Joan 7 - Uz' Zavet

Iisus Lehtezpertižen praznikal

¹ Necen jäl՚ghe Iisus käveli Galilejas. Judejas hän ei tahtoind kävuda, sikš miše evrejalaižed eciba aigad rikta händast.

² Evrejalaižiden Lehtezpertižen praznik oli läz.

³ Iisusan velled sanuiba hänele: «Mäne Judejaha, miše sinun openikad-ki nägižiba tegod, miččid sinä teged.

⁴ Ved՚ niken ei peitä ičeze tegoid, ku tahtoib olda tetab. Ku teged mugomid tegoid, ka ozuta mirule, ken sinä oled!»

⁵ Velled-ki ved՚ ei usknugoi hänele.

⁶ Iisus sanui heile: «Minun aig ei ole völ tulnu – a teile kaikutte aig kožub.

⁷ Teiden päle mir ei voi kantta vihad, no minun päle kandab, ved՚ minä todištan, miše sen tegod oma pahad.

⁸ Mängat tö praznikale. A minä völ en mäne necile praznikale, sikš ku minun aig völ ei ole tulnu.»

⁹ Muga hän sanui i jäi Galilejaha.

¹⁰ No konz hänen velled tuliba, siloi Iisus-ki tuli praznikale, no ei avoin, a kuti peitoiči.

¹¹ Praznikan aigan evrejalaižiden pämehed eciba händast i küzeliba: «Kus se mez՚ om?»

¹² Mehiden keskes oli äi paginoid hänen polhe. Toižed sanuiba, miše hän om hüvä mez՚, toižed, miše ei, hän manitab rahvast.

¹³ Niken ei rohtind pagišta hänen polhe avoin, sikš ku hö varaižiba evrejalaižiden pämehid.

¹⁴ No kesked praznikad Iisus tuli pühäkodihe i opendaškanzi.

¹⁵ Evrejalaižiden pämehed čududelihe i sanuiba: «Kut nece mez՚, kudamb ei ole opendanus, voib teta Pühäd Kirjutused?»

¹⁶ Iisus sanui heile: «Se, midä minä opendan, ei ole minun openduz, a hänen, kudamb om mindai oigendanu.

¹⁷ Kaikutte, ken tahtoib eläda hänen tahton mödhe, tedištab, om-ik minun openduz Jumalaspäi, vai pagižen-ik ičein päspäi.

¹⁸ Ken pagižeb ičesazepäi, ka tahtoib kitändad ičeleze. No ken tahtoib kitändad ičeze oigendajale, hän pagižeb tot, hänes ei ole kelastust.

¹⁹ Ei-ik Moisei andand teile käskištod? No niken teišpäi ei elä sen mödhe. Mikš tö tahtoit rikta mindai?»

²⁰ Mehed sanuiba: «Sinus om paha heng. Ken sindai tahtoib rikta?»

²¹ Iisus virki: «Minä tegin ühten tegon, i tö kaik čududeletoiš.

²² Moisei andoi teile käskön tehta prihaižile ümbrileiktusen – ka, nece käsk ei ole Moisejaspäi, a tatoiden tatoišpäi – i tö teget sen sobatan-ki.

²³ I ku mehele tehtas ümbrileiktuz sobatan-ki, miše oliži Moisejan käskišton mödhe, ka mikš tö buraidat minun päle sikš, miše minä sobatan tegin tervheks mehen kogonaz?

²⁴ Algat sudigoi pälpäi kacten, a sudigat oiktal sudal.»

Om-ik Iisus Messia?

²⁵ Erased jerusalimalaižed sanuiba: «Ei-ik nece ole se, keda hö tahtoiba rikta?

²⁶ Kut hän voib pagišta avoin i hänele ei sanugoi nimidä? Voib olda, pämehed oma tedištanuded, miše hän om Messia?

²⁷ No mö tedam, kugalaine hän om. A konz Messia tuleb, niken ei teda, kuspäi hän om.»

²⁸ Opetes pühäkodiš, Iisus sanui lujal änel: «Tö tundet mindai i tedat kugalaine olen. No minä en tulend ičein valdal, mindai oigenzi se, kudamb om iče tozi! Tö händast et tuntkoi,

²⁹ no minä tunden händast, sikš miše tulin hänennopäi i sikš miše hän om mindai oigendanu.»

³⁰ Hö tahtoinuižiba tabata händast, no niken ei kosketand, sikš ku hänen aig völ ei tulend.

³¹ No äi rahvast uskoi hänehe. Hö sanuiba: «Voib-ik Messia tuldes tehta enamban tundmuztegoid, mi nece mez՚ om jo tehnu?»

³² Konz farisejad kulištiba, miše mehiden keskes pagištihe Iisusan polhe muga, hö i ülembaižed papid oigenziba mehid tabadamha händast.

³³ Iisus sanui heile: «Minä völ vähäižen olen teidenno. Jäl՚ges lähten hänennoks, kudamb mindai om oigendanu.

³⁴ Tö eciškandet mindai, no et löutkoi, i tö et voigoi puta sinna, kus minä linnen.»

³⁵ Evrejalaižiden pämehed küzeliba toine tošt: «Kuna hän tahtoib mända, kus mö em voigoi händast löuta? Lähteb-ik hän neniden mijalaižidennoks, kudambad eläba grekalaižiden keskes? Tahtoib-ik hän opeta grekalaižid-ki?

³⁶ Midä hän tahtoi sanuda sanoil: ‘Tö eciškandet mindai, no et löutkoi,’ i: ‘Tö et voigoi putta sinna, kus minä linnen’?»

³⁷ Praznikan jäl՚gmäižel, surel päiväl Iisus seižutihe i kirgui lujal änel: «Ku kenel-ni om jomannäl՚g, tulgha minunnoks i jogha.

³⁸ Ken uskob minuhu, hänen südäimespäi jokseškandeba eläban veden joged, ninga kut om sanutud Pühiš Kirjutusiš.»

³⁹ Muga Iisus pagiži Hengen polhe, kudamban saižiba ned, ked uskoba hänehe. Heiden päl völ ei olend Pühäd Henged, sikš ku Iisusan korged arv völ ei tulend kaikehe hoštoteshe.

⁴⁰ Kulištades Iisusan sanoid äjad rahvazkogospäi virkiba: «Hän om todeks se Jumalan sanankandai.»

⁴¹ Toižed sanuiba: «Hän om Messia.» No toižed sanuiba: «Jose Messia tuleb Galilejaspäi?

⁴² Ei-ik Pühiš Kirjutusiš ole sanutud, miše Messia om Davidan heimokundaspäi i tuleb Viflejemaspäi, Davidan kodilidnaspäi?»

⁴³ Muga mehed ridleškanziba hänen polhe.

⁴⁴ Erased tahtoiba tabata händast, no niken ei koskend händast.

⁴⁵ Mehed, keda oigetihe tabadamha Iisusad, pördihe ülembaižiden papidennoks i farisejidennoks. Ned küzuiba: «Mikš et tonugoi händast?»

⁴⁶ Mehed sanuiba: «Igäs völ niken ei pagižend muga kut hän.»

⁴⁷ Siloi farisejad sanuiba: «Olet-ik tö-ki andnuded manitada ičtatoi?

⁴⁸ Om-ik hot՚ üks՚ pämez՚ usknu hänehe? Vai üks՚ farisei?

⁴⁹ No nece rahvaz nikut ei teda käskištod – tulgha heiden päle Jumalan viha!»

⁵⁰ Siloi Nikodim, kudamb konz-se öl oli kävunu Iisusanno da iče-ki oli farisei, sanui heile:

⁵¹ «Voib-ik meiden käskišt sudida mest, edel sidä ku kundeltas händast i ottas sil՚mnägubale, midä hän om tehnu?»

⁵² No toižed sanuiba hänele: «Ed-ik sinä-ki ole Galilejaspäi? Luge hüvin Pühid Kirjutusid, siloi nägištad, miše Galilejaspäi ei tule Jumalan sanankandai.»

⁵³ Kaik läksiba kodihe, 8:1 no Iisus mäni Voipunmägele.