Luk 2 - Itang

Umar una Jizɔs

¹ Inyom ingiyen Unom Siza Ɔgɔstɔs aru Unom kɔ utar Rom. Ana uzɔ na vɛ ɔɔr uweng iyɔr amem kɔ utar Rom.

² Atiye angɛrɛn angan aru mahɛ ukpɛ ungwen Kurinus aru Unom kɔ ghu utar Siriya.

³ Iyɔr amem vɛ za kɔ ihiye utaan uvo ungɛrɛn atiye kɔ ukaa.

⁴ Ne Josɛf amugh uzend kɔ ahiye Nazaret ghi inya Galili uzan kɔ Betelehem kɔ ghi inya Judiya, utar una Dɛvid kɛna aru uwan kɔ itum ina Dɛvid.

⁵ Aza ken urɔng ghu Mɛri iye ina, Mɛri aru ghu uyav.

⁶ Vɛ tsa ken kpem ahɔ amaren ana akuma.

⁷ Amar uwan una ghi ishi unombos, vɛ kang un kɔ akond angan amba kangɛn uwan, vɛ gbir un kɔ ghu okpes. Kumo ahiye aru ungwen vɛ tsa gha.

Udugɛr una Aonz a va ɔɔr vɛ kɛghɛnɛv iyɔng urɛhɛ umar una Jizɔs

⁸ Imiye ingimɔ vɛ kɛghɛnɛv iyɔng vɛru kɔ ikɔr ghi ikɛghɛn iyɔng ivo.

⁹ Kɛsmɛ Udugɛr una Aonz Uwun aduwe kɔ ghɛ avo ghi iyamǝn ina Aonz itaa kɔ vɛru mɔ, vɛ hir ghi ichiyan shisha.

¹⁰ Kpa udugɛr una Aonz akaa ghɛ avo na, “Ka chinyan gha mva un ghu urɛhɛ usɛ ghɛ ishighan tsɛng kɔ ghi iyɔr amem.

¹¹ Nyan kɔ Betelehem ahiye una Dɛvid vɛ mar un Ɔr arǝn ungwen angwe Ɔr tsɛghan una Aonz Uwun.

¹² Ikav ingiyen ufɔn uwan hun nan, ɔ ɛnɛn ghu uwan ghɛ akang akond, vɛ gbir un ghu okpes.”

¹³ Kɛsmɛ mɔ urɔng udugɛr anav Aonz kɔisa tsɛng ghɛ udugɛr una Aonz ungumɔ, vɛ pire isum ghi itomon acham usighan Aonz na,

¹⁴ “Itughun iru kɔ ghɛ Aonz Uhɛmban kɔisa, ghɛ Makun kan inya kɔ vɛ amban ghɛ ashiya Aonz ghɛ avo.”

¹⁵ Mɔ vudugɛr anav Aonz vɛ yovon kɔisa, akɛghɛnɛv iyɔng vɛ akaa ghɛ vɛ rend, “Ghi iyovon kɔ Betelehem ghi iza ɛn akaa angan a ɛr, ɛnmɔ Aonz Uwun a ɔɔr ɔs.”

¹⁶ Vɛ za ayuyu vɛ za ɛn Mɛri avo ghɛ Josɛf ghu uwan agbir ghu okpes.

¹⁷ Mɔ vɛ za ɛnɛn ana, vɛ ɔɔr avo amuu angan Aonz a ɔɔr avo ghu ukwagh uwan hun.

¹⁸ Ne amem amban vɛ mgba akaa angan vɛ kɛghɛnɛv iyɔng vɛ ɔɔr mɔ, ghɛ tser avo.

¹⁹ Kpa Mɛri akɔr akaa angan kɔ ghi isima ghi imburun.

²⁰ Akɛghɛnɛv iyɔng mɔ vɛ hireyi, vɛ akɔr ghi itomon acham, ghi isighan Aonz ghɛ akaa angan vɛ mgba ghɛ angan vɛ ɛn, ɛnmɔ udugɛr una Aonz a ɔɔr avo.

²¹ Ahɔ kinkini vɛ tsɛng uwan hun, vɛ ana un itiye na Jizɔs, itiye ingin udugɛr una Aonz ana, mɔ vɛ kunda vɛ wa uyav unav gha.

Vɛ na Jizɔs kɔ ghɛ Aonz kɔ itumbɛ Aonz

²² Mɔ ghɛ akuma ukpɛ ungwen vɛ kire Mɛri ɛnmɔ Mɛnna una Mosis akaa, Josɛf avo ghu Mɛri vɛ za ghu uwan hun kɔ Jerusalɛm kɔ itumbɛ Aonz unan un kɔ ghɛ Aonz Uwun.

²³ Mɛnna una Aonz Uwun akaa na, “Hanamɔ uwan unombos ishi ungwen avand iduwen kɔ uyav ungɔ, vɛ atsagha un kɔ ghu Aonz Uwun.”

²⁴ Ne vɛ na unagh ɛnmɔ mɛnna Aonz Uwun akaa, “Ukurukuku ahar, vɛru gha sa Mkungum mɛhar.”

²⁵ Ukpɛ ungumɔ ɔr ugen aru kɔ Jerusalɛm ungwen vɛ tayi na, Simiyon, aru gbɛngang aru ghi isima ibɛrɛn kɔ Aonz. Aru ghi ikɛghɛn ukpɛ ungwen Aonz ava ar iyɔr Izrɛl, Ajingɛjing una Aonz aru kɔ ghɛ ana.

²⁶ Mɔ Ajingɛjing una Aonz a ɔɔr un na, ɛr a ɛn Ɔr tsɛghan una Aonz Uwun tete ta akpo.

²⁷ Ajingɛjing atɛs un na aza kɔ ghu ugbend itumbɛ Aonz; Mɔ amarenɛv anav uwan hun vɛ va ungwen vɛ ɛr ɛnmɔ mɛnna Aonz ana iyan.

²⁸ Simiyon a ɔz uwan hun ghɛ avo ana asigha Aonz na,

²⁹ “Uwun Aonz mɔ uru una itɔnd uzɔ, teng umuwa uwam ghu makun.

³⁰ Ase am a ɛn Ɔr arǝn ungwen utind na ar iyɔr avov,

³¹ ungwen utind kɔ ase akur iyɔro amem.

³² Un ne ɛru iyamǝn ingin iyam akur iyɔro amem amban amba Izrɛl gha, ghɛ ghu uvan utorov kɔ iyɔr avov Izrɛl.”

³³ Utir avo ungɔ una ghɛ tser avo ghɛ akaa angan vɛ ɔɔr ghu uwan hun.

³⁴ Simiyon ana avo ibɛrɛn akaa kɔ ghu Mɛri ungɔ una; “Aonz agba uwan ungwen na ava ghu ugbagh ghɛ ivongon kɔ iyɔr tsɛng kɔ Izrɛl. Aru ikav ingiyen iyɔr iram ghɛ ana.

³⁵ Ɛn mwa isima iyɔr tsɛng atagh kɔ uwen. Ne uwɛ kpa uwa ikuse ɛn vɛ kuma uwɛ isɔm ghi isima.”

³⁶ Ukwas uramen ɛchi Aonz, ungwen vɛ tayi na Anna uwan una Fanuwel, kɔ itum ina Asha. Aru ichingnɛn ukwas; aru a ɔz unom anyom atindiar tsar-umɔm, ne Unom una akpo.

³⁷ Aru ukwas-itsɔrgur kpem anyom iti-anyin ghɛ anyin. Abanayi kɔ itumbɛ Aonz gha kpa atughuyi Aonz imiye ghu usogh uhɔrun ukwagh uyan ghɛ uramen ghu Aonz.

³⁸ Kpɛ ungumɔ Anna ava tsɔ, Josɛf avo ghu Mɛri, Asigha Aonz ne ahiye ghi iramen akaa ghu uwan hun kɔ vɛ amem amban vɛru ghi ikɛghɛn ghi arǝn ingin Aonz ava ar Jerusalɛm.

³⁹ Mɔ Josɛf avo ghu Mɛri vɛ ɛr akaa angan mɛnna una Aonz Uwun akaa mɔ, vɛ hire kɔ Nazaret ahiye kɔ utar Galili.

⁴⁰ Ne uwan hun aves ghi ikɔw; urum uru ghɛ ana tsɛng, isegh inagh Aonz iru ghɛ ana.

Jizɔs aramayi ghɛ atɛsɛnɛv mɛnna Aonz

⁴¹ Hanamɔ inyom amaren anav Jizɔs vɛ zayi kɔ Jerusalɛm kɔ itungnun Ihungwan Indakɔ.

⁴² Mɔ Jizɔs abiye anyom puwɛ-ahar, vɛ za itungnun ihungwan indakɔ ɛnmɔ vɛ zayi kpem-kpem.

⁴³ Kpɛ ungwen itungnun Ihungwan indakɔ ibɛɛn mɔ, ne amarenɛv anav vɛru ghi hiren kɔ achiya, uwan uvo asɛng kɔ Jerusalɛm kpa vɛ fɔ gha.

⁴⁴ Vɛ ɛn na angwe kɔ ghi isum iyɔro ghɛ avo, vɛ zend uzend ihɔ imɔm. Ne vɛ hiye ghi ikeren un kɔ ghɛ avov ghɛ akar ana.

⁴⁵ Mɔ vɛ aker un gha vɛ ahire kɔ Jerusalɛm ukeren un ken.

⁴⁶ Ihɔ utar vɛ ɛn ghɛ ana kɔ itumbɛ Aonz, atɛma ghɛ atɛsɛnɛv Izrɛl, umgban avo ghɛ upinen avo akaa.

⁴⁷ Amem amban vɛ mgba un ghɛtser avo ghu ukwagh ufɔn una, ghu mɔ arumunyi akaa angan vɛ apine un.

⁴⁸ Mɔ amarenɛv anav vɛ ɛnɛn ghɛ ana, ghɛtser avo. Ungɔ una akaa una, “Uwan, kine ɔ ɛr ghu ɔs mana? Utir uwow urɔng ghu umwe ghɛza ɔs iyɔr, ne ghi inɔr ghi ikeren uwɛ.”

⁴⁹ Arumun avo na, “Kine urunum ghi ikeren?” “Uku fɔn na agba akan mɛru kan ghi itumbɛ Utir uwam gha?”

⁵⁰ Kpa vɛ afɔ ukwagh ungwen a ɔɔr gha.

⁵¹ Jizɔs ahire urɔng ghɛ amarenɛv anav kɔ Nazaret, amgbayi avo. Kpa ungɔ una a umburuyi akaa angan amem kɔ isima ina.

⁵² Jizɔs aves ghu urum ghɛ ikɔw, ghɛshiya Aonz ghu un iyɔr kpa ghɛshiya avo ghu un.