Toine kirjeine fessalonikalaižile 2 - Uz' Zavet

Vastustai, Antihrist

¹ Otkam nügüd՚ paginaks meiden Ižandan Iisusan Hristosan tulend da se, kut meid ottas hänennoks. Mö pakičem, velled,

² algat antkoi nikenele pöl՚gästoitta ičtatoi, algat lähtkoi melespäi, konz sanutas, miše Hristosan päiv om jo tulnu. Algat uskkoi, ku ken-ni sanub, miše hän tedišti necen Pühäs Hengespäi vai kenen-se paginaspäi da kuti meiden kirjutadud kirjeižespäi.

³ Algat antkoi nikenele nimiččel ladul manitada ičtatoi. Ved՚ edel sidä päiväd rahvaz käraudase Jumalaspäi, i tuleb ezile grähkän mez՚, surman poig.

⁴ Nece vastustai libutaškandeb ičtaze korktemba kaikid, lugeškandeb ičtaze Jumalaks, kenele loitas, eskai ištuse pühäkodihe Jumalan vuitte da paneb ičtaze Jumalaks.

⁵ Tö ved՚ muštat, kut minä pagižin teile necen polhe siloi, konz olin teidenno.

⁶ Tö tedat, mi vastustajad völ pidätab, ei anda ozutadas: hänen aig völ ei ole tulnu.

⁷ No se vägi, kudamb vastustab Jumalad, om jo zavodinu ičeze peitradod. Tarbiž vaiše ezmäi čurata tespäi se, ken pidätab.

⁸ Siloi ozutase se Jumalan käsköiden vastustai, keda Ižand Iisus tuldes surmitab ičeze sun hengahtusel da koletab ičeze korktan arvon vägel.

⁹ Jumalan käsköiden vastustajan tulend om sotonan rad. Se tegeškandese suren vägenke, tundmuztegoidenke, manitajiden čudoidenke i

¹⁰ kaikenlaižiden pahoiden tegoidenke. Ned manitaškandeba surmha astujid, sikš ku hö ei navedinugoi tot, mi oliži päzutanu heid.

^11-12 I sikš Jumal andab heile putta manitusen valdha, miše kaik ned, ked valičiba pahuden i ei usknugoi todehe, uskoižiba kelastushe i saižiba sudan.

Olgat vahvad

¹³ No meile kaiken pidab kitta Jumalad teiden tagut, Ižandan kal՚hed velled. Ved՚ Jumal ezmässai valiči teid päzutandaha. Hänen Heng tegeb teid pühikš, i tö uskot todehe.

¹⁴ Sen täht hän kucui-ki teid hüvän vestin kal՚t, kudamban mö toim teile, miše tö-ki oližit ühtes meiden Ižandan Iisusan Hristosanke hänen korktas arvos.

¹⁵ Olgat sikš vahvad, velled, i pidägatoiš neniš opendusiš, kudambid mö olem andnuded teile paginas vai kirjeižiš.

¹⁶ Iče meiden Ižand Iisus Hristos i Jumal i meiden Tat, kudamb om armastanu meid da ičeze armoiš om lahjoičenu meile igähižen tüništoitusen i hüvän nadejan,

¹⁷ tehkaha teiden südäimed rohktembikš da vahvištagha teid jogahižes sanas i hüväs tegos.