Toine kirjeine Timofejale 3 - Uz' Zavet

Jäl՚gmäižen aigan mehed

¹ Sanun, miše sinä tedaižid: jäl՚gmäižin päivin tuleba jügedad aigad.

² Mehed zavodiba armastada vaiše ičtaze da rahoid, tegesoiš baffalijoikš, nenakahikš, pahan pagižijoikš. Hö ei kundleškakoi ičeze kazvatajid, hö ei muštaškakoi nimidä hüväd, heile ei linne nimidä pühäd.

³ Nene mehed linneba südäimita, kandaškandeba vihan toine toižen päle, pagižeškandeba pahad toine toižes, ei voiškakoi pidäda ičtaze käziš, linneba kuti mecživatad, ei navediškakoi hüvüt,

⁴ linneba manitajad, kovasüdäimeližed, ülendelijad, hö navediškandeba enamba elon hüvüt, a ei Jumalad.

⁵ Hö irdpolespäi oma kuti jumalahižed, no ei uskkoi Jumalan vägehe. Ole laptas heišpäi!

⁶ Hö linneba mugoižed, kudambad libedkelel ličesoiš toižiden pertihe tabadamha kebnmeližid naižid. Nenil naižil om kogo grähkid i äi erazvuiččid himoid; tämbei heid vedäb neche, a homen sihe.

⁷ Nene naižed oma kaikušti vaumhed opetas mihe-se, no nikonz ei voigoi tundištada tot.

⁸ Kut Janni i Jamvri oliba Moisejad vasthapäi, muga nene mehed-ki linneba tot vasthapäi. Heiden mel՚ om murenu, heiden uskond ei kožu nimihe.

⁹ No edahan hö ei voigoi sirttas, heiden meletomuz՚ näguškandeb kaikile, kut nägui neniden kahten mehen-ki meletomuz՚.

Pavlan jäl՚gmäižed openduzsanad Timofejale

¹⁰ Vaiše sinä astuid tarkas minun mödhe – openduses, elon veros, tahtoiš, uskondas, pit՚käs tirpandas, armastuses, vahvas püžundas,

¹¹ küksendoiš da mokiš, mugoižiš, miččed tuliba minun päle Antiohias, Ikonias da Listras. Voi, miččid mokid minä olen tirpnu! I kaikišpäi Ižand om päzutanu mindai.

¹² Dai kaikid nenid, ked tahtoiba eläda jumalahišt elod Hristosas Iisusas, mugažo kükseškatas.

¹³ A pahad mehed i manitelijad sirdäsoiš süvemba i süvemba pahudehe, manitaškandeba toižid i segoiba iče-ki.

¹⁴ A sinä püžu siš, mihe oled opendanus da mihe uskod vahvas. Ved՚ sinä tedad, ken om sindai opendanu.

¹⁵ Sinä laps՚aigaspäi oled tundištanus Pühiden Kirjutusidenke. Ned voiba antta sinei mel՚t, a usktes Hristosaha Iisusaha sinä sad päzutandan.

¹⁶ Kaik Pühäd Kirjutused oma Jumalan Hengespäi tulnuded i abutaba opendamižes, nevondoiš, vigoiden heitändas, kazvatandas tozioiktaha eloho,

¹⁷ miše Jumalan mez՚ oliži kaikuttušti vaumiž kaikihe hüvihe tegoihe.