Luk 17 - Itang

Jizɔs atɛs ukwagh akaa-abe, isima ibɛrɛn, ghɛ uguwɛn anomgban

¹ Jizɔs akaa ayɛghɛnɛv anav, “Aka ken-ken ivɛmben igban kɔ ukwagh ube iva kɔ ghi iyɔr. Kpa ivihi uzɔ ingiye ghu ɔr ungwen ava ghi ivɛmben kwagh ube!

² Ghɛ hɛmba isiyan ghu amban vɛ wand avo unas umɛn tava ker avo kɔ ijɔr itan, ungwen vɛ avɛmb myem ararɛv sɛ vɛ agba kɔ ukwagh ube.

³ Kɔrun imɛnɛgh ikonov. “Ɔ ɛn uwanomgban a ɛr ukwagh ube, hure un. Ɔ ɛn a gɛma isima, guwe ukwagh ube una.

⁴ Ɔ ɛn ahiye uwɛ akwa tsindar tsar umɔm ghi ihɔ, ne akɔr uzɔ akwa tsindar tsar umɔm, na, ‘Mɛ gɛma isima,’ aka ken-ken guwe ukwagh ube una.”

⁵ Ayɛghɛnɛv amban atsuwa vɛ kaa ghu un na, “Uwun, soor ɔs isima ibɛrɛn.”

⁶ Ne Uwun akaa na, “Ɔ ɛn isima ibɛrɛn iyon irahar ɛn isang mɔsad, ukaa ukon isikamin ungun na, ‘Mugh han hin za rɔɔ imɛngh ikow kɔ ijɔr itan,’ ghi ɛr mɔ.

⁷ “Ɔ ɛn ɔr angwe uwan utom, ungwen ayaren un kɔ ikɔr zan ungune a ɛnɛn un irɛv, ukpɛ ungwen akur kɔ ikɔr abe akaa una ‘Vɛ tɛma ya ukwagh uyana’?

⁸ Aka kaa ghu un na, ‘Ɛrɛm ukwagh uyan ayiɛ, wa ikond ishiyan hin unam ukwagh uyan kɛghɛm, mya mma tegh-tegh; sɛ uya uma uwow gha’?

⁹ Uwun hun abe akaa uwan utom una na ayɔr ɛnmɔ a ɛr ukwagh ungwen ana uzɔ na a ɛrɛ?

¹⁰ Mɔ ne un kpa, ɔ ɛn ɔ ɛrɛn akaa amem angan vɛ kaa na ɛrɛn, ukaan na, ‘Ghi Imbi myem itomov imbi itiyo ikaa gha. Ghi ɛr utom ungun agba akan ghi ɛr.’ ”

Jizɔs akos iyɔr imandɛv puwɛ

¹¹ Mɔ Jizɔs aru izan kɔ Jerusalɛm akar ihang ingin iru kɔ urer utar Samariya ghɛ utar Galili.

¹² Mɔ anɔrɔyi kɔ ahiye urara ugen mɔ, iyɔr imandɛv puwɛ vɛ kɔr un, vɛ tire marɛmb

¹³ vɛ atah ghi imu igbong, “Jizɔs, Uwun, kɔr ishon ghu ɔs.”

¹⁴ Agɛma a ɛn avo akaa na, “Za tɛsɛn imɛnɛgh ikonogh kɔ Ɔr ipɛɛn una Aonz.” Mɔ vɛ aru izan ihang vɛ shiya.

¹⁵ Ne umɔm kɔ atɛ uvo a ɛnɛn mɔ un ashiya, ahire itiyo kɔ ghu Jizɔs, usighan Aonz ghi imo gbong;

¹⁶ ne angure inya hɔ avor Jizɔs, ukaan ghu un na uyɔr. Ɔr ungumɔ aru ɔr samariya.

¹⁷ Ne Jizɔs apine na, “Ki iyɔr puwɛ ne vɛ shiya gha? Vɛ tan anyin agenɛv yeh?

¹⁸ Aza ɔr ugen aru ungwen ava sigha Aonz gha, sa ɔr uzend ungwen tasa?”

¹⁹ Ne Jizɔs akaa ghu un na, “Mugh isa yov; isima ibɛrɛn iyow ikosu.”

Jizɔs atɛs na utorov Aonz uva

²⁰ Ihɔ ugen Ufarasi vɛ pine Jizɔs na hanamɔ ukpɛ ungwen utorov Aonz uva, arumun avo, “Mva utorov Aonz umbu kwagh ungwen iyɔr abe ɛnɛn ghɛ ase gha.

²¹ Ku kwagh ugune iyɔr vɛ kaa na, ‘Ɛn han, uvu nan!’ Zan ‘Ɛn kɔ, uvu nɔ gha!’ Itiyo ikaa utorov Aonz umbu kpa kɔ atɛ uwon.”

²² Ne akaa ayɛghɛnɛv anav, “Ahɔ anga ghi ivan ungwen ukeren ghu ɛnɛn ihɔ imɔm Uwan Ɔro, kpa ɔ ɛnɛn gha.

²³ Iyɔr vɛ ɔɔr ghu un na, ‘Unɔ, kɔ!’ Zan ‘Unan, han!’ Ka dondan avo gha.

²⁴ Ɛnmɔ inyaregh ingin nyarɛghen upav umɔm kɔisa sɛ ghi aam apav amem mɔ ne kɛru ihɔ mva Uwan Ɔro.

²⁵ Kpa umahe aya ichan ghɛkaa tsɛng ichend ingine ivɛnda un.

²⁶ “Ɛnmɔ ghɛru ɛvo Nowa, mɔ ne ghɛru ukpɛ Uwan Ɔro.

²⁷ Iyɔr vɛ yayi, vɛ mayi, vɛ ɔzɔyi akasɛv, vɛ nayi mɛyem akasɛv ghi ɔz, kpem Nowa anɔr utso utan, ijɔr ihiv ghu utar ne ikuwa ɔro agenɛv ambumɔ.

²⁸ Mɔ ne ghɛru ukpɛ Lɔt, iyɔr vɛ yayi vɛ mayi, vɛ yamyi vɛ toyi, vɛ rɔɔyi vɛ maayi.

²⁹ Kpa ihɔ ingin lɔt avond utar sodon, Aonz atind uzu ghɛ angon uzuu ɛn kɔ uvǝra usɛn kɔisa uwuwa avo amem.

³⁰ Mɔ ne ghɛru ihɔ ingin Aonz atɛs mhɛmba Uwan Ɔro kɔ amem.

³¹ Ihɔ ingumɔ, ɔr ungune angwe kɔ uha ghɛ ikaav ina kɔ itumbɛ, aka nɔrɔyi kɔ itumbɛ ikuran ikaav gha. Mɔ ne ɔr ungwen angwe kɔ ikɔr un kpa aka kuryi ava teng kwagh gha.

³² Umbur kwagh ungwen a ɛr ghu ukwas una lɔt.

³³ Hanamɔ ɔr ungwen angwe ghi inɔngnun ɔ arǝn imɛnɛgh inagh abe akor umuwa gha, hanamɔ ɔr ungwen ana umuwa una akur ghɛ awɛ.

³⁴ Mɛ ɔɔr un, imiye ingimɔ iyɔr ahar vɛru inanghɛ imɔm; Vɛ atɛng umɔm vɛ avond umɔm.

³⁵ Akasɛv ahar vɛru wuwan ikurɛ urong; Vɛ atɛng umɔm vɛ avond umɔm.

³⁶ [Anombosov ahar vɛru kɔ ghi ikɔr; Aonz atɛng umɔm avond umɔm.]”

³⁷ Ne vɛ pine un na, “Uwun kɛ hana ghɛru?” Jizɔs akaa ghɛ avo na, “Hɔ ikɔm ingi run mɔ hen ne vɛ apu amban gamberen.”