Ezmäine kirjeine korinfalaižile 2 - Uz' Zavet

Pavel saneleb ristha nagloitud Hristosan polhe

¹ Konz tulin teidennoks, velled, ka en tulend sanelemha teile Jumalan todištuses suril da melevil sanoil.

² Teiden keskes oldes en tahtoind teta miš-ni toižes, vaiše Iisusas Hristosas, vaiše ristha nagloitud Hristosas.

³ Tö nägit mindai lujas välläks da sures varaidusespäi säraidajaks.

⁴ Minun paginoiden da hüvän vestin sanelendan vägi ei pohjištund melevudehe, a neniš paginoiš nägui Jumalan Hengen vägi,

⁵ miše teiden uskond oliži vahv ei mehen melevudespäi, a Jumalan vägespäi.

Mehiden melevuz՚ da Jumalan melevuz՚

⁶ Melevut mö sanelem nenile, ked oma sihe vaumhed, no em necen mirun melevut, em necen mirun valdanpidäjiden melevut, heiden, kudambad tegesoiš tuhkaks.

⁷ Mö sanelem Jumalan peitmelevut, kudamb om saubatud. No Jumal ezmässai om jo oigendanu sen meiden korktaks arvoks.

⁸ Sidä melevut ei ole el՚gendanu niken nügüdläižen mirun valdanpidäjišpäi. Ku olnuižiba el՚gendanuded, ka hö ei oliži nagloičenuded ristha taivhaližen hoštotesen Ižandad.

⁹ No kut om sanutud Pühiš Kirjutusiš: – Midä ei ole nähnu sil՚m, midä ei ole kulnu korv, midä ei ole el՚gendanu mez՚ ičeze südäimes, midä Jumal om vaumištanu nenile, ked armastaba händast,

¹⁰ sidä hän meile om avaidanu ičeze Hengel. Ved՚ Heng nägeb kaiken, Jumalan süvüded-ki.

¹¹ Ken voib teta, midä mehes om? Sen voib teta vaiše mehen heng, kudamb hänes om. Mugažo vaiše Jumalan Heng tedab, midä Jumalas om.

¹² Mö em olgoi sanuded necen mirun henged, a olem sanuded Hengen, kudamb om Jumalaspäi, miše voižim el՚geta, midä Jumal om lahjoičenu meile.

¹³ Siš mö sanum, no sanum Pühän Hengen opetud sanoil, a ei mehen melen anttud sanoil, sel՚genzoitam hengeližid azjoid Hengen abul.

¹⁴ Mehen mel՚ ei ota sidä, mi om tulnu Jumalan Hengespäi; hän sen sanub meletomudeks. Hän ei voi el՚geta sidä, sikš ku sidä pidab el՚geta Hengel.

¹⁵ Hengeline mez՚ voib el՚geta kaiken, no händast niken ei voi el՚geta.

¹⁶ – Kenak tundeb Ižandan mel՚t, miše voib nevoda hänele? No meil om Hristosan mel՚.