Toine kirjeine korinfalaižile 11 - Uz' Zavet

Pavel i ned, ked oma heitnus apostoloikš

¹ Voi, ku tö voižit tirpta mindai, miše minä olen vähäižel kuti meletoi! Ka tö jo tirpat.

² Minä varjoičen teid, kut tat varjoičeb ičeze tütärt, Jumalan täht. Minä olen toivotanu teid vaiše ühtele mehele, Hristosale, i tahtoižin toda teid hänen edehe kuti puhthan nevestan.

³ No varaidan: kut mado kelhas maniti Evan, muga teiden-ki mel՚ traviše, i tö jät puhthita südäimita Hristosan edehe.

⁴ Ku ken-se tuleb i saneleškandeb teile toižes Iisusas, kudambas mö em sanelnugoi, vai toižes henges, kudambad tö et otnugoi, vai toižes hüväs vestiš, kudambad tö et sanugoi, ka ved՚ tö kaiken necen hüvin-ki tirpat!

⁵ No üks՚kaik minä lugen, miše en ole hondomb nenid muga sanutud surid apostoloid!

⁶ Voib olda, minä en mahta hüvin pagišta, no minä tedan äjan. Dai mö kaikes olem teile ani tetabad.

⁷ A voib olda minun grähk om täs: minä olen alenzoitnu ičtain, miše pidäda teid korktembas arvos, i paukata olen sanelnu teile hüväd vestid?

⁸ Toižiš uskondkundišpäi minä kuti vargastelin, konz sain dengoid heišpäi, miše abutada teile.

⁹ Oldes teidenno minä nikeda en mokičend, hot՚ elin mairhes. Midä minei tarbiž, sidä minei andoiba uskondvelled, konz tuliba Makedoniaspäi. Minä en tahtoind eläda teiden niškal, i edeleze-ki en tahtoi.

¹⁰ Hristosan todel, kudamb eläb minus, sanun: minun korktad mel՚t niken ei voi anastada kaikes Ahaijan mas!

¹¹ Mikš muga? Jose en armasta teid? Jumal tedab, minä armastan teid! Midä minä nügüd՚ tegen, sidä tegeškanden edeleze-ki.

¹² Minä en anda süd toižile ülendeldas, miše hö tegeba ičeze radod ningažo, kut mö-ki.

¹³ Nene mehed oma värad apostolad, manitajad radajad; hö vaiše heitäsoiš Hristosan apostoloikš.

¹⁴ Ka ved՚ nece ei ole čud. Iče soton-ki heitäse päivänvauktan angelaks.

¹⁵ Ka siš ei ole nimidä, miše sotonan käskabunikad heitäsoiš Jumalan azjan tegijoikš. Heiden lop linneb heiden tegoiden mödhe.

Pavlan gor՚ad

¹⁶ Sanun völ kerdan: algat pidägoi mindai meletoman. A hot՚ oližin-ki meletoi, sikš antkat minei vald olda mugoižen, miše voižin minä-ki vähäižen baffalidas.

¹⁷ Midä minä nügüd՚ baffalides sanun – ka se ei ole Ižandaspäi. Pagižen kuti meletoi.

¹⁸ Ku neciš mirus äjan baffališoiš, ka minä-ki zavodin baffalidas.

¹⁹ Ved՚ tö tahtonke tirpat meletomid – tö, ked iče olet melevad.

²⁰ Ved՚ tö tirpat, konz teid val՚l՚astadas, anastadas kaiken, polgetadas, alenzoittas da anttas korvha.

²¹ Om huiged, no sanun, miše sihe meil ei täudund väged. No ku toižed rohtiba tehta sidä – minä pagižen sid՚ kut meletoi – rohtin minä-ki.

²² Oma-k hö evrejalaižed? Ka minä-ki. Izrail՚aižed-ik? Ka minä-ki. Oma-k Avraaman semnespäi? Ka ved՚ minä-ki!

²³ Oma-k hö Hristosan käskabunikad? A minä völ enamba heid olen Hristosan käskabunik – pagižen ninga kut meletoi. Minä völ enamban mokičin ičtain radol, mi hö, enamban ištuin türmas, mindai lödihe ülimärašti, äi kerdoid olin surman kündusel.

²⁴ Viž kerdad sain evrejalaižišpäi pletil nel՚l՚kümne iškud üht lugemata,

²⁵ koume kerdad mindai löiba palikoil rimalaižed, kerdan minuhu tactihe kivil, koume kerdad olin laivas, kudamb upsi, i mindai tacli aldoiš kogonaižen ön da päivän.

²⁶ Minä kaiken aigan olin matkoiš, kaiken aigan olin läz surmad: voinuižin upota jogihe, voinuižin putta razbainikoiden käzihe, minei pidi varaita ičein man eläjid dai verazmaižid, pidi varaita lidnoiš da rahvahatomiš tahoiš, varaita merel, varaita nenid, ked heitäsoiš uskondvellikš.

²⁷ Äjan radoin da nägin gor՚ad, paksus olin magadamata, tirpoin sömän- da jomannäl՚gäd, pühütin paksus, elin vilus da alasti.

²⁸ Kaiken necen ližaks minai oli kaikuččen päivän hol՚ uskondkundiš.

²⁹ Ku ken-ni om vägetoi, ka minä-ki olen vägetoi. Ku ken-se lankteb grähkähä, ka se poltab mindai.

³⁰ Ku pidaškandeb mil-ni baffalidas, ka baffalimoi ičein vägetomudel.

³¹ Meiden Ižandan Iisusan Hristosan Jumal dai Tat – olgha hän kittud igän – tedab, miše minä en kelasta.

³² Damaskas Areta-kunigahal pandud pämez՚ käski varjoita damaskalašt lidnad, miše tabata mindai, a mindai lasketihe maha iknaspäi puzus lidnan seinädme, i muga minä pagenin hänen käzišpäi.