Luk 24 - Itang

Jizɔs a rɛr kɔ uku

¹ Ihɔ mahɛ ghu raadi, utur-utur, akasɛv hun vɛ teng iir ihuman ishighan ingin vɛ ɛr mɔ, uyovon kɔ uwar.

² Vɛ ɛnmɔ ingon ingin iku uwar mɔ ghiru amɛngɛr upav kɔ,

³ kpa vɛ nɔr, vɛ ker ikum ina Uwun Jizɔs gha.

⁴ Mɔ vɛru ghi yingan, Kɛsmɛ iyɔr ahar atire avo ghi ihan, akond avo a aam ɛn irimɛgh.

⁵ Ghu uchiyagh akasɛv hun vɛ shir itogh inya, ne iyɔr hun vɛ kaa ghɛ avo na, “Aka nan sɛ umbun ikeren ɔr umuwa kɔ akponovɔ?

⁶ Angwe han gha; a rɛr! Umburun ukwagh ɔɔrun una, mɔ aru ghu un kɔ Galili na.

⁷ ‘Ɛr vɛ ana Uwan Ɔro kɔ avo iyɔr abev, vɛ mand un ta ihɔ utar a rɛr.’ ”

⁸ Ne vɛ umbur amuu ana.

⁹ Mɔ vɛ hire kɔ uwar, vɛ ɔɔr ayɛghɛnɛv amban atsuwa puwɛ umɔm ghɛ agenɛv akaa amem angan a ɛr.

¹⁰ Mɛri Madalin, Jowana, Mɛri ungɔ una Jɛm, ghɛ agenɛv amban vɛru urong, avo ne vɛ ɔɔr ayɛghɛnɛv amban atsuwa akaa angan.

¹¹ Kpa vɛ na akasɛv ambumɔ isima ibɛrɛn gha, ukwagh ɔɔrun uvo aru avo itiyo ikaa gha.

¹² Pita, amugh, ayots aza kɔ uwar hun. Mɔ ashir a ɛn ken a ɛn akond angan vɛ kang un aru agbir wayi, ne ayov, ghi iyinghan ukwagh ungwen a ɛr mɔ.

Jizɔs ava kɔ ayɛghɛnɛv anav ahar ghi ihang izan kɔ Emawas

¹³ Ihɔ ingimɔ ayɛghɛnɛv anav ahar, vɛru ghi izan kɔ ahiye ungwen vɛ tayi na Emawas. Hiye hɔ Jerusalɛm uzend inimba itsindar tsar-umɔm tegh-tegh sɛ unɔr Emawas.

¹⁴ Vɛru ghi ramen ghɛ arend akaa amem angan a ɛr mɔ.

¹⁵ Mɔ vɛru ghi iramen ghɛ arend, Jizɔs ava aru ghi zenden ghɛ avo;

¹⁶ Kpa vɛru imoɔr, ase avo abugh ɛn vɛ fɔ un gha.

¹⁷ Apine avo, “Kine umbun ghi iramen uzenden ghɛ arend ihanga?” Vɛ tire zungong, ghi ishon.

¹⁸ Ɔr umɔm kɔ avo, ungwen vɛ tayi na, Kolopas, apine un, “Aka ɛn ku uwɛ tas ne ungwe ɔr uzend han Jerusalɛm ungwen ufɔ akaa angan a ɛr ken ahɔ angan gha?”

¹⁹ Ne Jizɔs apine avo, “Kine akaa?” Vɛ rumun, “Ukwagh una Jizɔs Ɔr Nazarɛ. Aru Ɔr uramen ɛchi Aonz, amuu ana ghɛ a ɛrɛn ana aru ghi ikɔw kɔ ase Aonz ghɛ ase iyɔr amem.

²⁰ Ataanɛv kɔ apɛɛnɛv anav Aonz ghɛ ataanɛv avasɛv vɛ na un na vɛ wuwa, ghɛ umanden un kɔ Itsingan ukon.

²¹ Ungwen ghiru ghi isima ibɛrɛn na un ne ar Izrɛl. Ne aka nyan ihɔ ghu utar mɔ akaa angan a ɛr.

²² Ghu sorun ukwagh hun, akasɛv amban kɔ atɛ uwaas vɛ va ɔɔr ɔs akaa atsɛrɛn. Vɛ za kɔ uwar nyan utur

²³ kpa vɛ ɛn ikɔm ina gha. Vɛ va ɔɔr ghu ɔs na va ɛn vudugɛr anav Aonz, amban vɛ kaa na angwe umuwa.

²⁴ Ne urong aas agenɛv vɛ za kɔ uwar hun vɛ ɛn ghɛru ɛnmɔ akasɛv hun vɛ kaa mɔ, kpa un vɛ ɛn ghɛ ana gha.”

²⁵ Ne Jizɔs akaa avo na, “Nan urannɛn ukwagh man, umbun fafa ghi isima ibɛrɛn ghɛ akaa amem angan aramenɛv ɛchi Aonz vɛ kaa gha!

²⁶ Kagba akan Ɔr tsɛghan una Aonz aya ichan ghɛ akaa angan sɛ anɔr kɔ utorov unav gha?”

²⁷ Akɔr ghi ɔɔrun avo akaa angan vɛ angɛr ghɛ ana kɔ ikaa Aonz amem tra Mosis kpem kɔ aramenɛv ɛchi Aonz amem.

²⁸ Mɔ vɛ kpember unɔrun hɔ ahiye ungwen vɛ zayi mɔ, Jizɔs a ɛr ɛn aza ghi ishi ghɛ uzend.

²⁹ Kpa vɛ kɔr uzɔ ghu un na, “Tsa ghu ɔs, imiye ingi kɔrun, ihɔ ingin ibɛ.” Ne anɔr ghɛ avo.

³⁰ Mɔ atɛma ghi iyan ghɛ avo, atɛng ubrɛd, ana isighan kɔ Aonz apav ana avo.

³¹ Kpɛ ungumɔ ase avo abugh afɔ un, ne amugh ghɛ ahumbɛ.

³² Vɛ pine arend, “Tam tsɛngha man ne ghɛru ɔs ghi shiyan kɔ asama tsɛng, mɔ aramayi ghu ɔs ghi ihang ungwen a ɔɔrɔyi ɔs akaa kɔ ghu ukaa Aonz gha?”

³³ Vɛ mugh vɛ hire kɔ Jerusalɛm. Ken ne vɛ atsɔ ayɛghɛnɛv puwɛ-umɔm ghɛ amban vɛru ghɛ avo vɛ zwang urong.

³⁴ Vɛru ghi ikaan na, “Ghu ukɔng! Uwun a rɛr aduwe kɔ ghu Samon.”

³⁵ Ne vɛ ayɛghɛnɛv ahar hun vɛ ɔɔr avo, ukwagh ungwen a ɛr ghɛ avo ghi ihang, ghɛ mɔ vɛ afɔ un ukpɛ ungwen apav ubrɛd mɔ.

Jizɔs aduwe kɔ ayɛghɛnɛv anav

³⁶ Mɔ vɛru ghi ramen akaa angan, Jizɔs ava tire ghɛ avo ne akaa na, “Makun aru ghu un.”

³⁷ Ketsɛrɛ avo, vɛ ɛn na kɛ ajingɛjing ɔr ukpon.

³⁸ Jizɔs akaa ghɛ avo, “Kine asɛma ata un ukpo mana, kine umbun ghi iyingan kɔ ghɛ asɛma?

³⁹ Ɛnɛn sɛ avo aam ghɛ avor aam, ku mwe nan! Pɛrɛm sɛ hin ɛnɛn; ajingɛjing ghɛ run inyam iyɔro ghɛ akuhe gha, ɛn ghu ɛn mɛgwe ghɛ aa man.”

⁴⁰ Mɔ aramayi Jizɔs atɛs avo avo ana ghɛ avor ana.

⁴¹ Kas mɔ vɛ na isima ibɛrɛn gha ɛchi kashiya avo tsɛng, Jizɔs apine avo, “Umbun ghu ukwagh uyana?”

⁴² Vɛ na un isu ghi igbangnɛn,

⁴³ Ne a ɔz aya isu hun mɔ ayɛghɛnɛv vɛru ghi ɛnɛn.

⁴⁴ Jizɔs akaa ghɛ avo na, “Akaa angan ne mɛ ɔɔrɔyi un mɔ mɛruyi ghu un: Akaa angan amem a ɛr kpɛɛ ɛn vɛ angɛr ghɛ amwe kɔ Mɛnna una Mosis, ghɛ uka aramenɛv ɛchi Aonz ghɛ uka achama.”

⁴⁵ Ne Jizɔs abugh avo asɛma ɛnmɔ vɛru ghu ukwagh ufɔn ghu ikaa Aonz.

⁴⁶ Jizɔs akaa avo, “Ukwagh ungwen vɛ angɛr nan: Ɔr tsɛghan una Aonz aya ichan, akpo, ihɔ utar a rɛr kɔ uku.

⁴⁷ Ta ki itiye ina ne vɛ tire ta vɛ tsogh utar umuwem, ugɛman asɛma ɛn Aonz aguwe akaa abe avo, uhiyen kɔ Jerusalɛm.

⁴⁸ Un umbun ishiyada ghɛ akaa angan.

⁴⁹ Ɛr mɛ tind un Ajingɛjing Aonz ungwen Aonz Utir uwam atɔnd uzɔ. Kpa run kɔ Jerusalɛm kpem Aonz ana un ikɔw.”

Jizɔs akɔnd kɔ Aonz

⁵⁰ Mɔ Jizɔs aduwe ghɛ avo vɛ nɔr kɔ Bɛtani, akond ɛvo ana kɔisa ana avo ibɛrɛn.

⁵¹ Mɔ aruyi ghi nan avo ibɛrɛn, Aonz a ɔz un kɔisa avond avo.

⁵² Ne vɛ tugh un, vɛ hire kɔ Jerusalɛm ghi isighan shisha.

⁵³ Vɛru kɔ itumbɛ Aonz kpem, usighan Aonz.