Luk 13 - Itang

Hanamɔ ɔr agɛma isima kɔ ghɛ Aonz

¹ Ukpɛ ungumɔ iyɔr agenɛv hen vɛ ɔɔr Jizɔs na Pilɛt awuwa iyɔr Galili agenɛv mɔ vɛru isongnun irɛv kɔ itumbɛ izwangnɛn Ujus.

² Jizɔs apine avo, “Ɔ ɛnɛn na iyɔr Galili ambumɔ avo ne ahɛmba akaa abe kɔ iyɔr Galili amɛmɛ?” “Ne vɛ ya ichan utu ungumɔ?

³ Mɛ kaa un, inga! Ɔ ɛn ugɛma asɛma kɔ ghɛ Aonz gha, un amem ukpon ɛn kɛ avo.

⁴ Zan ɔ ɛnɛn na iyɔr puwɛ akinkini amban itumbɛ itan kɔ Silɔm igba ghɛ avo ta vɛ kpo mɔ avo ne ahɛmba akaa abe kɔ iyɔr amban kɔ Jerusalɛm?

⁵ Mɛ kaa un inga, ɔ ɛn ugɛman asɛma kɔ ghɛ Aonz gha, un amem ukpon ɛn kɛ avo.”

Jizɔs atuwa avo ikan ghi ukon ungun umuwɛ atam gha

⁶ Ne Jizɔs atuwa avo ikaan ingin: “Ɔr ugen aru ukon ɔfig kɔ ikɔr ina, ne aza uzɔrun atam ne aker kas ghi itam umum gha.

⁷ Ne akaa ɔr ɔ ɛnɛn ikɔr hun, ‘Anyom atar nyan mvan uzɔrun atam ɔfig hun kpa iki umuwen gha! Gber iki kɔ iyinga ahiye han ghi ikɔr.’ ”

⁸ Kpa ɔr utom hun arumun na, “Uwun, ‘De iki inyom imɔm va, mɛ tume mɛha apus kɔ ghi itine ina.

⁹ Ɔ ɛn ghi umuwɛ inyom isa, ghɛshiya. Ɔ ɛn ghi umuwɛ gha, ta vɛ gber iki.’ ”

Jizɔs akos ukwas igund ihɔ imɛmɛn Ujus

¹⁰ Ihɔ imɛmɛn Ujus mɔ Jizɔs aru itɛsɛn kɔ itumbɛ izwangnɛn Ujus ingen,

¹¹ Ukwas ugen ungwen ajingɛjing ube ataa un iwen anyom puwɛ akinkini aru agɔɔr abe itiren isa gha.

¹² Mɔ Jizɔs a ɛnɛn ana, atah un kan ishi akaa ghu una, “Ukwas, ɔ ar ghi iwen iyow!”

¹³ Ne abɛr avo ghɛ ana, Kɛsmɛ amɔisa atire asigha Aonz!

¹⁴ Ne utaan kɔ itumbɛ izwangnɛn Ujus isima ivihi un ken shisha ɛnmɔ Jizɔs akos Ihɔ imɛmɛn Ujus. Akaa ghi iyɔr na, “Ahɔ anga atindiyar a ɛrɛn utom, van hin akos un, ka van ihɔ imɛmɛn gha.”

¹⁵ Ne Uwun arumun una, “Un iyɔr atsunuv iyɔr! Hanamɔ ɔr uwon asaghɛn agund una zan urakum una kɔ igar hin aza ma ijɔr Ihɔ imɛmɛn gha?

¹⁶ Ne ukwas ungwen, uwan ukwas una Abɛraham, Ungwen Ijɔv ikang un anyom puwɛ akinkini. Aka kwagh jing usaghɛn un, Ihɔ imɛmɛn gha?”

¹⁷ Mɔ akaan mɔ, ichuwɛ ikɔr atsɔnonov anav, kpa iyɔr agenɛv vɛ sigha akaa tsɛrɛn angan a ɛr.

Jizɔs ituwa ikaan ghi isang umɔsad ghɛ ɔyis

¹⁸ Ne Jizɔs apine na, “Nan ne utorov unav Aonz umbu? Kine mɛ kaa na umbu?

¹⁹ Umbu ɛn isang umɔsad ingiyen ɔr arɔɔn kɔ ikɔr; ives igɛma ukon ungun inon iwa aye kɔ aza ana.”

²⁰ Jizɔs apine va, “Kine va mɛ kaa na utorov Aonz umbu?

²¹ Umbu ɛn ɔyis ungwen ukwas anugwan kɔ mgom ikaren ituv atar mu samber mgom umwem.”

Jizɔs a ɔɔr ukwagh uhunza sodɔro

²² Ne Jizɔs amugh uzend akar ahiye ataanɛv ghɛ ahiye ararɛv, itɛsɛn mɔ azayi kɔ Jerusalɛm.

²³ Ɔr ugen apine un na, “Uwun, kɛ iyɔr kɛbɛyi ne Aonz aar avo?” Jizɔs arumun avo na,

²⁴ “Nɔngnun shisha ɛn unɔrun uhunza usodɔro kɔ utorov Aonz, mɛ ɔɔr un, iyɔr tsɛng vɛ kan inɔrun gha.

²⁵ Ɔ ɛn uwun itumbɛ amugh isa azɛma uhunza, utire kɔ uwen ikɛman ikɔrun uzɔ na, ‘Uwun, dumbɛ ɔs uhunza.’ “Ne arumun na, ‘Mfɔ un gha, mfɔ hɔ uvan gha.’

²⁶ “Ne ukaan na, ‘Ghi ya ghi ima urongu ghu uwɛ, utɛsɛn kɔ ahiye avasɛv.’

²⁷ “Ne arumun na, ‘Mfɔ un gha mfɔ hɔ uvan gha. Yovonum ishi un iyɔr ɛrɛnɛv akaa abe!’

²⁸ “Kɔ uwen mɔ mariyam mahɛmb ghɛ anyiye ayan, ne ghu ɛnɛn Abɛraham, Azik ghɛ Jakɔb, ghɛ aramenɛv ɛchi Aonz amem kɔ utorov Aonz, ta un vɛ ker un kɔ uwen.

²⁹ Iyɔr vɛ va kɔ utar umwem tra kɔ upav ayan, ghɛ ames, upav kɔ itogh ghɛ itiyo vɛ va atɛma kɔ ahiye avov hɔ itungnun ingin kɔ utorov unav Aonz.

³⁰ Ɛn, amban amba mase itiyɔ ɛr vɛru ghi ishi, amban kɔ ishi ɛr vɛru umase itiyɔ.”

Jizɔs avang ghi Jerusalɛm

³¹ Ukpɛ ungumɔ Ufarasi agenɛv vɛ va akaa ghu un na, “Yov han hin za ahiye ugen. Hɛrɔd Antipas aker uwuwan uwɛ.”

³² Jizɔs arumun na, “Za kaa itsinga-avanz ungumɔ na, ‘Mɛ hure ajingɛjing abev mkos iyɔr nyan ghɛ ukper, ihɔ utar mɔ mbe utom.’

³³ Kas aru nan, aka ken ken ungwen mɛza ishi ghu uzend nyan ghu ukper ghɛ uduwe. Itio ikaa aramenɛv ɛchi Aonz amba kpon kɔ uwen gha sa kɔ ahiye Jerusalɛm!

³⁴ “Un iyɔr Jerusalɛm, iyɔr Jerusalɛm, un amban umbu uwuwan aramenɛv ɛchi Aonz utan angon ghɛ amban Aonz atind kɔ ghu un. Mɛ kan akwa ghi isum ukɛghɛn un, ɛnmɔ ungɔ ikogh akun myem anav kɔ akper ana, kpa uvendan!

³⁵ Mgban! Aonz avund un ghi itumbɛ iyon. Mɛ kaa un, ɔ ɛnɛn amwe va gha kpem ukaan na, ‘Ibɛrɛn iru ghu ɔr ungwen angwe ivan kɔ itiye Aonz Uwun!’ ”