Luk 15 - Itang

Jizɔs atuwa ikaan ghi iyɔng ingine irir

¹ Mɔ iyɔr a ɔzunɛv ukpanɛv ghɛ iyɔr abev amem agambɛrayi kpembere ungwen vɛ mgba Jizɔs.

² Ne ufarasi ghɛ atɛsɛnɛv mɛnna Ujus vɛ hingnye na, “Ɔr ungwen a ɔzun iyɔr abev ashigh ayan ukwagh uyan ghɛ avo.”

³ Ne Jizɔs atuwa avo ikaan ingin:

⁴ “Ɔ ɛn umɔ uwon angwe ghi iyɔng iti-atan ne imɔm irir, nan a ɛrɛ? Aka vond ingin iti-anyin ghɛ puwɛ-atan anyin hɔ ingi yan utuho mɔ, aza ker ingiyen irir kpem a ɛn ghi iyɛ gha.

⁵ Ɔ ɛn a ɛn ghi iyɛ, agbire iyɛ avand, ghi isighan.

⁶ Mɔ kuruyi, arav akar ana urongu ghi iyɔr amban amba ahiye umɔm, na, ‘Sighan urongu ghu umwe, mɛ-ɛn ghi iyɔng iyam ingine irir mɔ.’

⁷ Mɛ ɔɔr un, ku mɔ hun isighan ihɛmba irun kɔisa ghu ɔr umɔm ube ungwen a gɛma isima kɔ Aonz, ihɛmba iyɔr iti-anyin ghu puwɛ tan anyin amban amba gbɛngang amban agba akan agɛma asɛma gha.

Jizɔs atuwa ikan ukwas ungwen akɛrɛyi usam inarigh ungun urir

⁸ “Zan ɔ ɛn ukwas ungune angwe usam ghi inarigh puwɛ ne umɔm urir. Aka meng ghi isav, a os itumbɛ atɔr aker kpem a ɛn ghɛ ɛwɛ gha?

⁹ Ɔ ɛn ukwas hun a ɛn ghɛ ɛwɛ, arav akar ana urongu iyɔr amban amba ahiye umɔm, na, ‘Sighan urong ghu mwe; Mɛ-ɛn usam ghi inarigh uwam ungun urir mɔ.’

¹⁰ Mɛ ɔɔr un, ku mɔ ne, isighan irun kɔ vudugɛr anav Aonz amban kɔisa ghu ɔr ube umɔm ungwen a gɛma isima mɔ.”

Jizɔs atuwa ikan ghu uwan unombos ungwen arir

¹¹ Jizɔs akaa na, “Ɔr ugen aru myem anombos ahar;

¹² Ne urara ungumɔ akaa utir una na, ‘Utir, bur ghu usu hin nam ukar uwam.’ Ne utir abur avo usu hun.

¹³ “Katsa tsɛng gha, uwan urara ungumɔ akura ikav inav imem, ayov kɔ utar marɛmbɛ ken ne aza ya usu una tsa-tsa ghu umuwa udang.

¹⁴ Ne mɔ aya usu una tsa-tsa, ijon ivi iru kɔ utar ungumɔ shisha, ne akaa aban un.

¹⁵ Ne anɔr utom ɔ ɛrɛn ghu ɔr umar inya hɔ utar ungumɔ, ɔr hun ana un utom kɔ ikɔr ina na anayi igo ukwagh uyan.

¹⁶ Akɛrɛyi aker asang akaa ayan angan igo iyayi mɔ, ɔr anayi un kwagh gha.

¹⁷ “Ukpɛ ungwen ase abugh un mɔ, akaa na, ‘Itomov anav utir wam amem amba ukwagh uyan tsɛng amba iyan itsɛn, ta mwe mkpoyi ijon hana?

¹⁸ Mɛ mugh isa mɛ hire kɔ utir, mkaa una: Utir, mɛ ɛr ukwagh ube ghɛ Aonz ghɛ uwɛ.

¹⁹ Mkuma ungune utam na uwan unombos uwow gha; Ne tɛngnɛm ɛn mɛru ɔr utom wow ugen.’

²⁰ Amugh ahire kɔ utir una. “Mɔ aru marɛmb ihiren, utir una a ɛn ghɛ ana ishon akɔr un ghu uwan unombos una, ne ayuz aza akuwɛ un Asuse un uhɛnghɛ.

²¹ “Uwan unombos hun, akaa utir na, ‘Utir, mɛ ɛr ukwagh ube ghɛ Aonz ghu uwɛ. Mkuma ungwen utam na uwan uwow gha.’

²² “Ne utir una akaa itomov anav, ‘Yuz! Za van un ghi ikond ingine ihimba ishiyan mɔ hin wan un. Wan un ishind uvo, ghɛ akɔv ghɛ avor.

²³ Kɔr agund ungune ahɛmba ghi igbɔrun mɔ usɔng, hin ghi ya ghi sigha.

²⁴ Itiyo-ikaa uwan unombos uwam ungune aru akpo, ahire angwe umuwa va; arir mɛ-ɛn ghɛ ana.’ Ne vɛruyi isighan.

²⁵ “Ukpɛ ungumɔ, uwan unombos una ishi aru kɔ ikɔr. Mɔ aruyi ikurun ukpemberen kɔ achiya, amgba mɔ vɛru ghi ikuhan acham uvinen.

²⁶ Ne atah wan utom ugen apine una kine ingin ghi ɛrɛnɛ?

²⁷ Ne arumun un na, ‘Uwanmgban uwow ne akur, ne utir wow awuwa un agund ugborun, na akur riyang ghɛ umakun.’

²⁸ “Ne avihi isima avenda inorun kɔ itumbɛ. Ne utir una aduwe kɔ uwen akɔr uzɔ ghu un.

²⁹ Arumun ghɛ utir una na, ‘Ne ɛn sɛ, anyom tsɛng angan mɛ ɛrɛnu utom ɛn ku ukpan uwow, mɛ ungwe mɛ venda uwɛ utom gha. Ungwe nam kas wan ivo akan mɛ sɔng mɛ-ɛr itungnun ghɛ akar am gha.

³⁰ Kpa ne ɛn sɛ uwan wow ungwen, avihiw inarigh urongu ghɛ vɛ akpɛra akur achiya, usɔng un agund ugborun!’

³¹ “Ne utir akaa ghu un na, ‘Uwan uwam, urun han ghu umwe, akaa aam ghɛ ow.

³² Ne agba akan itungnun iru ghi sighan, na uwanmgban wow ungune akpo ahire angwe umuwa va; arir ghi ɛn ana.’ ”