen elon holed, himo olda elokahan i toižed himod mäneba heiden südäimihe i täptaba necen sanan.

²⁰ No semenduz hüvähä maha znamoičeb nenid mehid, kudambad kuleba sanan i otaba sen südäimihe. Hö toba satust, eraz koumhekümnehe, eraz kudhekümnehe, eraz sadaha kerdha enamba.»

Sanan oiged kundlemine

²¹ Iisus sanui: «Todas-ik lamp sen täht kodihe, miše panda se astijan alle vai magaduzsijan alle? Se pandas lampanpidimehe, miše näguiži!

²² Ved՚ ei ole nimidä peitolišt, mi ei tuliži sil՚mnägubale, ei voi nimidä peitta, miše sidä nikonz ei voiži nägištada.

²³ Kenel oma korvad kulda, ka se kulgaha.»

²⁴ I hän sanui heile: «Homaikat, midä kulet. Miččel märal tö märičet, sil teile-ki märitaškatas, da völ pälpäi-ki pandas teile, kundlijoile.

²⁵ Kenel om, sille anttas, no kenel ei ole, sil ottas se-ki, midä hänel om.»

Vil՚l՚, kudamb kazvab iče

²⁶ Iisus sanui: «Mugoine om Jumalan valdkund. Mez՚ semendab semnen maha.

²⁷ Hän magadab öl i heraštub kaiken toižel päiväl, a semen mäneb orahaižele i kazvab, hän ei teda kut.

²⁸ Ma iče tob satust, ezmäks seikhen, sid՚ tähkan, sid՚ täuded jüväd tähkas.

²⁹ I pigai, konz vil՚l՚ om küps, hän oigendab sirpin, sikš ku rahnmižen aig om tulnu.»

Gorčicansemen

³⁰ Völ Iisus sanui: «Min karččine Jumalan valdkund om? Miččel ozoitezstarinal voiži ozutada sidä?

³¹ Se om kuti gorčicansemen. Konz gorčicansemen semetas maha, se om henomb kaikid toižid semnid mirus,

³² no sen taimen libub maspäi i kazvab surembaks kaikid toižid, midä linmal kazvab. Sil oma mugoižed sured oksad, miše taivhan lindud voiba tehta ičeze pezad niiden oksiden kuvahaižihe.»

³³ I hän saneli rahvahale Jumalan sanad äjil mugoižil ozoitezstarinoil severdan, miverdan hö voiba kundelta.

³⁴ Ozoitezstarinoita hän ei pagižend heile, no ičeze openikoile hän nevoi kaiken kesknezoi.

SURED ČUDOD 4:35–5:43 Iisus tüništoitab torokan

³⁵ Sen päivän ehtal Iisus sanui openikoile: «Nügüd՚ lähtkam toižele randale.»

³⁶ Openikad pästiba rahvahan i ištuihe veneheze, kus ištui jo Iisus. Toižid-ki venehid läksi hänenke.

³⁷ Ühtnägoi libui sur՚ tullei, i lainhed löihe üliči venehen laidoiš, i veneh zavodi täuttas vedel.

³⁸ No Iisus magazi venehen peras pöluz pän al. Openikad heraštoitiba händast i sanuiba: «Opendai, ed-ik holdu siš, miše mö uptam!»

³⁹ Siloi hän libui, kel՚di tulleid i käski järvele: «Tüništu, tule hilläks!» Tullei tüništui, tegihe lujas tün՚.

⁴⁰ Iisus sanui heile: «Mikš tö muga varaidat? Kut teil ei ole uskondad?»

⁴¹ Siloi hö pöl՚gästuiba völ-ki enamban i küzeliba toine tošt: «Kenak nece mez՚ om? Tullei i lainhed-ki kundleba händast.»