Mark 10 - Uz' Zavet

Sab-ik erigata akaspäi vai mužikaspäi?

¹ Iisus läksi sigäpäi i mändes Jordanjogen päivnouzmpolen randadme tuli Judejan tahoze. Hänennoks kogozihe möst äi rahvast, i kut ende hän möst openzi heid.

² Hänennoks tuli mugažo farisejid, kudambad kodvden händast küzuiba, voib-ik mužik tacta ičeze akan.

³ Hän sanui heile: «Midä Moisei om käsknu teile?»

⁴ Hö sanuiba: «Moisei om käsknu meile kirjutada erigoituzbumagan i jätta akan.»

⁵ Iisus sanui heile: «Tö olet kovasüdäimeližed, sikš hän kirjuti teiden täht necen käskön.

⁶ Ved՚ jo mirun tegemižespäi Jumal tegi mehen mužikaks i naižeks.

⁷ Sen täht mužik jätab tatan i maman

⁸ i tartub ičeze akaha, i muga nene kaks՚ tegesoiš ühteks hibjaks. Hö jo ei olgoi enamb kaks՚, hö oma üks՚.

⁹ Ka midä Jumal om ühtenzoitnu, sidä algha mez՚ erigoitkakoi.»

¹⁰ Konz hö oliba pertiš, openikad möst küzuiba händast necen azjan polhe.

¹¹ Iisus sanui heile: «Ken tacib ičeze akan i naib toižel, ka hän magadab verhan akanke.

¹² A ku ak tacib ičeze mužikan i lähteb mehele toižen taga, ka hän magadab verhan mužikanke.»

Iisusannoks todas lapsid

¹³ Iisusannoks todihe lapsid, miše hän kosketaiži heid. Openikad ei pästnugoi tojid.

¹⁴ No necen nägištades Iisus rändüi i sanui heile: «Pästkat lapsid minunnoks, algat kel՚tkoi heid. Heiden vuiččed päzuba Jumalan valdkundaha.

¹⁵ Todeks sanun teile: ken ei ota südäimehe Jumalan valdkundad muga kut laps՚, ka hän ei päzu sinna.»

¹⁶ Hän sebazi lapsid, pani käded heiden päle i blahoslovi heid.

Voib-ik elokaz sada igähižen elon?

¹⁷ Konz Iisus läksi matkha, üks՚ mez՚ tuli joksten, kombuštui hänen edehe i küzui: «Hüvä opendai, midä minei tarbiž tehta, miše saižin jäl՚gestuseks igähižen elon?»

¹⁸ Iisus sanui hänele: «Mikš sanud mindai hüväks? Niken ei ole hüvä, vaiše üks՚ Jumal.

¹⁹ Käsköd sinä tedad: ala magada verhan akanke, ala riko, ala vargasta, ala kelhas värita, ala ota mi om toižen, ole hüvä ičeiž tatale i mamale.»

²⁰ «Opendai, kaikiden neniden käsköiden mödhe olen elänu nores aigaspäi», sanui mez՚.

²¹ Iisus kacuhti hänehe lämäs i sanui: «Völ üks՚ azj sinai om tehmata. Mäne i mö kaik, midä sinai om, i jaga dengad gollile, siloi sinai linneb bohatust taivhas. Tule, ota rist i elä minun mödhe.»

²² Mez՚ vajehtihe modol neniš sanoišpäi. Hän läksi opalas tägäpäi, sikš ku hänel oli äi kodielod.

²³ Iisus kacuhti ümbri i sanui ičeze openikoile: «Kutak jüged om nenile, kenel om äi kodielod, putta Jumalan valdkundaha!»

²⁴ Openikad čududelihe hänen sanoihe, no Iisus sanui heile: «Minun lapsed, kut jüged om nenile, ked nadeišoiš kodieloho, putta Jumalan valdkundaha!

²⁵ Kebnemb om verbl՚udale mända neglankorvaižes läbi, mi elokahale putta Jumalan valdkundaha.»

²⁶ Openikad čududelihe völ-ki enamban i küzeliba toine tošt: «Ken siloi voib sada päzutandan?»

²⁷ Iisus kacuhti heihe i sanui: «Mehed ei necidä voigoi, no ei Jumal, Jumal kaiken voib.»

Pauk, kudamb tuleb openikoile

²⁸ Siloi Petr sanui hänele: «A kutak mö? Mö jätim kaiken i astum sinunke.»

²⁹ Iisus sanui: «Todeks sanun teile: kaikutte ken minun täht i minun hüvän vestin täht om jätnu pertin vai velled i sizared vai maman i tatan vai akan i lapsid vai pöudoid,

³⁰ hän nügüd՚, necen aigan, sab sada kerdad enamban pertid i vellid, i sizarid, i tatoid, i mamoid, i lapsid, i pöudoid – völ rahvahaspäi mokičendad-ki – i aigan, kudamb tuleb, hän sab igähižen elon.

³¹ No äi ezmäižid linneb jäl՚gmäižin, a äi jäl՚gmäižid ezmäižin.»

Iisus pagižeb völ kerdan ičeze surman polhe

³² Konz hö oliba matkas Jerusalimha, Iisus astui ezil. Erased čududelihe, a jäl՚gil astujad oliba pöl՚gästusiš. Iisus kucui ičezennoks nene kaks՚toštkümne openikad i pagižeškanzi heile, midä hänele tegese:

³³ «Mö mänem nügüd՚ Jerusalimha, i Mehen Poig anttas ülembaižiden papiden i käskištonopendajiden käzihe. Hö sudiba händast surmha i andaba händast Jumalad tundmatoman rahvahan käzihe,

³⁴ i ned nagraškandeba händast i sül՚geškandeba hänen päle, löškandeba händast i rikoba. No koumandel päiväl hän eläbzub.»

Iisus i Zevedejan poigad

³⁵ Zevedejan poigad, Jakov i Joan, tuliba Iisusannoks i sanuiba: «Opendai, mö tahtoižim, miše sinä tegižid meile, midä pakičem.»

³⁶ «Midä tö tahtoižit, miše minä teile tegižin?» – küzui Iisus.

³⁷ Hö sanuiba: «Konz sinä tuled taivhaližes hoštoteses, ka anda meile išttas sinun rindale – ühtele oiktale i toižele hurale kädele.»

³⁸ Iisus sanui heile: «Tö et tekoi, midä pakičet. Voit-ik tö joda siš mal՚l՚aspäi, miččespäi minä jon? Voit-ik tö tirpta sen valatusen, miččel mindai valatadas?»

³⁹ «Voim», hö sanuiba. Siloi Iisus sanui heile: «Siš mal՚l՚aspäi, miččespäi minä jon, tö-ki völ joškandet, i sil valatusel, miččel mindai valatadas, teid-ki valataškatas.

⁴⁰ No minä en voi sanuda, ken ištub oiktal, ken hural kädel minuspäi. Nene sijad oma nenile, kenele om vaumištadud.»

⁴¹ Konz toižed kümne openikad kulištiba necen, hö kurktuiba Jakovan i Joannan päle.

⁴² No Iisus kucui heid kaikid ičezennoks i sanui: «Tö tedat, miše ned, ked oma pämehen ištmel, oma rahvahiden ižandad, i maiden ülembaižed mehed pidäba rahvahid ičeze valdan al.

⁴³ Algha olgoi teiden keskes muga. Ken teiden keskes tahtoib olda vanhemban, ka olgha hän teile käskabunik,

⁴⁴ a ken tahtoib teiden keskes olda ezmäižen, ka olgha kaikiden orj.

⁴⁵ Mehen Poig-ki ei tulend sen täht, miše hänele služižiba, a tuli služimaha i andmaha ičeze hengen maksuks, miše kaik päzuižiba valdale.»

Iisus tegeb tervheks sogedan pakičijan

⁴⁶ Hö tuliba Jerihonha. Konz Iisus läksi Jerihonaspäi openikoidenke i suren rahvazkogonke, teveres ištui soged pakičii, Timejan poig Vartimei.

⁴⁷ Konz hän kulišti, miše siriči mäneb Iisus Nazaretalaine, hän kidastaškanzi: «Iisus, Davidan Poig, armahta mindai!»

⁴⁸ Äjad käskiba hänele vaikastuda, no hän vaiše kidasti völ-ki lujemba: «Davidan Poig, armahta mindai!»

⁴⁹ Siloi Iisus seižutihe i käski kucta händast. Hö mäniba kucmaha sogedad i sanuiba hänele: «Ala varaida. Libu, hän kucub sindai.»

⁵⁰ Mez՚ heiti pälembaižen soban, libui jaugoile i tuli Iisusannoks.

⁵¹ «Midä tahtoid, miše minä tegižin sinei?» – Iisus küzui. Soged sanui: «Opendai, tahtoižin sada nägun.»

⁵² Siloi Iisus sanui hänele: «Mäne, sinun uskond tegi sindai tervheks.» Mez՚ sid՚-žo sai ičeze nägun tagaze i läksi astmaha Iisusan jäl՚ghe tedme.