Ezmäine kirjeine fessalonikalaižile 3 - Uz' Zavet

¹ Ka sid՚, ku em voinugoi enambad tirpta, pätim iče jäda Afinaha,

² a teidennoks oigenzim Timofejan. Hän om meiden vel՚l՚, Jumalan käskabunik i meiden radvel՚l՚ Hristosan hüvän vestin sanelendas. Hänele pidi vahvištada teid i ližata teile rohktust uskondas,

³ miše niken ei välleniži neniš ahtištusiš. Tö ved՚ tedat, miše muga om pandud meile meiden elos.

⁴ Konz mö olim teidenno, jo edelpäi sanuim, miše meil linneb ahtištusid. Muga om tehnus-ki, kut tö tedat.

⁵ Sid՚, ku en voind enambad tirpta, ka oigenzin Timofejan tedištamha teiden uskondas. Ved՚ varaižin, ei-ik manitai ole manitanu teid da ei-ik männugoi meiden radmokad uhtei.

⁶ Nügüd՚ Timofei om pördnus teidennopäi i tonu meile hüväd vestid teiden uskondas i armastuses. Hän starinoiči, miše tö johtutelet meid hüvil sanoil i tahtoit nägištada meid mugažo lujas, kut mö-ki teid.

⁷ Muga, velled, teiden uskond om ližadanu meihe rohktust necen ahtištusen i mokan aigan.

⁸ Nügüd՚ voim eläda edemba, ku tö püžut vahvas Jumalas.

⁹ Kutak voižim kitta Jumalad teiš i kaikes siš ihastuses, mitte om meil Jumalan edes teiden tagut!

¹⁰ Öd i päiväd mö loičem kaikes südäimespäi, miše voižim nägištada teid i ližata teile, midä ei täudu völ teiden uskondas.

¹¹ Iče Jumal, meiden Tat, da meiden Ižand Iisus Hristos tazoitagha te teidennoks.

¹² Ližadagha Ižand täudel märal teile armastust toine toižhe i kaikihe mehiže – muga, kut mö-ki armastam teid –

¹³ i vahvištagha teiden südäimed, miše ned oližiba pühäd da vigatomad meiden Jumalan i Tatan edes, konz meiden Ižand Iisus Hristos tuleb kaikiden hänen uskojidenke. Amin՚.