Mark 15 - Uz' Zavet

Iisus Pilatan edes

¹ Aigoiš homendesel ülembaižed papid, rahvahan vanhembad, käskištonopendajad i kaik Nevondkund pagižiba kesknezoi, sidoiba Iisusan, veiba sigäpäi i andoiba Pilatale.

² Pilat küzui Iisusal: «Oled-ik sinä evrejalaižiden kunigaz?» «Sinä sen sanuid», Iisus sanui.

³ Ülembaižed papid väritiba händast äjiš azjoiš.

⁴ Pilat möst küzui: «Mikš ed sanu vastha nimidä? Kuled ved՚, miš kaikes hö sindai väritaba?»

⁵ No Iisus enamba nimidä ei sanund vastha, i Pilat čududelihe.

⁶ Praznikan aigan hän kaiken pästli ühten mehen, kudamb oli türmas, sen, kudamban rahvaz pakiči.

⁷ Sil kerdal türmas oli mehid, kudambad libuiba pämehid vastha i toran aigan rikoiba mehen. Heiden keskes oli mez՚, kudamb kuctihe Varavvaks.

⁸ Rahvaz zavodi kidastada i pakita Pilatad siš, midä hän edel-ki tehli heiden täht.

⁹ Pilat küzui heil: «Tahtoit-ik, miše pästaižin teile evrejalaižiden kunigahan?»

¹⁰ Ved՚ hän el՚genzi, miše ülembaižed papid kadehen tagut oliba andnuded Iisusan hänen käzihe.

¹¹ No ülembaižed papid hus՚utiba rahvast pakičemha heile paremba Varavvan.

¹² Pilat völ küzui heid: «A midä tö tahtoit, miše minä tegižin sille, kudamban tö kucut evrejalaižiden kunigahaks?»

¹³ Hö möst kidastaškanziba: «Nagloiče ristha!»

¹⁴ «Midä pahad hän om tehnu?» küzui Pilat. No hö kidastiba völ-ki lujemba: «Nagloiče ristha nece mez՚!»

¹⁵ Miše olda hüvän rahvahale Pilat pästi Varavvan, a Iisusan hän käski löda kunutoil i nagloita ristha.

Saldatad nagraba Iisusad

¹⁶ Saldatad veiba Iisusan manižandan Pilatan horomoihe i kucuiba sinna kaikid ičeze sebran saldatoid.

¹⁷ Hö sädatiba händast purpuranrusktaha sädoho, tegiba ternan barboišpäi vencan i paniba sen hänen pähä.

¹⁸ Hö zavodiba sanuda hänele tervhensanoid: «Tervhen eläd, evrejalaižiden kunigaz!»

¹⁹ Hö löiba händast kaluil, sül՚giba hänehe, kombištuiba i kumardelihe hänele.

²⁰ Muga nagroiba händast, jäl՚ges heitiba hänespäi purpuranrusktan sädon, sobitiba händast ičeze sobihe i veškanziba nagloičemha ristha.

Iisusan nagloičemine

²¹ Saldatad käskiba Iisusan ristad kantta erasele siričimänijale, kudamb astui küläspäi lidnaha. Hän oli Simon, Kirinejan eläi, Aleksandran i Rufan tat.

²² Hö veiba Iisusan tahole, kudamban nimi oli Golgofa, mi znamoičeb Pämal՚l՚ansija.

²³ Hö taričiba hänele vinad, kudamb oli segoitadud smirnanke, no hän ei otand sidä.

²⁴ Jäl՚ges hö nagloičiba händast ristha i jagoiba kesknezoi hänen sobad, tacliba arban, ken midä sab.

²⁵ Oli koumanz՚ čas, konz hö nagloičiba händast ristha.

²⁶ Ülähäks ristale oli kirjutadud hänen viga: «Evrejalaižiden kunigaz».

²⁷ Hänenke nagloitihe völ kaks՚ razbainikad, toižen oiktale, toižen hurale kädele.

²⁸ Muga tegihe kut oli sanutud Pühiš Kirjutusiš: «Händast lugetihe razbainikaks.»

²⁹ Siričimänijad nagroiba händast. Likutaden päl hö saneliba: «Kac, sinä pühäkodin murendai i koumes päiväs sauvoi!

³⁰ Ka päzuta nügüd՚ ičtaiž, tule alahaks ristaspäi!»

³¹ Ülembaižed papid zavodiba mugažo nagrda ühtes käskištonopendajidenke. Hö pagižiba kesknezoi: «Toižid hän päzuti, no ičtaze ei voi päzutada.

³² Tulgha nügüd՚ alahaks ristaspäi, Messia, Izrail՚an kunigaz, miše nägižim i zavodižim uskta!» Ned-ki, ked oli nagloitud ristha ühtes hänenke, lajiba händast.

Iisusan surm

³³ Keskpäiväd, kudendel časul, tegihe pimed kaikes mas, i nece oli ühesandehe čashusai.

³⁴ Ühesandel časul Iisus kirgouzi komedal änel: «Eloi, Eloi, lamma savahfani?», mi znamoičeb ‘Minun Jumal, minun Jumal, mikš jätid mindai?’

³⁵ Erased sil tahol seižujad sanuiba: «Kulgat, hän kucub Iljad.»

³⁶ Üks՚ mez՚ joksi i kastoi gupkan muiktaha vinha, pani sen kalun pähä, tariči Iisusale joda i sanui: «Anda-ške, kacum, tuleb-ik Ilja otmaha händast alahaks.»

³⁷ No Iisus kirgouzi komedal änel i pästi hengen.

³⁸ Siloi pühäkodin keskuudin rebitihe poleti ülähänpäi alahakssai.

³⁹ Konz ristan kohtas seižui sadanpämez՚ nägišti, miše Iisus muga kirgouzi i pästi hengen, ka hän sanui: «Nece mez՚ oli todeks Jumalan Poig!»

⁴⁰ Sid՚ oliba mugažo naižed, kudambad kacuiba necidä edahanpäi. Heiden keskes oliba Magdalan Maria, i toine Maria, kudamb oli noremban Jakovan i Josijan mam, i Salomia.

⁴¹ Siloi-ki, konz Iisus oli Galilejas, hö oliba kävelnuded hänenke i pidänuded hol՚t hänes. Sigä oli äi toižid-ki naižid, kudambad oliba tulnuded Jerusalimha Iisusanke.

Iisusan mahapanend

⁴² Päiv sirdihe ehthapäi, oli pätnič, vaumištandpäiv.

⁴³ Sinna tuli Josif, Arimafejan eläi, lujas arvokaz Nevondkundan mez՚, kudamb iče-ki varasti Jumalan valdkundad. Hän rohti mända Pilatannoks pakičemha Iisusan hibjad.

⁴⁴ Pilat čududelihe, miše Iisus jo koli. Hän kucui sadanpämehen i küzui, amu-k hän om kolnu.

⁴⁵ Tedištades necen sadanpämehespäi hän andoi Josifale otta hibjan.

⁴⁶ Josif osti pölvazkangast, heiti Iisusan ristaspäi, käri händast pölvazkanghaze i pani haudha, kudamb oli kaidud kal՚l՚oho. Haudan hän saupsi kivel.

⁴⁷ Magdalan Maria i Maria, Josijan mam, kacuiba, kuna Iisus pandihe maha.