Toine kirjeine korinfalaižile 2 - Uz' Zavet

¹ Sikš pätin, miše minun tulend necil kerdal ei toiži pahad mel՚t.

² Ku minä abidoičen teid, siloi ken voiži ihastoitta mindai, ku ei se, kenele minä tegin abidoid.

³ I sikš-se minä kirjutin sen kirjeižen, miše konz tulen sinna, ka en oliži abidahine neniden päle, kudambiden täht minei pidaiži olda hüväs meles. Lujas uskoin, miše minun hüvä mel՚ om kaikiden teiden-ki hüvä mel՚.

⁴ Kirjutin teile kibu henges, tusk südäimes da kündled sil՚miš, no ei sen täht, miše abidoitta teid, a miše tedaižit: minä lujas äjan armastan teid.

Pästkat grähkäd

⁵ A ku ken-se abidoiči mindai, ka hän abidoiči ei vaiše mindai, a teid kaikid – hot՚ kut-se, en minä enamba ližadele.

⁶ Mugoižele täudub sidä školindand, kudambad hän sai teišpäi.

⁷ Nügüd՚ oliži paremba, ku tö prostižit händast da tugedaižit, miše lujas sur՚ abid ei söiži händast.

⁸ Sikš, olgat hüväd, ozutagat hänele ičetoi armastust.

⁹ Sikš minä teile kirjutin-ki necen kirjeižen, miše kodvda teiden mel՚t da tedištada, olet-ik tö kaikes kundlijaižed.

¹⁰ Kenel tö pästat grähkid, sil minä-ki pästan, i ku olen pästnu – ku sille pidaiži-ki pästta midä-ni – olen tehnu necen teiden täht Hristosan edes,

¹¹ miše soton ei voiži meid vägestada. Hänen meled mö tedam.

Pavlan holed Troadan lidnas

¹² Läksin sid՚ sanelemha hüväd vestid Troadaha, sigä Ižand avaiži minei verajan radon täht.

¹³ No minun heng ei olend ičeze sijal, sikš ku en löudand sigä Tit-velled, i sikš sanuin uskondkundale «kaiked hüväd» i jatksin matkan Makedoniaha.

¹⁴ Olgha kittud Jumal, kudamb kaiken vedäb meid Hristosas kut praznikparadal edehepäi i meiden kal՚t levitab kaikjale tedoid Hristosan polhe, kut hüväd haižut.

¹⁵ Mö olem Hristosan hüvä haižut, kudamb tuleb Jumalan edehe. Necidä haižut voiba tundištada nene, ked päzuba, dai nene, ked kadoba.

¹⁶ Erasile se om paha haižut – se tuleb surmaspäi i veb surmha. Toižile se om hüvä – se tuleb elospäi i veb eloho. No ken neche töhö kožub?

¹⁷ Mö em olgoi kaiken-se kut ned äjad, kudambad traviba Jumalan sanad torguindal. Ka ei! Mö sanelem puhthal südäimel, meiden sana om Jumalaspäi, mö Hristosas sanelem sidä Jumalan edes.