Toine kirjeine korinfalaižile 6 - Uz' Zavet

¹ Ku olem Jumalan radvelled, ka pakičem teid: otkat Jumalan armod muga, miše ned ei mäniži uhtei.

² Hän sanui: – Hüväl aigal olen kulnu sindai, päzutandpäiväl olen abutanu sinei. Nügüd՚ om-ki se aig tulnu, nügüd՚ om-ki tulnu päzutandpäiv.

Pavlan jügedused

³ Mö em tahtoigoi nikenen täht tehtas potkkiveks, miše meiden radod niken ei lajiži.

⁴ Kaikes ozutam ičtamoi, miše olem Jumalan radnikad. Mö mahtam tirpta ahtištusid, mokid da gor՚ad,

⁵ löndoid, türmid, libundtorid, jügedoid radoid, unetomid öid, näl՚gäd.

⁶ Meiden meled oma puhthad, meil om tedo, mö olem tirpajad, hüväd toine toižele, meil om Pühä Heng, todesine armastuz,

⁷ om toden sana da Jumalan vägi. Meiden azegen om meiden oiged elo huras dai oiktas kädes.

⁸ Meid arvostadas dai alenzoittas, lajitas dai kittas. Meid lugetas manitajikš, no mö pagižem tot.

⁹ Mö olem tundmatomad, no meid tunttas hüvin; mö olem surman kündusel, no eläm; meid surmitadas, no mö olem völ hengiš;

¹⁰ meid abidoittas, no mö olem kaiken ihastusiš. Olem gol՚l՚ad, no äjid tegem bohatoikš. Meil ei ole nimidä, no kaik om meiden.

¹¹ Korinfalaižed, mö pagižem teile kohtha, meiden südäimed oma avoin,

¹² sigä om sijad teile-ki, a teiden südäimed oma ahthad.

¹³ Tehkat kut mö – pagižen teile kut ičein lapsile – avaikat meile ičetoi südäimed!

Eläban Jumalan kodi

¹⁴ Algat antkoi val՚l՚astada ičtatoi ühtes uskmatomidenke. Midä tehta ühtes oiktale da värale? Midä ühthišt om pimedal da päivänvauktal?

¹⁵ Voiba-k Hristosal da Veliaral olda ühtejiččed meled? Mi ühtenzoitab uskojad da uskmatont?

¹⁶ Mitte kožmuz voib olda Jumalan pühäkodin da tühjiden jumaloiden keskes? Ved՚ tö olet eläban Jumalan kodi, kut Jumal om sanunu: – Minä sijadamoi rahvahan keskhe, minä eläškanden heidenke. Minä tegemoi heiden Jumalaks, a hö – minun rahvahaks.

¹⁷ Sikš: – Lähtkat heidennopäi, erigakat heišpäi – sanub Ižand – algat koskkoi nimidä paganad, sid՚ minä otan teid ičeinnoks.

¹⁸ Minä linnen teiden Tatan, a tö – minun poigin da tütrin. Ninga sanub Ižand, Kaikenvaldaine.