Ezmäine kirjeine korinfalaižile 8 - Uz' Zavet

Tühjile jumaloile todud liha

¹ Nügüd՚ pagižem tühjile jumaloile todud žertvlihas. Meil kaikil om tedoid necen polhe. No tedo tegeb meid ülendelijoikš, a armastuz sen vasthapäi – sauvob.

² Ku ken-se meletab, miše hän tedab midä-ni, ka hän völ ei teda muga, kut pidab teta.

³ No ku ken-se armastab Jumalad, ka händast Jumal tedab.

⁴ Tühjile jumaloile todud žertvlihan söndas sanun muga: mö tedam, miše tühjid jumaloid ei ole. Ei ole nimittušt tošt Jumalad, vaiše üks՚.

⁵ I hot՚ taivhas da mas om muga sanutud jumaloid – om-ki niid äi jumaloid da äi ižandoid –

⁶ no meil om vaiše üks՚ Jumal, Tat. Hänespäi om lähtnu kaik, i hänen täht mö olem. Meil om vaiše üks՚ Ižand, Iisus Hristos. Hänen kal՚t om kaik tehtud, i hänen kal՚t mö eläm.

⁷ No kaik sidä ei tekoi. Erased henges meletaba, miše tühjid jumaloid om, i södes lihad ei voigoi meletada miš-se toižes, a vaiše siš, kenele nece žertvliha om todud, i heiden heng, ku se om vähävägine, paganzub.

⁸ Vaiše sömine ei to meid lähemba Jumalannoks. Mö em kadotagoi nimidä, konz em sögoi, i em sagoi nimidä, konz söm.

⁹ No varaikat, miše nece teiden vald sömižen valičendas ei veiži hengel vähävägižid grähkähä.

¹⁰ Ku sinun vähävägine uskondvel՚l՚ nägeb, miše sinä, necen kaiken tedai, ištud sömäs tühjiden jumaloiden kodiš, ei-ik hänen heng sanu hänele, miše hän-ki voiži söda sidä žertvlihad?

¹¹ Muga sinun tedon tagut kadob se vähävägine uskondvel՚l՚, kudamban täht om kolnu Hristos.

¹² I ku muga tö teget grähkid vellid vasthapäi i satatat heiden vähävägišt henged, ka tö teget grähkid Hristosad vasthapäi.

¹³ I sikš: ku minun sömine veb minun velled grähkähä, ka minä igän en söškande lihad, miše ei veda minun velled grähkähä.