Ezmäine kirjeine fessalonikalaižile 4 - Uz' Zavet

Elo Jumalan tahton mödhe

¹ Sid՚ völ, velled! Tö olet tedištanuded meišpäi, kut pidab eläda, miše olda mel՚he Jumalale. No Hristosan Iisusan nimes mö lujas pakičem teid tehtas parembikš völ enamba.

² Ved՚ tö tedat, miččid käsköid Ižandan Iisusan nimes mö olem teile andnuded.

³ Jumalan taht om siš, miše tö tegižitoiš pühembikš. Varaikat vedelust!

⁴ Kaikuččele teišpäi tarbiž opetas pidämaha ičetoi hibjad pühän i korktas arvos.

⁵ Algat antkoi sidä hibjaližen himon valdha, kut tegeba ned, kudambad ei tuntkoi Jumalad.

⁶ Nikenele ei pida tehta pahad uskondvellele neciš azjas i manitada händast, sikš ku Ižand vahvas opendab kaikes siš. Necen polhe mö olem teile ende sanunuded i todištanuded.

⁷ Ved՚ Jumal kucui meid elämaha ei grähkhišt, a pühäd elod.

⁸ Sikš ken käraudase sel՚gäl sihe, ka ei käraute meheze, a käraudase sel՚gäl Jumalaha, kudamb om andnu meile Pühän Hengen.

⁹ Velliden armastuses ei tarbiž kirjutada teile, Jumal iče openzi teid armastamha toine tošt.

¹⁰ Tö ved՚ armastat uskondvellid kaikes Makedonias. No mö pakičem teid, velled, tehtas parembikš völ enamba.

¹¹ Pangat kaik vägi, miše eläda hilläšti, miše tehta ičetoi azjad i sada ičetoi leib, kut mö olem teile käsknuded-ki.

¹² Siloi teiden elo linneb vigatoman uskmatomiden-ki sil՚miš i teile ei pidaškande nimittušt abud toižilpäi.

Konz Ižand tuleb

¹³ En tahtoi, velled, jätta teid tedmata sidä, midä tegese kolnuzile, miše teil ei oliži pahad mel՚t surmas, kut toižil, kudambil ei ole nadejad.

¹⁴ Iisus om kolnu i eläbzunu kollijoišpäi, sihe mö uskom. Se ozutab, miše Jumal eläbzoitab Iisusan kartte nenid-ki, ked oma kolnuded uskojin.

¹⁵ Sanum teile sen, midä Ižand om sanunu: Mö, elos olijad, kudambad jäm tänna Ižandan tulendahasai, em ehtkoi edel kolnuzid.

¹⁶ Konz kuluškandeb käsk, ülembaižen angelan än՚ da tordaškandeb Jumalan torv, sid՚ iče Ižand laskeškase taivhaspäi, i ned, kudambad koliba Hristosaha uskojin, ezmäižin eläbzuba kollijoišpäi.

¹⁷ Sid՚ meid, kudambad olem elos, völ täl mal, ühtes heidenke tembaidaškatas i pil՚ves veškatas Ižandale vastha. Muga mö voiškandem olda kaiken Ižandanke.

¹⁸ Tüništoitkat toine tošt nenil sanoil.