Toine kirjeine Timofejale 4 - Uz' Zavet

¹ Jumalan da meiden Ižandan Iisusan Hristosan edes, kudamb tuleb sudimaha eläbid da kollijoid, da pidäden meles hänen tulendad da valdkundad minä käsken sinei:

² sanele hüväd vestid, astu edemba kožujan i kožumatoman aigan, ozuta vigoid, kel՚dä, rohkenzoita. Tege se suren tirpandanke da openda rahvast hüvin.

³ Ved՚ tuleb aig, konz rahvaz ei tirpaškande tervhid opendusid, a ičeze himoiden mödhe keradaškandeb ümbri ičtaze opendajid, kudambad sanuškandeba sidä, mi om hüvä heiden korvile.

⁴ Hö sauptaba ičeze korvad todespäi i käraudasoiš, miše kulištada sarnstarinoid.

⁵ A sinä elä kaikes sel՚ktal päl, tirpa mokad, tege lophusai hüvän vestin sanelijan radod i tege kaik, midä pidab tehta sinei sinun radsijal.

⁶ Minun elo om jo pandud žertvaks altarile, tuli minun lähtendaig.

⁷ Olen pidänu hüvän uskondtoran, joksnu agjahasai. Uskondan olen kaičenu.

⁸ A nügüd՚ mindai varastab vägestajan venc, kudamban minei andab Ižand, oiged sudj, ičeze tulendpäivän. I ei vaiše minei, a andab kaikile, ked armastusenke varastaba hänen tulendad.

Nevondad i pakičendad

⁹ Napri tulda minunnoks teramba.

¹⁰ Ved՚ Dimas mel՚düi nügüdläižen mirun azjoihe i jäti mindai, läksi Fessalonikaha. Kriskent mäni Galatiaha, Tit – Dalmatiaha.

¹¹ Vaiše Luka om tägä minunke. Ota kerdale Mark da to tänna, minei lujas tarbiž, miše hän tartuiži neche radho.

¹² Tihikan minä oigenzin Efesaha.

¹³ Konz tuled, to minun irdsoba, kudamban jätin Troadaha Karpanno, i kirjad mugažo, ezmäi kaiked pergamentkirjad.

¹⁴ Aleksandr-sep om tehnu minei äi pahad; makskaha hänele Ižand hänen tegoiden mödhe.

¹⁵ Sinä-ki ole hänespäi laptas, sikš ku hän lujas äjan om vastustanu meiden opendust.

¹⁶ Konz ezmäižen kerdan polestin ičtain sudas, niken ei tulend minei abuhu, kaik jätiba mindai. Algha Jumal lugekoi necidä heile vigaks.

¹⁷ No Ižand oli minun rindal i vahvišti mindai, miše voižin vedäda lophusai hüvän vestin sanelendan i sen kulištaižiba kaik rahvahad, ked ei tuntkoi Jumalad. Muga minä päzuin levan hambhišpäi.

¹⁸ Ižand päzutab mindai edemba-ki kaikes pahaspäi da vedäb ičeze taivhaližehe valdkundaha. Hänen om korged arv kaiken i igäks! Amin՚.

Loptervhutesed

¹⁹ Sanu tervhensanoid Priskale i Akilale i mugažo kaikile Onesiforan kanznikoile.

²⁰ Erast jäi Korinfaha. Trofiman minä jätin läžundan tagut Militaha.

²¹ Rigehti tulmaha minunnoks edel tal՚ved. Sinei oigendaba tervhensanoid Jevvul, Pud, Lin, Klavdia i kaik velled.

²² Ižand Iisus Hristos olgha sinun hengenke. Armoid teile! Amin՚.