Ezmäine kirjeine korinfalaižile 5 - Uz' Zavet

Vedeluzelon sudind

¹ Kaikjal pagištas, miše teiden keskes om vedelust, da völ mugošt, midä uskmatomiden keskes ei ole: eraz teišpäi eläb ičeze emindamanke.

² Tö völ surendeletoiš, a teile oliži olnu paremb voikta da küksta teiden keskespäi mehen, kudamb om tehnu kaiked mugošt.

³ Hot՚ mindai ei ole teiden keskes, no hengel minä olen teidenke, i minä kuti teidenke oldes olen jo sudinu sen, kudamb om tehnu mugošt.

⁴ Konz tö keradatoiš ühthe meiden Ižandan Iisusan Hristosan nimes, i teidenke sigä linneb minun-ki heng da meiden Ižandan Iisusan Hristosan vägi,

⁵ ka teile pidab antta nece mez՚ sotonale, miše kadoiži hänen hibj, a heng päzuiži meiden Ižandan Iisusan Hristosan tulendpäivän.

⁶ Tö teget hondoin, konz baffalitoiš. Et-ik tö tekoi, miše tippuine muigotest muigenzoitab kaiken taignan?

⁷ Puhtastagat kaik vanh muigotez, miše tö oližit uz՚ taigin. Tö olet-ki kuti resk taigin, sikš ku meiden Äipäivän Vodnaz, Hristos, om jo pututadud.

⁸ Em praznuičeškakoi Äipäivän praznikad vanhal kožutomal muigotesel – pahudes da grähkäs, a vedäm sidä reskal – puhthudes da todes.

⁹ Kirjutin jo teile kirjeižes, miše teil ei saiži olda nimiččid ühthižid azjoid vedeluzmehidenke.

¹⁰ En sanund necen mirun vedelusiš da ažlakoiš, anastajiš da tühjiden jumaloiden kumardelijoiš, sikš ku siloi teile pidaiži lähtta neciš miruspäi.

¹¹ A kirjutin sikš, miše tö et tegiži nimiččid ühthižid radoid senke, keda nimitadas velleks, a hän om vedeluzmez՚ da ažlak, tühjale jumalale kumardelii, nagrai, jomar՚ vai anastai. Eskai algat sögoi-ki mugoiženke.

^12-13 Ei ole minun azj sudida irdpoližid. Jumal sudib irdpoližid. No mikš tö et sudigoi nenid, ked oma teiden keskes? «Kükskat teiden keskespäi se, ken om paha.»