Luka 7 - Uz' Zavet

Iisus i sadanpämez՚

¹ Konz Iisus oli sanunu kaik nene sanad rahvahale, kudamb kundli händast, ka hän läksi Kapernaumha.

² Erasen sadanpämehen käskabunik lujas läžui i oli surman kündusel. Nece pämez՚ lujas armasti ičeze abunikad.

³ Konz pämez՚ kulišti Iisusan polhe, hän oigenzi evrejalaižiden vanhembid pakičemha, miše Iisus tuliži i tegiži läžujad tervheks.

⁴ Hö tuliba Iisusannoks i pakičeškanziba händast: «Nece mez՚ om arvokaz, hänele tarbiž abutada.

⁵ Hän armastab meiden rahvast i om tehnu meile suimpertin-ki.»

⁶ Iisus läksi heidenke. No konz hän oli jo läheli pertid, ka nece sadanpämez՚ oigenzi ičeze sebranikoid sanumaha hänele: «Opendai, ala mokiče ičtaiž. Minä en ole severdan arvokaz, miše sinä tuližid minun katusen alle.

⁷ En lugend-ki ičtain mugoižeks arvokahaks, miše voinuižin tulda sinunnoks. Sanu vaiše sana, i minun abunik tegese tervheks.

⁸ Minä iče-ki kundlen toižiden käsköid i käsken saldatoile. Konz sanun erasele: ‘Mäne’, ka hän mäneb, a toižele: ‘Tule’, ka hän tuleb, i käskabunikale: ‘Tege nece’, ka hän tegeb.»

⁹ Konz Iisus kulišti necen, hän čududelihe. Hän kärauzihe rahvahaze, kudamb oli hänenke, i sanui: «Kulgat, midä sanun: mugošt uskondad en vasttand Izrail՚as-ki.»

¹⁰ Konz Iisusale vastha oigetud mehed pördihe, ka löuziba käskabunikan tervhen.

Iisus eläbzoitab leskiakan poigan Nainas

¹¹ Pigai jäl՚ghe necidä Iisus läksi Nainan lidnaha, i hänenke oliba äjad hänen openikoišpäi i sur՚ rahvazkogo.

¹² Sen aigan, konz hän oli jo lidnan verajanno, sigäpäi kanttihe sabilahil kollii, maman üksjaine poig. Mam oli leskiak, i hänenke oli äi rahvast lidnaspäi.

¹³ Konz Ižand nägišti leskiakan, hänele tegihe žal՚ händast, i hän sanui: «Ala voika.»

¹⁴ Hän mäni sabilahidennoks, kosketi niid, i kandajad seižutihe. Hän sanui: «Priha, minä sanun sinei, nouze!»

¹⁵ Kollii nouzi, ištuihe i zavodi pagišta, i Iisus andoi prihan tagaze mamale.

¹⁶ Kaik lujas pöl՚gästuiba i ülenzoitaškanziba Jumalad sanuden: «Meiden keskes om nügüd՚ sur՚ Jumalan sanankandai. Jumal om tulnu ičeze rahvahale abuhu.»

¹⁷ Nece vest՚ Iisusan polhe leveni kaikjale Judejaha i sen ümbrištoho.

Joan Valatajan küzund Iisusale

¹⁸ Joannan openikad sanuiba kaiken necen polhe ičeze opendajale. Siloi hän kucui kaht heišpäi

¹⁹ i oigenzi heid küzumaha Iisusal: «Oled-ik sinä se, kudambale pidab tulda, vai tarbiž-ik meile keda-ni tošt varastada?»

²⁰ Mehed tuliba Iisusannoks i sanuiba: «Joan Valatai oigenzi meid küzumaha sinai: Oled-ik sinä se, kudambale pidab tulda, vai tarbiž-ik meile keda-ni tošt varastada?»

²¹ Iisus oli sen aigan tehnu tervhikš äi läžujid, küksnu mehišpäi pahoid hengid i andnu äjile sogedoile nägun.

²² I hän sanui: «Mängat i sanugat Joannale, midä olet nähnuded i kulnuded: Sogedad saba nägun i rambičijad käveleba, prokazas läžujad puhtastasoiš i kurdhod kuleba, kollijad eläbzuba i gol՚l՚ad kulištaba hüvän vestin.

²³ Ozakaz om se, ken ei hül՚gäida uskondad minuhu.»

Iisus pagižeb Joan Valatajan polhe

²⁴ Konz Joannan oigetud mehed oliba lähtnuded sigäpäi, Iisus zavodi pagišta rahvahale Joannan polhe: «Midä tö mänit kacmaha rahvahatomha maha? Rogod-ik, kudambad tullei likutab?

²⁵ Vai midä mänit kacmaha? Čomin sädatadud mest-ik? Kunigahiden horomoiš tö löudat nenid, kudambad oma sädoiš čomitesidenke i eläba elokahas!

²⁶ Vai midä mänit kacmaha? Et-ik Jumalan sanankandajad? Ka, minä sanun teile, miše hän om enamb, mi Jumalan sanankandai.

²⁷ Hän om se, kenen polhe om sanutud Pühiš Kirjutusiš: – Minä oigendan vestinkandajan edel sindai, hän vaumištab ten sinun edes.

²⁸ Minä sanun teile: kaikes rahvahan rodus ei ole ni üht Jumalan sanankandajad, kudamb om suremb Joan Valatajad, no Jumalan valdkundas kaikid penemb-ki om suremb händast.»

²⁹ Kaik rahvaz, maksunkeradajad-ki, konz kulištiba Joannan sanad, valatadihe Joannan valatusel i sil ozutiba, miše Jumal om oiged.

³⁰ No farisejad i käskištonopendajad oliba Jumalan tahtod vastha i ei valatanus Joannal.

³¹ Siloi Ižand sanui: «Kenehe voižin rindatada necen sugupol՚ven rahvast? Kenen vuiččed hö oma?

³² Hö oma kuti lapsed, kudambad ištuba irdal i kidastaba toine toižele: ‘Mö vändim teile fleital, no tö et kargaidanugoi, mö laskim teile voikuid, no tö et voiknugoi!’

³³ Joan Valatai tuli, hän ei sö leibäd i ei jo vinad, i tö sanut: ‘Hänes om paha heng.’

³⁴ Mehen Poig tuli, hän söb i job, i tö sanut: ‘Mitte hän sömar՚ i jomar՚ om, maksunkeradajiden i grähkhižiden sebranik!’

³⁵ No melevuz՚ nägub todeks melevuden tegoišpäi!»

Farisei i grähkhine naine

³⁶ Üks՚ farisei kucui Iisusan adivoihe. Iisus tuli hänennoks, i hö zavodiba söda.

³⁷ Lidnas oli naine, kudamb eli grähkäs. Konz hän tedišti, miše Iisus om longil farisejanno, hän toi sinna alebastrahižen astijan čomahajušt void.

³⁸ Hän seižutihe Iisusan taga, hänen jaugoidenno i voikaškanzi. Konz Iisusan jaugad kastuiba hänen kündlišpäi, hän kuivazi jaugad ičeze hibusil, tervehteli heid i voidli necil voil.

³⁹ Farisei, kudamb oli kucnu Iisusan, nägišti necen i meleti: «Ku nece mez՚ oliži Jumalan sanankandai, ka hän tedaiži, ken i mitte nece naine om, kudamb koskeb händast. Ved՚ naine om grähkhine.»

⁴⁰ Siloi Iisus sanui hänele: «Simon, minä tahtoižin sanuda sinei ühten azjan.» «Ka sanu, opendai», farisei sanui.

⁴¹ «Oli kaks՚ mest», sanui Iisus. «Hö oliba velgas erasele rahanandajale, toine vižsadad, toine vižkümne dinarijad.

⁴² Ku heil ei olend, mil maksta, ka rahanandai prosti heile molembile velgan. Sanu, kudamb armastab händast enamba?»

⁴³ Simon sanui: «Tedan, se, kudambale hän prosti enamban.» «Ka, oikti», sanui Iisus.

⁴⁴ Hän kärauzihe naižehepäi i sanui Simonale: «Kacu neche naižehe. Konz tulin sinun kodihe, sinä ed andand vet jaugoid pestes, no hän kastoi minun jaugad kündlil i kuivazi ičeze hibusil.

⁴⁵ Sinä ed tervehtand mindai, konz minä tulin, no hän tervehteli minun jaugad siš aigaspäi, kut minä tänna tulin.

⁴⁶ Sinä ed voidand minun päd pühävoil, a hän voidi minun jaugad čomahajuižel voil.

⁴⁷ Sikš sanun-ki sinei: hänele äjad grähkäd om pästtud, ved՚ hän armasti äjan. A kenele vähän pästtas grähkid, se armastab-ki vähän.»

⁴⁸ I hän sanui naižele: «Sinun grähkäd om pästtud.»

⁴⁹ Kaik, ked oliba sömäs, pagižeškanziba kesknezoi: «Ken nece mez՚ om? Ved՚ hän grähkid-ki pästab.»

⁵⁰ No Iisus sanui naižele: «Sinun uskond tegi sindai tervheks. Mäne tünäs.»