Ezmäine kirjeine korinfalaižile 16 - Uz' Zavet

Rahankeradand Jerusaliman ristituile

¹ Ku tö keradat rahad Jerusaliman uskojile, tehkat kaiken muga, kut olen nevonu Galatian uskondkundile:

² kaikuččen nedalin ezmäižel päiväl jogahine teišpäi pangha eriži sen verdan rahad, äjak hän voib, miše konz minä tulen, ka ei pidaiži kerata.

³ Sid՚ konz tulen, ka oigendan teiden valitud mehid Jerusalimha, miše hö ühtes minun kirjeižidenke veižiba teiden rahalahjan.

⁴ A ku pidaškandeb minei-ki lähtta sinna, ka hö lähteba ühtes minunke.

Miččid matkoid Pavel tahtoib tehta

⁵ Minä tulen teidennoks, konz mänen Makedonias läbi. Ved՚ minä tulen Makedonian kal՚t.

⁶ Voib olda, minä linnen teidenno kuverdan-se aigad, voib olda, tulen kaikeks tal՚veks, i tö abutat minei keratas toižhe matkaha.

⁷ En tahtoi čokaitas teidennoks nügüd՚, sikš ku nadeimoi, miše Makedoniaspäi tuldes minä voin olda teil hätkemba, ku Jumal andab.

⁸ A täs, Efesas, minä linnen Stroicanpäivhäsai,

⁹ sikš ku minei om levedas avaidanus verai plodukahaze radho, hot՚ om jo äi vastustajid-ki.

¹⁰ Ku tuleb teidennoks Timofei, kackat, miše hänele ei pidaiži sigä nimidä varaita. Hän tegeb Ižandan azjoid, kut minä-ki,

¹¹ sen täht algat hondostagoi händast. Kerakat händast tünäs matkaha, miše hän voiži pörtas minunnoks. Minä varastan händast tägä toižiden vellidenke.

¹² A midä koskeb Apollos-velled, ka minä lujas pakičin händast lähtmaha toižiden vellidenke teidennoks, no hän nikut ei tahtoind lähtta nügüd՚, a lähteb möhemba, konz linneb aigad.

Jäl՚gsanad da tervhutesed

¹³ Olgat herkhil, püžugat uskondas vahvas, olgat rohktad, olgat vägevad!

¹⁴ Kaik, midä tö teget, tehkat armastusenke!

¹⁵ Minai oliži völ pagin teile, velled. Tö tedat, Stefan i hänen kanz oma meiden radon ezmäine satuz Ahaijas, i hö oma tulnuded jumalanuskojiden aburadho.

¹⁶ A tö kundelkat heid i kaikid, ked radaba da tirpaba mokid ühtes heidenke.

¹⁷ Olen ihastusiš, miše Stefan, Fortunat da Ahaik oma tulnuded tänna. Hö oma minei teiden sijas.

¹⁸ Hö ližaziba minei i teile väged. Mugoižid mehid tarbiž pidäda korktas arvos.

¹⁹ Azian uskondkundad oigendaba teile tervhutesid. Akila i Priskilla i uskondkund, kudamb keradase heiden kodihe, mugažo oigendaba teile äi tervhutesid Ižandan nimes.

²⁰ Tervhutesid kaikiš vellišpäi. Toivotagat tervhut toine toižele pühäl tervehtusel.

²¹ Minä, Pavel, ičein kädel kirjutan teile tervhutesed.

²² Ken ei armasta Ižandad Iisusad Hristosad, sille olgha anafema. Maran afa! ‘Ižand tuleb!’

²³ Olgha teidenke meiden Ižandan Iisusan Hristosan armod!

²⁴ Olgha teidenke kaikidenke minun armastuz Hristosas Iisusas! Amin՚.