Joan 2 - Uz' Zavet

Sai Kanas

¹ Koumandel päiväl tehtihe Galilejan Kanas sai. Iisusan mam oli sigä,

² i mugažo Iisus i hänen openikad oli kuctud sajaha.

³ Vin lopihe kesken, i mam sanui Iisusale: «Heil ei ole vinad.»

⁴ No Iisus sanui: «Jäta mindai. Minun aig völ ei ole tulnu.»

⁵ Hänen mamaze sanui abunikoile: «Midä hän sanub teile, tehkat se.»

⁶ Sigä oli kuz՚ kivišt veziastijad evrejalaižiden puhtastuzveroiden täht. Kaikuččehe astijaha mülüi kaks՚ vai koume metretes-märad vet.

⁷ Iisus sanui abunikoile: «Täutkat astijad vedel», i hö täutiba ned röunoihesai.

⁸ Sid՚ hän sanui: «Amundagat nügüd՚ sidä i vegat praznikan pämehele», i hö veiba.

⁹ Pämez՚ mujahti vet: se oli tehnus vinaks. Hän ei tedand, kuspäi oli necen vin, a abunikad, kudambad oliba amundanuded vet astijaspäi, teziba. Muga hän kucui ženihon ičezennoks

¹⁰ i sanui: «Kaik taričeba ezmäi hüväd vinad, a jäl՚ges, konz adivod humalzuba, taričeba hondombad. No sinä oled kaičenu hüvän vinan neche aighasai.»

¹¹ Nece oli Iisusan ezmäine tundmuztego, i hän tegi sen Galilejan Kanas. Hän toi ičeze korktan arvon sil՚mnägubale, i hänen openikad uskoškanziba hänehe.

¹² Jäl՚ghe necidä Iisus, hänen mamaze, hänen velled i hänen openikad mäniba Kapernaumha i oliba sigä äjak-se päiväd.

Iisus puhtastab pühäkodin

¹³ Evrejalaine Äipäivän praznik läheni, i Iisus mäni Jerusalimha.

¹⁴ Pühäkodiš hän nägišti mehid, kudambad möiba härgid, lambhid i kühkjaižid žertvaks. Sigä ištuiba mugažo rahanvajehtajad.

¹⁵ Iisus tegi kunutan noran seiktemišpäi i küksi heid kaikid pühäkodišpäi: mehid, lambhid i härgid. Hän taci vajehtajiden rahad maha i kukerzi heiden stolad.

¹⁶ Kühkjaižiden möjile hän sanui: «Vegat lindud tägäpäi! Algat tehkoi minun Tatan pertid möndsijaks!»

¹⁷ Siloi openikad johtutiba, miše Pühiš Kirjutusiš om sanutud: «Hol՚ sinun pertin polhe, Jumal, kulutab mindai.»

¹⁸ Siloi evrejalaižed sanuiba Iisusale: «Miččel tundmuztegol ozutad meile, miše sinai om vald tehta muga?»

¹⁹ Iisus sanui: «Murendagat nece pühäkodi, i minä seižutan sen udes koumes päiväs.»

²⁰ Siloi evrejalaižed sanuiba: «Nece pühäkodi tehtihe nel՚l՚kümne kuz՚ vot. Sinä-k seižutad sen koumes päiväs?»

²¹ Pagištes pühäkodin polhe, Iisus sanui ičeze hibjan polhe.

²² Konz hän eläbzui kollijoišpäi, openikad johtutiba nene hänen sanad, i hö uskoiba Pühiže Kirjutusihe i sihe, midä Iisus oli sanunu.

²³ Konz Iisus oli Äipäivän praznikan Jerusalimas, äjad uskoiba hänen nimehe, konz nägištiba nene tundmuztegod, kudambad hän tegi.

²⁴ No Iisus iče ei avaidand ičtaze heile, sikš miše hän tunzi heid kaikid.

²⁵ Hänele ei pidand, miše hänele sanutihe, mitte mez՚ om, sikš ku hän iče tezi, midä mehes om.