Toine kirjeine korinfalaižile 3 - Uz' Zavet

Uden kožmusen korged arv

¹ Kitäškandem-ik möst ičtamoi? Jose meile-ki, kut erasile toižile, pidab kitändkirjeižid teile antta vai teišpäi sada?

² Tö iče olet meiden kitändkirjeine, kudamb om kirjutadud meiden südäimihe, sen voiba kaik nägištada da lugeda.

³ Kaikile om sel՚ged: tö olet Hristosan kirjeine. Se om kirjutadud meil tehtud radol, ei černilal, a eläban Jumalan Hengel, ei kiviteraha, a südäimihe.

⁴ Mugoine uskond Jumalaha om meiš Hristosan kal՚t.

⁵ Em sanugoi, miše mö ičesamoi voižim meletada miš-ni, i miše mi-se tuliži meišpäi. Kaik meiden mahtod oma tulnuded Jumalaspäi.

⁶ Hän om se, kudamb tegi meid mugoižikš, miše mö sättuižim radho uden kožmusen täht. Sen kožmusen päazj ei ole kirjam, kirjutadud käskišt, a Heng, sikš ku käskišt tob surman, a Heng andab elon.

⁷ Nece kiviteraha kirjutadud käskišt tuli mugoižen korktan arvonke, miše izrail՚aižed ei voinugoi kacta Moisejan hoštajaha modho, hot՚ se hoštotez oli jo kadomas. Ku surman kandajan käskišton rad tuli mugoižen korktan arvonke,

⁸ ka völ korktemban arvonke tuleb Hengen rad!

⁹ I ku sudindrad tuli korktan arvonke, ka völ korktemban arvonke tuleb tozioiktusen rad.

¹⁰ Sen korktan arvon hoštotez om mugoine agjatoi, ka sen rindal pimeneb se, mišpäi edel lähtli hoštotez.

¹¹ Ku se-ki, mi kadob, tuli korktan arvonke, ka völ korktemban arvonke tuleb se, mi ei kado.

¹² I ku meil om mugoine nadei, ka mö olem rohktad,

¹³ a ei kut Moisei, kudamb peiti modon paikal, miše izrail՚aižed ei nägiži hänen modon hoštotesen kadondad.

¹⁴ No heiden mel՚ om sogenzoittud. Mugoine paik om heiden sil՚miš völ nügüd՚-ki, konz lugedas vanhan kožmusen kirjutusid. Nece paik om heitmata, sikš miše vaiše Hristos voib heitta sen.

¹⁵ Völ nügüd՚-ki heiden südäimiden päl om paik, konz hö lugeba Moisejan kirjutusid.

¹⁶ No konz heiden südäimed käraudasoiš Ižandan polhe, paik heittas.

¹⁷ Ižand om Heng, i kus Ižandan Heng om, sigä om vald.

¹⁸ Mö kaik avaitud modol kacum Ižandan korktan arvon hoštoteshe kut zirkloho, vajehtamoiš hänen karččikš, hoštajikš, i nece hoštotez vaiše ližaneb meiš. Sidä tegeb Ižand, kudamb om Heng.