Luk 22 - Itang

Judas ato Jizɔs

¹ Kpɛ ungwen itungnun ubrɛd ingin amba kan sɛ vɛ wa ɔyis gha, ungwen vɛ tayi na, Akar ghu ɔs iruyi kpemberen.

² Ataanɛv kɔ apɛɛnɛv anav Aonz ghɛ atɛsɛnɛv mɛnna Ujus vɛ kɛrɛyi ahang awuwan Jizɔs, kpa vɛ chiyayi iyɔr.

³ Ne ijɔv inɔr kɔ Judas Isikariyot, ungwen aru ɔr umɔm kɔ puwɛ ahar ayɛghɛnɛv anav.

⁴ Ne Judas ayov kɔ ataanɛv kɔ apɛɛnɛv anav Aonz ghɛ akɛghɛnɛv itumbɛ Aonz amban aram ghɛ avo, mɔ un ɛr sɛ ato Jizɔs.

⁵ Ghɛ shiya avo, vɛ rumun unan un inarigh.

⁶ Judas arumun, akɔr ghi ikeren ahang uton Jizɔs ukpɛ ungwen isum iyɔr ide ghi ifɔn.

Jizɔs ghɛ ayɛghɛnɛv amban atsuwa vɛ ya itungnun ingin Akar ghu ɔs

⁷ Mɔ ihɔ itungnun ubrɛd ingin irun ghɛ ɔyis gha ikuman, ukpɛ ungwen vɛ sɔng uwan iyɔng ingiyen itungnun ingin Akar ghu ɔs.

⁸ Jizɔs atind pita ghɛ Jon kɔ ghi ishi akaa ghɛ avo na, “Za yɔrun uyor ungun ghi vi ya itungnun ingin Akar ghu ɔs, urɔng.”

⁹ Vɛ pine un na, “Hana ukaa na ghi iza yɔrɔ?”

¹⁰ Arumun na, “Mɔ unɔrun Jerusalɛm, ɔr atɛng itu ijɔrɔ atsɔ un. Donda un kɔ itumbɛ ingin anɔr mɔ.

¹¹ Kaan uwun itumbɛ na, ‘Ɔr tɛsɛn apine na: kɛ hana ne umamu iyɔr uzendɛv angwe, hɔ mɛ ya itungnun ingin Akar ghu ɔs urɔng ayɛghɛnɛv avav?’

¹² Ta atɛs un ugbend utaan kɔ itumbɛ isa, ungwen vɛ tɔr tsa-tsa vɛ ber ikav itɛmanɛv. Hen ne uyɔrun uyor uwaas.”

¹³ Vɛ za ken vɛ ɛn akaa amem ɛnmɔ Jizɔs akaa mɔ, vɛ yɔr uyor itungnun ingin Akar ghu ɔs.

¹⁴ Mɔ ghɛ kuma, Jizɔs ghɛ ayɛghɛnɛv amban atsuwa vɛ tɛma urɔng iyan ukwagh uyan.

¹⁵ Jizɔs akaa na, “Kɛ awa isima uwam uyan uyor itungnun ingin akar ghu ɔs tegh-tegh sɛ ichan iyan iyam ihiye.

¹⁶ Mɛ ɔɔr un, mya va ukwagh uyan itungnun ingin Akar ghu ɔs va gha kpem itiyo ikaa hun iva ɛr kɔ utorov unav Aonz.”

¹⁷ Ne atɛng ukɔ masɔrum ugrɛp ana isighan kɔ Aonz. Ne akaa na, “Ɔzun hin burun.

¹⁸ Mɛ ɔɔr un mkaa ma va masɔrum ugrɛp amban ghɛ un gha kpem utorov unav Aonz uva.”

¹⁹ Ne atɛng ubrɛd ana isighan. Ne ahɛmb ana avo, ukaan na, Kɛ iyɔr aam nan, ingin mɛ na un. Ɛrɛn man hin umbur umwe.

²⁰ Ɛnmɔ, vɛ bɛɛn ukwagh uyan hun atɛng ukɔ masɔrum ugrɛp, ukaan na, “Ukɔ ungun utɛs ikur iyan ihɛ ingiyen ɛr vɛ kor ghi iyɛ kɔ avomb aam, angan mɛ ha ghu un.

²¹ “Kpa ɛn ɔr ungwen atom angwe ghi iyan ukwagh uyan ghu umwe.

²² Uwan Ɔro akpo ghɛ awa isima Aonz, kpa ichan ɛr iru ghu ɔr ungwen ava ato un mɔ.”

²³ Ayɛghɛnɛv anav vɛ kɔr ghi ipinen arend ɔr ungwen a ɛr utu ukwagh ungumɔ.

Jizɔs atɛs ayɛghɛnɛv anav ɛnmɔ ɔr ishi a ɛrɛn

²⁴ Ne vɛ ahiye ikpɛran ghɛ arend kɛ ana aru utaan ghi ishi uwas.

²⁵ Jizɔs a ɔɔr avo, “Ator Jɛnta amba run uwun iyɔr avov vɛ ker na amgbayi ghɛ avo ta vɛ tayi avo na, ‘Iyɔr awasɛnɛv.’

²⁶ Ne un karun ɛn avo gha. Ɔr utaan ghɛ atɛ uwon ahir ɛn urara, ɔr ungwen angwe ɔr ghi ishi ahir ɛn ɔr utom.

²⁷ Kɛ ana angwe utaan, ɔr ungwen atɛma iyan hin ɔr ungwen angwe iburun ukwagh uyana? Ku ungwen atɛma ghi iyan gha? Kpa mɛ gwe urɔng ghu un ɛn ɔr uburun ukwagh uyan.

²⁸ “Un ne urun ghu umwe kɔ akaren aam amem.

²⁹ Mɛ na un iyan utorov, ɛnmɔ Utir uwam anam,

³⁰ ɛn uyan uman urɔng ghu umwe kɔ utorov uvav, ghɛ utɛman kɔ ikɔnuv utorov, utunɛn atum puwɛ ahar ana Izrɛl.

Jizɔs aram ɛchi Aonz na Pita avenda un

³¹ “Mgba sɛ Samon ijɔv ipine iyan ingin ikar un ɛn ɔr ikɔrɔ aperen asang akaa.

³² Kpa mɛ ram ghu Aonz ghɛ awɛ, ɛn isima ibɛrɛn iyov ivɔr gha. Ɔ ɛn ugɛma isima kan ghu umwe, wa anomgban isima.”

³³ Ne Pita arumun, “Uwun, mɛ wa iyɔr izan ugadi shigh ghu ukpon urɔng ghu uwɛ.”

³⁴ Jizɔs arumun na, “Mɛ ɔɔr uwɛ, Pita nyan utsɔmum ukwa atar na ufɔm gha tegh-tegh sɛ Unom ikogh atɔng.”

³⁵ Ne Jizɔs apine avo, “Mɔ mɛ tind un ghɛ usuku gha, ghi ikpa gha, usida gha mɔ, ukwagh akpend unu?” Vɛ rumun na, “Kwagh akpend ɔs gha.”

³⁶ Jizɔs akaa avo, “Mɔ hanagen uru ghu usuku teng awɛ, kas ikpa; ne ɔ ɛn ungwe ghi isɔm itav gha, to ikɔnd iyow hin uyam imɔm.

³⁷ Ukwagh ungwen vɛ angɛr amwe na: ‘Vɛ ɔɔr iweng ghi iyɔr abev zwang ghu un’; kpɛɛ ghɛ a ɛr ghɛ amwe. Ukɔng, ava a ɛr kpɛɛ ghɛ amwe.”

³⁸ Ayɛghɛnɛv anav vɛ kaa na, “Uwun, ɛn sɛ, asum itav ahar anga han.” Arumun, “Den aram mɔ.”

Jizɔs aram ghu Aonz hɔ ugo ikon Oliv

³⁹ Jizɔs aza kɔ ugo ikon Oliv ɛnmɔ a ɛrɛyi kpemkpem, ayɛghɛnɛv anav vɛ aza urɔng ghu un.

⁴⁰ Mɔ vɛ nɔr hen, Jizɔs akaa ghɛ avo, “Ram ghu Aonz ɛn uden ghi igban kɔ ivɛmben.”

⁴¹ Jizɔs atind kɔ ghɛ avo marɛmb keb, ne angure anu inya uramen ghu Aonz,

⁴² Ukaan na, “Utir, ghɛru ghɛ awa isima uwam, hin arǝm ghi ichan ingiyen kɔ; kpa ɛnmɔ uker ɛr isima iyow akaruyi ghi iyam gha.”

⁴³ Udugɛr una Aonz kɔisa aduwe hɔ ghu un, awa un isima.

⁴⁴ Mɔ ka za un iyɔr tsɛng, a ram ghu Aonz shisha, ne iyuswa ina itsɔr inya ɛn kɛ avomb.

⁴⁵ Mɔ abɛɛn iramen ghu Aonz amugh aza kɔ ayɛghɛnɛv anav, akor avo ayav, mɔ ghɛ nɔr avo iyɔr kɔ mɛza iyɔr tsɛng.

⁴⁶ Jizɔs akaa ghɛ avo na, “Kine ɛr sɛ umbun iyavɛn? Mughnun ghi isa hin ramen ghu Aonz ɛna uden igban kɔ avɛmben.”

Vɛ kɔr Jizɔs

⁴⁷ Mɔ Jizɔs aru za ghi iramen, isum iyɔr iva, ne ɔr ugen ungwen vɛ tayi na Judas, ɔr umɔm kɔ puwɛ ahar anav, agba avo kɔ ishi utɛsɛn avo ihang. Ava susɛ Jizɔs uhɛnghɛ,

⁴⁸ ne Jizɔs apine un, “Judas, uto Uwan ɔro ususɛn un uhɛnghɛ?”

⁴⁹ Mɔ ayɛghɛnɛv anav Jizɔs vɛ ɛnɛn ukwagh ungwen a ɛr mɔ, vɛ akaa na, “Uwun, ghi inɔng ghɛ asum itav aasa?”

⁵⁰ Ne umɔm kɔ ayɛghɛnɛv anav atɔnd utogh ayan uwan utom una Utaan kɔ apɛɛnɛv anav Aonz.

⁵¹ Kpa Jizɔs akaa, “Den mɔ” ne aper utogh ɔr hun akos un.

⁵² Ne Jizɔs akaa ghɛ ataanɛv kɔ apɛɛnɛv anav Aonz, ataanɛv akɛghɛnɛv itumbɛ Aonz, ghɛ ataanɛv Ujus amban vɛ va ukorun un mɔ. Akaa na, “Ɔ ɛnɛn na mɛ ungwe uyi ungwen uvan ghɛ asɔm itav ghi itɛv ukorun umwe?

⁵³ Usov ghu usov mruyi ghɛ un kɔ itumbɛ Aonz, ukɔrun umwe gha. Ukpɛ uwon nan ghɛ ukpɛ ikɔw imiye.”

Pita atsɔm Jizɔs

⁵⁴ Ne mɔ vɛ kor Jizɔs, vɛ yov ghu un kɔ itumbɛ ina utaan kɔ apɛɛnɛv anav Aonz. Ne Pita aru ghi ivan avo kɔ ajime marɛmb.

⁵⁵ Mɔ iyɔr agenɛv vɛ wa uzu kɔ atɛ atitɛmb achiya hun vɛru atɛma, Pita atɛma ghɛ avo.

⁵⁶ Uwan utom ukwas a ɛn pita aru atɛma hɔ uzu hun. Ne akpember a ɛn ghɛ ana ding akaa na, “Ɔr ungwen arun ghɛ Jizɔs.”

⁵⁷ Ne pita atsɔm. Akaa na “Ukwas mɛ fɔ un gha.”

⁵⁸ Ghɛshi gha ɔr ugen a ɛn ana akaa na, “Uwɛ kpa ungwe umɔm kɔ ayɛghɛnɛv anav.” Pita akaa na, “Ku mwe gha.”

⁵⁹ Ghɛ shin keb mɔ ɔr ugen ava akaa na, “Ɔr ungwen titi aruyi urɔng ghu un, angwe ɔr kɔ ahiye Galili.”

⁶⁰ Pita arumun un na, “Unombos ɔr, mfɔ ukwagh ungwen ungweyi ɔɔrun mɔ gha.” Mɔ aruyi iramen, Unom ikɔw itɔng.

⁶¹ Ne Uwun agɛma a ɛn Pita kɔ ghi ishi. Ne Pita ahumbur amuu angan Uwun a ɔɔr ghu un: “Ɛr utsɔm na ufɔm gha akwagh atar, tegh-tegh sɛ Unom ikɔw atɔng nyan.”

⁶² Ne Pita aduwe kɔ uwen avang shisha.

Vɛ kɛghɛnɛv vɛ ahoo Jizɔs

⁶³ Iyɔr amban vɛ kɛghɛyi Jizɔs vɛ hiye ihoon ghɛ ugbirɛn un.

⁶⁴ Vɛ kang Jizɔs ikond ghi ishi vɛ akaa un na, “Ɔɔr sɛ ɔs, ɔr ungwen agbire uwɛ?”

⁶⁵ Vɛ tuwa un ituwanɛv igɛnɛv kpos-kpos.

Ataanɛv Jus vɛ pine Jizɔs mpine

⁶⁶ Mɔ usov usɛn urɔng ataanɛv iyɔr Ujus amban vɛru, Ataanɛv kɔ apɛɛnɛv anav Aonz ghɛ atɛsɛnɛv mɛnna Ujus, vɛ zwang ahiye umɔm, ne vɛ va Jizɔs hɔ vɛru mɔ.

⁶⁷ Vɛ akaa na, “Ɔ ɛn uwɛ ne ungwen Ɔr tsɛghan una Aonz, ɔɔr us.” Jizɔs arumun na, “Kas mɛ ɔɔr un unanɛm ukɔng gha,

⁶⁸ ne kas mpine un, urumunun gha.

⁶⁹ Ne hiye inyan uzan kɔ ishi, Uwan Ɔro atɛmayi kɔ uvo ayanɛgh una Uhɛmban Aonz.”

⁷⁰ Ne vɛ pine, “Uwɛ ne ungwe Uwan una Aonz?” Arumun, “Ukaan ukɔng na mgwe.”

⁷¹ Ne vɛ kaa na, “Kine umbu kɛrɛn va ishada? Umgban awɛ kɔ uzɔ una.”