Luk 5 - Itang

Jizɔs ata ayɛghɛnɛv anav mahɛ

¹ Ihɔ igen Jizɔs aru utiren kɔ ukur uhǝng utan Genesaret, itsoghun urɛhɛ, mɔ iyɔr tsɛng vɛ gamber ghi ingban urɛhɛ Aonz.

² A ɛn utso ahar amban vɛru wayi hɔ ukur uhǝng hun, mɔ akɔrɔnɛv isu vɛ vond, vɛ ru ikiren itufu ivo.

³ Anɔr kɔ utso umɔm, ungwen aru una Samon, ne Jizɔs akaa Samon na, kpɛra ghɛ utso kɔ ijɔr kɛbere. Ne atɛma kɔ ghu utso hun akɔr ghi itɛsɛn iyɔr.

⁴ Mɔ abɛɛn aram, akaa ghɛ Samon na, “Naha kpɛra utso kɔ itong hin uker itufu, ɛn ukɔr isu.”

⁵ Samon arumun un na, “Uwun, ghi iyar imiye kpem usov vuse ghi ikɔr ukwagh gha. Ne mɔ ukaa, mɛ ker va.”

⁶ Mɔ akɛrɛn itufu hun, vɛ kɔr isu tsɛng itufu hun ikɔr ghi igiyaren.

⁷ Vɛ kovur amban vɛ ru kɔ utso ugen ungumɔ na, van hin uvu wan ɔs uvogh. Vɛ van mɔ vɛ kura isu iyiv utso ahar amem, utso ambumɔ vɛ hir imiren kɔ ijɔr.

⁸ Mɔ Samon Pita a ɛnɛn akaa angan mɔ, angure anu inya hɔ ishigh inagh Jizɔs, akaa na, “Yovum han ghi ishi, Aonz Uwun, mɛgwe ɔr ɔ ɛrɛn akaa abe!”

⁹ Itiyo ikaa, un ghɛ amban vɛru urɔng akondo avo iyɔr ghi isu ingin vɛ kɔr.

¹⁰ Ne Jɛm avo ghɛ Jon myem anav Zebedi, urong una Samon kpa ka kond avo iyɔr. Kpa Jizɔs aka ghɛ Samon na, “Ka chiya gha; hiye nyan ugɛma kɔrun iyɔr ɛn ki isu!”

¹¹ Mɔ vɛ gbɛgha utso kɔ ukur uhǝng vɛ avond akaa amem vɛ donda Jizɔs.

Jizɔs akos ɔr imand

¹² Mɔ Jizɔs aru kɔ ahiye ugen ɔr ghi imand ava tsɔ un. Mɔ a ɛnɛn ghi Jizɔs, ayav aku ghi ishigh inya ikɔrun uzɔ na, “Uwun, ghɛru awa isima uwow kosum hin mɛ ru riyang.”

¹³ Jizɔs anarɛr uvo aper un na, “Ka awa isima uwam. Shiya.” Kɛsmɛ mɔ imand una abe.

¹⁴ Kpa Jizɔs akaa ghu un na, “Ka ɔɔrɔyi ɔr gha. Za tes imɛnɛgh ikow kɔ Ɔr ipɛɛn una Aonz. Zayi urongu ghu unagh ipɛn ɛn mɔ vɛ angɛr kɔ Mɛnna Mosis, ɛn utagh avo na ushiya.”

¹⁵ Kas ɛn mɔ Jizɔs atah un uchin kpa, urɛ una Jizɔs asoor isamberen, ne iyɔr tsɛng vɛ va imgban urɛhɛ una, ashigh akos avo kɔ awen avo.

¹⁶ Kpa Jizɔs aduwe, ɛn mɔ aduweyi ker-ker ayov kɔ vɛ tim gha iza iramen ghu Aonz.

Jizɔs akos ɔr usugwe

¹⁷ Ihɔ igen mɔ Jizɔs atɛsɛyi, Ufarasi agenɛv avo ghɛ atɛsɛnɛv mɛnna anav Mosis vɛ tɛma kpembere ghu un. Amban vɛ duwe kɔ ahiye Galili ghɛ Judiya ghɛ Jerusalɛm. Ne ikɔw una Aonz Uwun aru kɔ ghɛ ana shisha ukosun awenɛv.

¹⁸ Iyɔr agenɛv vɛ teng ɔr usugwe ghu ubutu. Vɛ nɔngɔyi unɔr kɔ ghi itumbɛ imin ɛn vɛ gbir un hɔ Jizɔs aru mɔ,

¹⁹ Ne vɛ kan gha itiyo ikaa iyɔr ikar avo. Ne vɛ ɛndiye ghu un kɔ itumbɛ isa vɛ bugh uhav itumbɛ hun vɛ sen ghu un kɔ tiyev kɔ atɛ iyɔro hɔ Jizɔs aru mɔ.

²⁰ Jizɔs a ɛnɛn isima ibɛrɛn ivo, akaa na, “Nombos, mɛ guwe akaa abe awow.”

²¹ Kpa Ufarasi ghɛ atɛsɛnɛv mɛnna Ujus vɛ kaa arend, “Ka ana aru un sɛ ahoon Aonz mana? Aonz tas ne abe a guwe akaa abe gha?”

²² Jizɔs afɔn ukwagh ungwen vɛru ghi imburun kɔ asɛma, ne apine avo na, “Kine umbun ghi imburun akaa angan kɔ asɛma?

²³ Kine ingi tɔndugɔ, kɛna mɛ kaa na ‘Mɛ guwe akaa abe a wow,’ ne ayur un imgban hini ‘Mɔisa hin uzende’?

²⁴ Mkaa mɔ sɛ ufɔn na Uwan Ɔro kpa angwe ghi ikɔw han itar iyɔro ungwen a guwe akaa abe iyɔro.” Ne akaa ɔr usugwe hun, “Mɔisa teng ubutu uwow yov kɔ ghɛ itumbɛ!”

²⁵ Kɛsmɛ, ɛnmɔ iyɔr vɛru ɛnɛn amɔisa atɛng ubutu una, ghi iyovon kɔ itumbɛ usighan Aonz.

²⁶ Avo amem ghɛtser avo shisha. Ghɛ utsɛrɛnɛv vɛ sigha Aonz ukaa na, “Ghi ɛn inyan ukwagh utsɛrɛn!”

Jizɔs ata Lɛvi

²⁷ Keshi bemɛyi Jizɔs aduwe kɔ uwen mɔ, a ɛn ɔr ɔzun ukpanɛv ungwen vɛ tayi na Lɛvi atɛma ghi ahiye una ɔzun ukpanɛv. Jizɔs akaa ghɛ un na, “Dondam.”

²⁸ Lɛvi amo-isa, avond akaa amem adonda un.

²⁹ Ne Lɛvi ayɔr Jizɔs uyor kɔ itumbɛ ina ɛn ujin una utaan. Vɛ ɔzunɛv ukpanɛv agenɛv tsɛng avo iyɔr agenɛv vɛ ya urong.

³⁰ Kpa Ufarasi ghɛ atɛsɛnɛv mɛnna Ujus amban vɛru urongu Ufarasi vɛ hir ghi ihingnɛn kɔ ayɛghɛnɛv anav Jizɔs. Vɛ pine na, “Kɛ nan sɛ umbun ghi iyan ukwagh uyan ghɛ vɛ ɔzunɛv ukpanɛv ghɛ iyɔr abev ambana?”

³¹ Jizɔs arumun avo na, “Amban amba makun vɛ ker ɔr ukosun gha, awenɛv ne amba akeren.

³² Mva ghi itan amban amba gbɛngang gha, Kpa ki iyɔr abev na vɛ agɛma asɛma vɛ de akaa abe.”

Iyɔr vɛ pine Jizɔs ukwagh uyan uhɔrun

³³ Vɛ akaa ghu un na, “Ayɛghɛnɛv anav Jon ghɛ ayɛghɛnɛv anav Ufarasi amba uhɔrun ukwagh uyan ghɛ uramen ghu Aonz ahɔ agen, kpa ayɛghɛnɛv avo amba ghi iyan uman.”

³⁴ Jizɔs arumun ghɛ avo na, “Un umbu ukaan iyɔr amban ɔr ɔ ɔzun ukwas arav, hin vɛ hɔr ukwagh uyan kpɛ ungwen angwe ghɛ avo?

³⁵ Kpa ihɔ ingin ɔr ɔzun ukwas aru gha, ta vɛ hɔr ukwagh uyan.”

³⁶ Jizɔs atuwa avo va ikan ingin, “Ɔr umɔm angwe ungwen abe tɔnd ikond ihɛgh akura itse gha, itiyo ikaa uvihi ikond ihɛ ingimɔ ivur ikond ihɛ ingimɔ ika zwan ghɛ itse ingimɔ gha.

³⁷ Ne ɔr umɔm ahan masɔrum mhɛm ghi ikagh itsegh gha, ɔ ɛn a ɛr mɔ ikɔw masɔrum mhɛm ambumɔ mbure ikagh hun, masɔrum ambumɔ mɛha ghi inya. .

³⁸ Kpa masɔrum mhɛm amba ahan kɔ ghi ikagh ihɛgh.

³⁹ Ɔr ungwen avandin iman masɔrum mɛtsem aka rumun uman mhɛm gha akaa na, ‘Mtsem ne mɛ hɛmba ghi ishiyan.’ ”