Luk 19 - Itang

Zakiyɔs ɔr ɔzun ukpanɛv ahiye udondan Jizɔs

¹ Jizɔs anɔr ahiye Jɛriko aruyi ikaren ken.

² Ɔr ugen aru ken ungune vɛ tiye na Zakiyɔs. Aru utaan ɔzun ukpanɛv aru ɔr usu.

³ Aker na un a ɛn utu ɔr ungun Jizɔs angwe, mɔ aru ɔr itɔn abe gha ɛchi isum iyɔro.

⁴ Ne Zakiyɔs ayuz atond kɔ ghi ishi andiye ukon ɔfig utaan kpembere, hɔ ihang ingin aru akan Jizɔs akar mɔ ungwen a ɛn ghɛ ana.

⁵ Mɔ Jizɔs abiyen hen, a ɛnɛn Zakiyɔs ne atah un. “Zakiyɔs! Shire fafa! Kɛ ken ken mru ujin kɔ itumbɛ uwow inyan.”

⁶ Zakiyɔs ashire inya fafa ɔz Jizɔs ujin ghi isighan, ne aza un kɔ itumbɛ ina.

⁷ Iyɔr amem amban hen ka shiya avo gha vɛ hinye na. “Angwe izan ujin kɔ itumbɛ ɔr ube.”

⁸ Ne Zakiyɔs atire isa akaa ghu Uwun na, “Uwun ɛn sɛ hanagen, mɛbur usu uwam ken akwa ahar. Upav umɔm mɛbur achanɛv, ghɛ ɔr ungwen mɛ nighe un ukpanɛv, mɛ hire un akwa anyin.”

⁹ Jizɔs arumun na, “Nyan arǝn iva han itumbɛ igin, itiyo-ikaa ɔr ungwen atɛs na un angwe uwan kɔ itum ina Abɛraham ukɔng.

¹⁰ Itiyo-ikaa Uwan Ɔro ava han inya kɛ ukaren ghɛ arǝn amban vɛ rir.”

Jizɔs atuwa ikan ghu utor ghɛ itomov anav puwɛ

¹¹ Mɔ isum iyɔr iru imgban aram ana Jizɔs. Aza ishi ghi ikan ingin, ɛchi aru kpembere kɔ Jerusalɛm, itiyo-ikaa iyɔr vɛ bɛrɛyi isima na utorov unav Aonz uva Kɛsmɛ.

¹² Jizɔs akaa na, “Ɔr ugen kɔ itum atoro aza kɔ utar marɛmbɛ ungwen vɛ za kuu un itam utoro sɛ ahire.

¹³ Ne atah itomov anav puwɛ ana hanamɔ uvo mina. Akaa ghɛ avo na, ‘Ɛrɛn kasuwa kpem mhirɛ.’

¹⁴ “Kpa iyɔr anav vɛ tsɔn un, mɔ ayovon mɔ iyɔr anav vɛ tind iyɔr agenɛv na vɛ za akaa na, ‘Ghi ker ɔr ungwen na aka aruyi utor waas gha.’

¹⁵ “Kpa vɛ kuu un itam utorov ne akur, ne atah itomov anav amban ana avo inarigh kasuwa mɔ. Ɛnmɔ afɔ uruwa ungun vɛ ɛr.

¹⁶ “Ɔr mahɛ kɔ itomov ambumɔ akaa na, ‘Uwun, mɛ ɛr kasuwa mɛ kɔr uruwa akwa puwɛ ghi mina ingiyen unam mɔ.’

¹⁷ “ ‘Uwun akaa na, ɔ ɛr! Ɔr utom usɛ. Itiyo-ikaa uru ghi isima Ibɛrɛn ghu ukwagh keb, ru utor ɛnɛyi ghɛ ahiye ataanɛv puwɛ.’

¹⁸ “Ɔr utom uhar ava akaa na, ‘Uwun, mɛ ɛr kasuwa ghi mina uwow mɛ kɔr uruwa akwa ataan ghi mina ungwen unam mɔ.’

¹⁹ “Uwun akaa na, ‘Ru utor ɛnɛyi ghɛ ahiye atan.’

²⁰ “Kpa ɔr utom utar mɔ ava akaa na, ‘Uwun, mina uwow nan mɛyɛr kɔ ghi ikond.

²¹ Mɛ chiya itiyo-ikaa mru uwow ataar, utɛngnɛn hɔ ubɛr gha usudan hɔ urɔ gha.’

²² “Uwun una arumun na, ‘Uwɛ ɔr utom imbuso ghu ukwagh ɔɔrun uwow ne mɛtunɛ uwɛ. Ufɔ na mru uwam ataar ungwen mtɛngnɛn hɔ mbɛr gha ghɛ mɛ sudan hɔ mɛ rɔɔ gha.’

²³ Ki kine ɛr sɛ uku wayi inarigh ikagh kɔ ubam gha. Ɛn na mɛ kɔr uruwa mɔ mɛ va man?

²⁴ “Ne uwun una ana uzɔ kɔ amban vɛru hen mɔ na, ‘Ɔz mina ungumɔ nan ɔr utom ungwen akɔr uruwa akwa puwɛ mɔ.’

²⁵ “Kpa vɛ akaa na, ‘Uwun, ɔr utom ungumɔ akɔr kpa mina puwɛ!’

²⁶ “Uwun akaa na, ‘Hanamɔ ɔr ungwen angwe ghu ukwagh mɔ vɛ soor un, ɔr ungwen angwe ghu ukwagh gha, kas keb akan angwe ghɛkaa mɔ vɛ ɔz.

²⁷ Kpa atsɔnonov avav amban vɛ ker na mɛru utor ghɛ avo gha mɔ va ghɛ avo hin uwuwa avo han ghi ishigh ikagh.’ ”

Jizɔs anɔr kɔ Jerusalɛm ɛn ku utor

²⁸ Mɔ Jizɔs abɛɛn ituwa ikan ingin, akor izan kɔ Jerusalɛm, aru ayɛghɛnɛv anav kɔ ghi ishi.

²⁹ Mɔ anɔr Betfage ghɛ Bɛtani kɔ ugo oliv, atind ayɛghɛnɛv ahar kɔ ghɛ ishi.

³⁰ Ukaan, “Zan ahiye ungwen kɔ ishi mɔ, unɔrun mɔ, ɔ ɛnɛn uwan-ujaki akang ungwen ɔr angwe andiye awɛ gha. Sagh hin vam ghɛ amin.

³¹ Ɔ ɛn ɔr apine un ki kine ɛr sɛ umbun isaghɛn? Kaan na, ‘Kwagh agba Uwun ghɛ amin.’ ”

³² Ne amban atind mɔ vɛ za ɛn uwan-ujaki hun, ɛnmɔ Jizɔs akaa avo.

³³ Mɔ vɛru isaghɛn uwan-ujaki hun, uwun uwan-ujaki apine avo, “Ki kine ɛr sɛ umbu sangh uwan-ujaki hunu?”

³⁴ Vɛ rumun na, “Kwagh agba Uwun ghɛ amin.”

³⁵ Ne vɛ va uwan-ujaki hun vɛ taar akond avo kɔ ijime uwan-ujaki hun vɛ andiye ghu un atɛma ken.

³⁶ Mɔ andiye aru izan, isum iyɔro vɛ taar akond avo ghi ihang.

³⁷ Mɔ akpember kɔ isɛnɛn Ugo ungun ungu ghi Ikon ɔlivɛ, isum ayɛghɛnɛv ka shiya avo vɛ isigha Aonz ghɛ imo gbong ɛchi akaa akondon iyɔr angan vɛ ɛn.

³⁸ Vɛ akaayi, “Ibɛrɛn iru ghu utor ungwen ava itiye Uwun Aonz! Makun kɔisa, ghɛ utorov kɔ Aonz!”

³⁹ Ufarasi agenɛv kɔ isum iyɔro mɔ vɛ kaa Jizɔs na, “Ɔr tɛsɛn, tsɔ ayɛghɛnɛv avo!”

⁴⁰ Jizɔs akaa na, “Ɔ ɛn amban vɛru swɛng, angon angan han ihang vɛ hiye ikongnon ghi isighan.”

Jizɔs avang ɛchi iyɔr Jerusalɛm

⁴¹ Mɔ Jizɔs akpember kɔ ahiye Jerusalɛm mɔ a ɛnɛn ahiye utaan hun, ahiye avang ghi iyɔr hun.

⁴² Ne akaa na, “Mtɛm udɛ ifɔn ukwagh ungwen ava un makun nyan. Kpa hanagen akaa un uyɛr.

⁴³ Ahɔ anga ghi iva ungwen atsɔnonov avov vɛ ma igar vɛ gamber uwɛ vɛ waw atɛ, vɛ achir uwɛ kɔ ahiye amem.

⁴⁴ Vɛ wuwa un ghɛ myem avonov ken. Vɛ vihi uwɛ atumbɛ angono amem, ingon imɔm itɛma ghɛ urend ghi isa gha, itiyo ikaa uvendan ihɛr ungwen Aonz ava ghi arǝn un.”

Jizɔs azend iyɔr kasuwa kɔ itumbɛ Aonz

⁴⁵ Mɔ Jizɔs anɔr kɔ ugbend itumbɛ Aonz, ahiye izɛndan iyɔr amban vɛru itun akaa ken.

⁴⁶ Akaa na, “Vɛ angɛr, ‘Itumbɛ aam ghiru itumbɛ iramen ghu Aonz,’ kpa ugɛman iye ‘Ubar ayiv.’ ”

⁴⁷ Jizɔs azayi usov ghu usov utɛsɛn kɔ itumbɛ Aonz. Kpa ataanɛv kɔ apɛɛnɛv anav Aonz ghɛ atɛsɛnɛv mɛnna Ujus ghɛ vɛ ataanɛv iyɔr akɛrɛyi ahang awuwan un.

⁴⁸ Kpa vɛ akor ihang imɔm gha, itiyo ikaa iyɔr amem vɛ abɛr atogh imgban amuu ana shisha.