Luk 21 - Itang

Ukwas itsɔrgur ana ghu unagh

¹ Mɔ Jizɔs aru kɔ itumbɛ Aonz, akond itogh isa a ɛn iyɔr ghu usu agenɛv mɔ vɛ wayi ghu unagh uvogh kɔ ghɛ akpa uwan unagh.

² Ne ashigh a ɛn ichan ukwas itsɔrgur ghi iwan usam inarigh irarɛv ahar.

³ Jizɔs akaa, “Mɛ ɔɔr un ukɔng, ichan ukwas itsɔrgur ungumɔ ahɛmba ghi inan ghu agenɛv ambumɔ amem.

⁴ Itiyo-ikaa, iyɔr amem amban vɛ na unagh vɛ na kɔ usu uvo; kpa ichan ukwas itsɔrgur ungumɔ kɔ ghi ichan ina awa akan aru ghɛ aka amem.”

Jizɔs atsinga ghi ikaan mbuu itumbɛ Aonz

⁵ Ayɛghɛnɛv anav agenɛv mɔ vɛ ramayi mɔ vɛ tɔr itumbɛ Aonz ghu angon a uswɛn ghɛ unagh ukun vɛ na Aonz. Kpa Jizɔs akaa na,

⁶ “Ghakaa ghi ivan ukpɛ ungwen akaa angan umbun ghi ɛnɛn aa amem vɛ abuu aa tsa-tsa. Ingon imɔm itɛma ghi igen gha!”

⁷ Vɛ pine, “Ɔr utɛsɛn, kɛ hanamɔ ukpɛ akaa angan a ɛrɛ? Kine ikav itɛs ɔs na aka ghi ikuman akan akaa angan a ɛr?”

⁸ Jizɔs arumun, “Ɔr aka tsuyi un gha, iyɔr tsɛng vɛ va itiye aam ukaan na, avo ne amba Ɔr tsɛghan. Ghɛ ukaan va na, ‘Ahɔ akpembere!’ Kpa ka nan avo isima ibɛrɛn gha.

⁹ Ɔ ɛn umgban irɛhɛ itav ghɛ iyɔr ghi ihimban atoow uganyi, kachiyan gha. Akaa angan a ɛr kpɛɛ tegh-tegh, kpa mbɛɛ ava Kɛsmɛ gha.”

¹⁰ Ne akaa ghɛ avo na, “Itar igen inɔng ghɛ itar igen, ator agen anɔng ghɛ ator agen.

¹¹ Ghɛru azuwa asɛnden akaren avo, ijon igba ghɛ awen atsɛrɛn ghu ahiye ahiye, ghɛ akaa a ɛrɛn angan atsɛrɛn ghɛ akav akondon iyɔr akaren avo kɔisa.

¹² “Tegh-tegh sɛ akaa angan a ɛr mɔ vɛ akɔr un, vɛ kishɛ un. Sɛ vɛ naa un kɔ ataanɛv kɔ atumbɛ izwangnɛn Ujus utunɛn un ghɛ vɛ wa un kɔ ugadi. Vɛ za ghu un kɔ ghɛ ator ghɛ anom iyɔro ghu ukwagh ungwen ɔ ɛrɛn gha, akaa angan amem a ɛr ghu un kɛna umbun ayɛghɛnɛv avav.

¹³ Ku mɔ ne ukor ghi iyan ingin ghu ɔɔrun avo ukwagh uwam.

¹⁴ Ne aka zayi un iyɔr kɔ asɛma mɔ urumunun avo tegh-tegh gha.

¹⁵ Itiyo ikaa mɛ inga mɛ na un amuu ajing ghu mfɔ mɔ uzu ramen ɛn atsɔnonov un kas imu umɔm abe vɛ rumun zan vɛ kpɛra ghu un gha.

¹⁶ Kas amaren avonov, anomgban, utsombur ghɛ akar un, vɛ tow un. Vɛ shigh vɛ wuwa un agenɛv.

¹⁷ Iyɔr amem vɛ atsɔn un itiyo ikaa umbun ayɛghɛnɛv avav.

¹⁸ Kpa kwa umɔm abe aper kas ugɛra ichiye uwon umɔm kɔ ghi itogh gha.

¹⁹ Ɔ ɛn uru ghi isima iwan, ɔ arǝn umuwa uwow.

²⁰ “Ɔ ɛn uwaiku agamber Jerusalɛm vɛ wa atɛ, fɔn na ahɔ avo asɛngnɛn uvor akpember.

²¹ Mɔ tah amban kɔ Judiya vɛ yuz hin vɛ yov kɔ igo, amban kɔ ghu ahiye Jerusalɛm vɛ aduwe, amban kɔ vɛ hiye kɔ uwen mɔ vɛ kaa nɔrɔyi kɔ Jerusalɛm gha.

²² Itiyo ikaa, ka ahɔ angan Aonz ana iyɔr Jerusalɛm ichan, Kɛ man ne amuu vɛ aramen ɛchi Aonz angan vɛ angɛr a ɛr.

²³ Ahɔ ungumɔ akasɛv amban vɛ wa uyav ghɛ amban vɛ ambɛn myem vɛru ghi ichan. Iyɔr vɛru ghi ichan shisha kɔ inya ingimɔ ghɛ ichan ina Aonz iru ghɛ avo.

²⁴ Ɛr vɛ wuwa agenɛv ghi isɔm agenɛv vɛ akɔr avo ikpan vɛ yov ghɛ avo kɔ itar igen. Ɔr amban amba Ujus gha vɛ abuu vɛ nyar Jerusalɛm kpem ahɔ angan Aonz ana avo abe.

²⁵ “Ghɛ akav atsɛrɛn atɛs kɔ ighang, uwoor ghɛ asan. Iyɔr utarev kɔ itar imem vɛ aka fɔ ukwagh ungwen amba ghɛ awɛ gha, ghɛ uchiyagh ghi ikumɛn ajɔr ataan.

²⁶ Iyɔr vɛ humɛ, ghu uchiyagh ghakaa angan anga ghi ivan kan utar, Ikɔw amban kɔisa ayɛghɛsɛyi.

²⁷ Ukpɛ ungumɔ iyɔr vɛ a ɛn Uwan Ɔro aru ghi ivan kɔ ghɛ akugh ghi ikɔw ghɛ utorov umbun ukar-avo.

²⁸ Ɔ ɛn akaa angan ahiye ghi ɛrɛn mɔ, mughun kondon itogh isa, itiyo ikaa arǝn iyon ikpember.”

²⁹ Ne atuwa avo ikan ingin: “Ɛn sɛ ukon ɔfig, ghɛ ikon igen.

³⁰ Ɔ ɛn ihiye ghi sɛghɛn ika, ugba ghi ifɔn na ufam ukpember.

³¹ Ku mɔ ne, ɔ ɛn akaa angan a ɛr amem, gban ghi ifɔn na Utorov unav Aonz ukpember.

³² Mɛ ɔɔr un ukɔng, ichend ingiyen ikar gha kpem akaa angan amem a ɛr.

³³ Kɔisa ghɛ kan ghi inya ghakar kɔ, ghi imu uwam umɔm akar gha.

³⁴ “Kɔr ayom, ka hɛmban ibɛrɛn isima ghu uyaa gha, ghɛ uman masɔrum ghɛ isaren utar. Ka ɛrɛyi ɛn ihɔ ingimɔ ikɔr uwɛ ghi imgbogh ɛn itambenɛv gha.

³⁵ Itiyo-ikaa ihɔ ingimɔ iva ghi iyɔr amem han ghu utar.

³⁶ Kɔr ayom kpem, ram ghu Aonz ɛn akaa angan anga ghi ivan mɔ abe apɛruw gha, ɛn ube itire kɔ ghi ishigh Uwan Ɔro.”

³⁷ Hanamɔ usov Jizɔs azayi kɔ itumbɛ Aonz utɛsɛn, ayɛkighɛ ahire aza tsa kɔ Ugo ungun ungu ghi Ikon ɔlivɛ.

³⁸ Isum iyɔr vɛ gamberayi kɔ itumbɛ Aonz utur-utur usov ghu usov umgban un.