Ezmäine kirjeine korinfalaižile 6 - Uz' Zavet

Algat sudigoiš uskondvellenke

¹ Ku kenel-se teišpäi om ridazj toiženke, ka kut hän rohtib veda sidä uskmatoman sudjannoks? Mikš hän ei jäta, miše se suditas uskondkundas?

² Et-ik tö tekoi sidä, miše jumalanuskojad sudiškandeba mirun? Ku tö sudiškandet mirud, ka et-ik tö mahtkoi sudida nenid tühjid azjoid?

³ Et-ik tö tekoi, miše mö sudiškandem angeloid-ki? Midä sid՚ pagišta maižiš azjoiš!

⁴ No ku teil om ridoid miččiš-ni maižiš azjoiš, ka tö otat sudjikš mugoižid, kudambil uskondkundas ei ole nimittušt arvod.

⁵ Ei-ik teile ole huiged? Vai ei-ik ole teiden uskondkundas ni üht melevad, kudamb voiži sel՚genzoitta kahten vellen ridoid?

⁶ Vai paremb om, ku vel՚l՚ vellenke sudiše da völ uskmatomiden edes!

⁷ Jo se üks՚, miše tö suditoiš kesknetoi, huigenzoitab teid. Ei-ik oliži paremb tirpta värhut? Ei-ik paremb oliži tirpta, konz teil midä-ni anastadas?

⁸ A tö iče teget värhut i anastat toižil, eskai uskondvellil-ki.

⁹ Et-ik tö tekoi, miše värhuden tegijad ei päzugoi Jumalan valdkundaha? Algat segoikoi! Jumalan valdkundaha ei voigoi päzuda vedelused, tühjile jumaloile kumardelijad, verhiden akoidenke magadajad da gomomužikad,

¹⁰ vargastajad, ažlakod, jomarid, pahanpagižijad da anastajad.

¹¹ Mugoižin oliba erased teišpäi edel, no nügüd՚ tö olet pestud puhthikš da tehtud pühikš i tozioiktoikš meiden Ižandan Iisusan Hristosan nimes i meiden Jumalan Hengen vägel.

Mehen hibj om Pühän Hengen kodi

¹² «Minai om vald kaikehe, no ei ole kaik minei hüväks.» «Minai om vald kaikehe», no nimille ei pida antta valdad ičeze päl.

¹³ Söm՚ om vacan täht, a vac om sömän täht, vaiše Jumal rikob sen i necen. Hibj ei ole vedeluzazjoiden täht, a Jumalan täht, a Jumal – hibjan täht.

¹⁴ Jumal om eläbzoitnu Ižandan i ičeze vägel eläbzoitab meid-ki.

¹⁵ Et-ik tö tekoi, miše teiden hibjad oma Hristosan hibjan palaižed? A ku otaižin Hristosan hibjan palaižen da tartutaižin vedelusen hibjaha? Ka nikonz!

¹⁶ Ved՚ tö tedat, ken tartub vedelusehe, ka tegese hänenke ühteks hibjaks. Ved՚ om sanutud: «Nene kaks՚ tegesoiš ühteks hibjaks.»

¹⁷ No ken ühtneb Ižandaha, ka om üks՚ heng hänenke.

¹⁸ Čurakatoiš vedeluzazjoid! Kaik toižed grähkäd, kudambid mez՚ tegeb, oma mehen hibjan irdpolel, a vedeluzelo om grähk ičeze hibjan vasthapäi.

¹⁹ Vai et-ik tö tekoi sidä, miše teiden hibj om Pühän Hengen kodi? Jumal om andnu necen Hengen, miše se eläiži teiš. Tö et ižandoitkoi iče ičtatoi,

²⁰ Jumal om ostnu teid korktal maksul. Ka sikš togat Jumalan korktad arvod sil՚mnägubale ičetoi hibjoiš i ičetoi hengiš, kudambad oma Jumalan.