Ezmäine kirjeine korinfalaižile 3 - Uz' Zavet

Pavel om Jumalan radvel՚l՚

¹ Minä en voind pagišta muga teidenke, velled, kut pagištas hengeližiden mehidenke, a pagižin kut nenidenke, ked eläba necen mirun mödhe i oma Hristosan tedamižes völ kuti pened lapsed.

² Minä sötin teid maidol, a en koval sömäl; tö et olnugoi vaumhed sada sidä. Da nügüd՚-ki völ et olgoi,

³ sikš ku völ-ki elät, kut necen mirun rahvaz. Ku teil nügüd՚-ki om ičekesken kadehut, ridoid da erimeližut, siloi vanh elon vero eläb teiš, i tö iče elät, kut kaik rahvaz eläb.

⁴ Ku üks՚ sanub: «Minä olen Pavlan polel», toine: «Minä – Apollosan polel», et-ik tö olgoi, kut toižed-ki mehed?

⁵ Ken siloi Apollos om? Vai Pavel? Hö oma vaiše käskabunikad, kudambad toiba teid uskondaha, kaikutte tegi nenid azjoid, kudambid heile andoi Ižand.

⁶ Minä ištutin, Apollos valoi, a Jumal andoi kazvon.

⁷ Sid՚ ištutai ei ole niken, i valai ei ole niken, a Jumal, kazvon andai, om kaik.

⁸ Ištutai i valai oma siš-žo rados, no kaikutte sab paukan ičeze radon mödhe.

⁹ Mö olem Jumalan radvelled, a tö olet Jumalan pöud i Jumalan pert՚.

¹⁰ Minä Jumalan armoiš olen tehnus hüväks sauvojaks i olen tehnu pertin alandusen, kudambale ken-ni toine lendab pertin. No kaikutte kackaha, kut hän sauvob.

¹¹ Alanduz om jo tehtud, i se om Iisus Hristos. Tošt alandust niken ei voi tehta.

¹² Necile alandusele voib sauda midä-se kuldaspäi, hobedaspäi, kal՚hiš kivišpäi, puspäi, heinäspäi libo ol՚gespäi,

¹³ no ičeze aigan näguškandeb se, ken i midä om saunu. Sudanpäiv sidä avaidab: se päiv ozutase lämoinkeliš, i lämoi ozutab kaikuččen mehen radon, mitte se om.

¹⁴ Se, kenen pert՚ püžuškandeb, sab paukan.

¹⁵ Se, kenen pert՚ palab, kadotab sen. Iče hän päzub eloho, no kuti lämoiš läbi.

¹⁶ Et-ik tö tekoi, miše olet Jumalan pühäkodi i miše Jumalan Heng eläb teiš?

¹⁷ Ku ken-ni murendab sen Jumalan pühäkodin, ka Jumal murendab händast-ki. Jumalan kodi om pühä, i tö olet se kodi.

¹⁸ Algha niken manitagoi ičtaze. Ku ken-ni teišpäi meletab, miše hän om melev neciš mirus, ka hänele pidaiži olda meletoman, miše hän tegižihe melevaks.

¹⁹ Necen mirun melevuz՚ om Jumalan sil՚miš meletomuz՚. Ved՚ om kirjutadud: – Hän tabadab melevid heiden vällišpämeles.

²⁰ I mugažo: – Ižand tedab meleviden meled, hän lugeb ned tühjikš.

²¹ Sikš nikenele ei pida baffalidas mehil, ved՚ kaik om teiden:

²² Pavel, Apollos i Kifa, mir, elo i surm, kaik nügüdläine i tulii. Se kaik om teiden,

²³ no tö olet Hristosan, i Hristos om Jumalan.