Mark 16 - Uz' Zavet

Iisusan eläbzumine

¹ Konz sobat oli männu, Magdalan Maria, i Maria, Jakovan mam, i Salomia ostiba čomahajušt void, miše mända i voita Iisusad.

² Nedalin ezmäižen päivän, pühäpäivän, lujas aigoiš, ani päivnouzman aigan hö läksiba kaumale.

³ Tel hö pagižiba kesknezoi: «Ken abutaiži meile heitta kivi kauman verajaspäi?»

⁴ No tuldes sijale hö homaičiba, miše kivi oli jo heittud, i se kivi oli lujas sur՚.

⁵ Ani kal՚l՚haudan südäimehe mändes hö nägištiba oiktal polel ištmas prihan, kudamban päl oliba vauktad sobad. Hö lujas pöl՚gästuiba.

⁶ No priha sanui: «Algat varaikoi. Tö ecit Iisusad Nazaretalašt, kudamb oli nagloitud ristha. Hän om eläbzunu, i händast ei ole tägä. Naku om sija, kuna händast pandihe.

⁷ Mängat nügüd՚ i sanugat hänen openikoile, mugažo Petrale: Hän lähteb edel teid Galilejaha. Sigä tö nägištat händast, muga kut hän iče teile om sanunu.»

⁸ Naižed läksiba irdale i pageniba kaumalpäi säraiten da varaiten. Hö ei sanunugoi nikenele nimidä, sikš ku hö varaižiba.

Iisus ozutase ičeze openikoile

⁹ Konz Iisus eläbzui kollijoišpäi aigoiš homendesel sobatan jäl՚ghe, hän ozutihe ezmäi Magdalan Mariale, kudambaspäi oli küksnu seičeme pahad henged.

¹⁰ Maria läksi sigäpäi i vei vestin nenile, ked oliba kävelnuded Iisusanke i nügüd՚ voikiba opalas.

¹¹ Hö ei usknugoi, konz kulištiba, miše Iisus om eläb i Maria oli nähnu händast.

¹² Sen jäl՚ghe Iisus ozutihe toinejiččikš kahtele heišpäi, konz hö astuiba tedme külähä.

¹³ Hö pördihe sanumaha toižile, no heile-ki niken ei uskond.

¹⁴ Jäl՚gmäi Iisus ozutihe ühteletoštkümnele openikale, konz hö oliba sömäs. Hän lajiškanzi heid, miše hö oliba mugoižed uskmatomad i kovasüdäimeližed i ei usknugoi nenile, ked oliba nähnuded händast eläbzumižen jäl՚ghe.

¹⁵ Hän sanui heile: «Mängat kaikjale mirhu i sanelgat hüvä vest՚ sen kaikile eläjile.

¹⁶ Ken uskoškandeb i valatase, se linneb päzutadud. Ken ei usko, se linneb suditud.

¹⁷ Ned, kudambad uskoba minei, tegeškandeba mugoižid tundmuztegoid: minun nimen vägel hö kükseškandeba pahoid hengid. Hö pagižeškandeba uzil kelil.

¹⁸ Hö otaškandeba käzihe küid. I hot՚ hö joba sidä, mi voib rikta, ka se ei travi heid. Hö paneba käded läžujiden päle, i läžujad tervehtuba.»

¹⁹ Konz Ižand oli sanunu heile necen, händast ottihe ülähäks taivhaze, i hän ištuihe Jumalan oiktale kädele.

²⁰ Openikad läksiba matkha i saneliba kaikjal hüvän vestin. Ižand radoi heidenke i vahvištoiti sanan tundmuztegoil. Amin՚.