Luk 23 - Itang

Ataanɛv jus vɛ ram ghu Jizɔs kɔ ishigh inagh Unom Palɛt

¹ Ne isum iyɔro ingimɔ vɛ mugh vɛ za ghu un kɔ Palɛt.

² Ne vɛ kɔr ghi iramen ghɛ ana, na, “Ɔr ungwen ava ghɛ mpav kɔ iyɔr avasɛv. Akaan ghi iyɔr na, vɛ akaa taayi ukpanɛv kɔ unom Siza gha ghɛ ukaan na un ne angwe Ɔr tsɛghan una Aonz, ghɛ Utor uwas.”

³ Ne Palɛt apine Jizɔs, “Uwɛ ne ungwe utor una iyɔr Ujus?” Jizɔs arumun, “Uwɛ ne ukaa mɔ.”

⁴ Ne Palɛt akaa ataanɛv kɔ apɛɛnɛv anav Aonz ghɛ isum iyɔr hun, “Mɛ ɛn itiyo ikaa ingin mɛ na ɔr ungwen ibɛgh gha.”

⁵ Kpa vɛ kpɛra, “Awan iyɔr isima itarɛn ghɛ itɛsɛn ina kɔ utar Judiya umuwem. Ahiye kɔ ahiye Galili kpem ne anɔr han Jerusalɛm.”

Palɛt atind Jizɔs kɔ utor Hɛrɔd

⁶ Mɔ Palɛt amgban mɔ, Palɛt apine umgba ɔr hun angwe ku ɔr Galili.

⁷ Mɔ Palɛt afɔn na Jizɔs angwe ku ɔr Galili ahiye ungwen Hɛrɔd angwe utor mɔ, atind un kɔ ghɛ Hɛrɔd, kpa ukpɛ ungumɔ Hɛrɔd aru kɔ Jerusalɛm.

⁸ Mɔ Hɛrɔd a ɛnɛn Jizɔs, kɛ shiya un kaka, itiyo ikaa akɛrɛyi ungwen a ɛn ghɛ ana ghɛ ghu ɛnɛn akaa akondon iyɔr angan amgba ghɛ ana. Aker ɔ ɛnɛn ɛnmɔ a ɛr ukwagh ukondon iyɔr.

⁹ Hɛrɔd apine un mpine tsɛng, Jizɔs abugh un uzɔ gha.

¹⁰ Ataanɛv kɔ apɛɛnɛv anav Aonz ghɛ atɛsɛnɛv mɛnna Ujus vɛru atire, vɛ ramayi ghɛ ana ghi imo gbong.

¹¹ Ne Hɛrɔd ghɛ uwaiku anav vɛ ahoo un ghɛ usen un. Vɛ wa un ikɔnd utoro, Hɛrɔd atind un kɔ Palɛt.

¹² Ihɔ ingimɔ Hɛrɔd ghɛ Palɛt vɛ ya ikar, tegh-tegh ukpɛ ungwen vɛru ghi itsɔn.

Ana-uzɔ uku una Jizɔs

¹³ Palɛt ataa urɔng ataanɛv kɔ apɛɛnɛv anav Aonz, ataanɛv Jus ghɛ iyɔr Ujus,

¹⁴ akaa avo na, “Ghu van ghu ɔr ungwen kɔ umuɛ na ɔr ungwen ava ghu mpav kɔ iyɔr Ujus. Mpine un kɔ ase un kpa mɛkɔr ukwagh ungwen mɛ na un ibɛgh gha.

¹⁵ Hɛrɔd kpa akɔr gha ne atind un va kan ghu ɔs; ɛnmɔ ɔ ɛnɛn a ɛr ukwagh ungwen vɛ wuwa un gha.

¹⁶ Ɛn ghɛru mɔ, mɛ na un ichan mɛ de un.”

¹⁷ [A ɔɔr mɔ itiyo ikaa itind iru ingiyen vɛ adu ɔr Ujus kɔ ugadi ihɔ itungnun ingin uku ukar ghu ɔs mɔ].

¹⁸ Avo amem ghu uzɔ umɔm vɛ kaa na, “Wuwa un! Hin de Barabas!”

¹⁹ (Vɛ wa Barabas kɔ ugadi itiyo ikaa aru ɔr unɔngun ghu uganyi ghɛ ɔr uwuwan iyɔr.)

²⁰ Palɛt aker na atuwa Jizɔs, ashi aram va ghɛ avo.

²¹ Kpa vɛ ram ghi imo gbong, “Mand un! Mand un!”

²² Ne Palɛt aram ghɛ avo ukwagh utar: “Kine ukwagh ube ɔr ungwen a ɛrɛ? Mɛ ɛn itiyo ikaa ingin mɛ na uzɔ na vɛ wuwa un gha. Ɛnmɔ ghɛru mɔ mɛ gbire un sɛ mɛ de un.”

²³ Kpa ghi imo gbong vɛ kong urɔng na mand un, amo avo akar avo.

²⁴ Ne Palɛt a ɛr mɔ vɛ ker,

²⁵ adu ɔr hun ungwen aru kɔ ugadi itiyo ikaa anɔngɔyi uganyi ghɛ uwuwan iyɔr, ungwen vɛ pine mɔ. Ne arumun na vɛ ɛr ghu Jizɔs ɛnmɔ vɛ ker.

Uwaiku vɛ mand Jizɔs kɔ Itsingan ukon

²⁶ Mɔ uwaiku vɛ yovoyi ghu Jizɔs, vɛ kɔr Simon umar inya ahiye Sirɛn, ungwen aru ghi inɔrun kɔ Jerusalɛm, vɛ nyɛr un ghɛ Itsingan ukon hun na atɛng.

²⁷ Isum iyɔr tsɛng idonda un, Akasɛv kpa vɛru kɔ isum iyɔro hun amban vɛ vangnayi na Jizɔs ɛr a akpo.

²⁸ Jizɔs agɛma akaa ghɛ avo, “Akasɛv ghu Jerusalɛm, ka vangnan amwe gha; vangnan imɛnɛgh ikonogh ghɛ myem avonov.

²⁹ Ahɔ anga ghi ivan ungwen ukaan na, ‘Ibɛrɛn iru ghɛ akasɛv amban vɛ tsa ikem, usagh ungwen angwe mar gha ghɛ utumbagh ukun unku amb uwan gha!’

³⁰ Ta “ ‘Vɛ kaa kɔ ghi igo, “Gba ghu ɔs!” Ghɛ agɛr, “Kuu ɔs!” ’

³¹ Ɔ ɛn iyɔr vɛ ɛr akaa angan ghu ukon urɛr, ki kine vɛ ɛr ghu ukon umuwan gha?”

³² Uwaiku hun vɛ yovoyi ghɛ ayiv ahar ghɛ Jizɔs, uwuwan avo.

³³ Kpɛ ungwen vɛ biye ahiye ungwen vɛ tayi na “Ugbend itogh,” vɛ mand Jizɔs hen, ghɛ ayiv ambumɔ, umɔm kɔ uvogh ayanɛgh ghɛ ugen kɔ uvogh amesɛgh.

³⁴ Jizɔs akaa na, “Utir, guwe ukwagh ube uvo, vɛ fɔ kwagh ungwen amba ghi ɛrɛn gha.” Ne vɛ bur ikond ina ghu udo.

³⁵ Mɔ iyɔr vɛ ruyi ɛnɛn, ataanɛv Ujus vɛru ghi iramen ana. Vɛ kaa na, “Arǝn agenɛv; ar sɛ imɛnɛgh inagh ɔ ɛn angwe Ɔr tsɛghan una Aonz, ungwen Aonz atsuwa.”

³⁶ Vɛ uwaiku kpa vɛ va ram ghɛ ana. Vɛ na un masɔrum amban mangats,

³⁷ vɛ kaa na, “Uru utor Ujus, ar imɛnɛgh ikow.”

³⁸ Vɛ angɛr kɔ Itsingan ukon isa na: Utor Ujus nan.

³⁹ Uyi umɔm kɔ ahar amban vɛ mand mɔ aram ana na: “Uwɛ ne ungwe Ɔr tsɛghan una Aonz gha? Ar imɛnɛgh ikow ghu ɔs!”

⁴⁰ Kpa uyi ungen mɔ avenda ghu un na, “Uchiyan Aonz gha, mɔ ungwe ghi ichan imɔm ghu unu?

⁴¹ Ɔs ahar ichan iyaas ingiye jing, Ghi kor ichan ingiyen ghɛ a ɛr aas. Kpa ɔr ungwen a ɛr ukwagh ube gha.”

⁴² Ne akaa na, “Jizɔs, umburum ghu ukpɛ ungwen uva ghɛ utorov uvov.”

⁴³ Jizɔs arumun un na, “Ukɔng mɛ ɔɔr ghu uwɛ, nyan uru ghu umwe kɔ ahiye una Aonz.”

Jizɔs akpo

⁴⁴ Ghɛru atɛ usov, imiye iwa hɔ utar ungumɔ kpem ahuwa atar ghu uso,

⁴⁵ ighang iki agham va gha. Ne ikond ingiyen kɔ itumbɛ Aonz ipav apav ahar.

⁴⁶ Jizɔs ataa ghɛ imo gbong, “Utir, mwa ajingɛjing uwam kɔ uvogh ukow.” Mɔ akaan mɔ, akpo.

⁴⁷ Ɔr uwaiku utaan ugen, a ɛnɛn akaa angan a ɛr mɔ, asigha Aonz akaa na, “Ukɔng ɔr ungwen aru ɔr gbɛngang.”

⁴⁸ Mɔ iyɔr amban vɛ gamber mɔ vɛ ɛnɛn akaa angan a ɛr, vɛ ahir ghɛ mariyam ase.

⁴⁹ Kpa amem amban afɔ Jizɔs ghɛ akasɛv amban vɛ donda un Tera kɔ Galili, vɛ tire marɛmb, ɔ ɛnɛn akaa hun.

Vɛ yii Jizɔs

⁵⁰ Ɔr ugen aru ungwen vɛ tayi na Josɛf, aru ɔr usɛ ghɛ ɔr gbɛngang, aru ɔr umɔm kɔ itiyo Ujus.

⁵¹ Kpa avenda iyu akaa abe a ɛrɛn angan ataanɛv Ujus vɛ ker na vɛ ɛr. Aru ɔr Arimatiya, kɔ ahiye utan Judiya, un kpa akɛghɛyi utorov unav Aonz.

⁵² Ne aza kɔ ghu Palɛt, apine ikum ina Jizɔs.

⁵³ Ne ashire ghi ikum hun, akang ghɛ akond ikong ayii kɔ uwar ungun vɛ gba ghu uvanz, ungwen amba yii ɔr ken gha.

⁵⁴ Ghɛru ihɔ iwan iyɔr, mɔ Ihɔ imɛmɛn Ujus ihiye kpa.

⁵⁵ Akasɛv amban vɛ donda Jizɔs Tera kɔ Galili vɛ donda Josɛf vɛ za ɛn uwar hun ghu mɔ vɛ gbir ikum ina.

⁵⁶ Ne vɛ hire kɔ achiya vɛ za ghi ɛrɛn iir ihuman ishighan. Kpa vɛ mɛm ghi Ihɔ imɛmɛn Ujus ɛnmɔ ina uzɔ ina Aonz ikaa.