Luk 10 - Itang

Jizɔs atind ayɛghɛnɛv anav iti-atar ghu puwɛ ahar

¹ Jizɔs atsuwa ayɛghɛnɛv anav vɛru iti-atar ghu puwɛ ahar abur avo ahar-ahar atind avo kɔ ghi ishi hanamɔ ahiye utaan ghɛ ahiye amban ɛru akan aza mɔ.

² Akaa ghɛ avo na, “Usunda ungu tsɛng kpa iyɔr asundanɛv amba gha. Ram ghu Aonz uwun ikɔrɔ, hin asoor asundanɛv kɔ ikɔr.

³ Za, fɔn na mɛ gwe ghi itindin un ɛn iyɔng kɔ anyam amba mɔ.

⁴ Ka tengnɛn inarigh gha, kas ikpa uzende gha, ka tengnɛn akov ahar gha. Ka tiren ghi ihang ukaan ghi iyɔr gha.

⁵ “Hanamɔ itumbɛ ingine unɔrun, umahe, kaan na, ‘Makun aru han itumbɛ ingin.’

⁶ Ɔ ɛn ɔr angwe ungwen aker makun unɔrun ɔr hun aru ghɛ makun; aru ɔr ungwen ghɛshiya un ghu makun gha, makun uwon asan ghu un.

⁷ Sengnen hɔ ghi itumbɛ ingin vɛ ɔz un mɔ yan maan uyɔr ungun vɛ yɔr un mɔ, ɔr utom akuma mɛnɛn una. Ka zenden dangdang gha.

⁸ “Hanamɔ achiya utaan ungwen unɔrun sɛ vɛ ɔz un yan ukwagh ungwen vɛ na un.

⁹ Kos awenɛv, ɔɔr avo na, ‘Utorov unav Aonz ukpember han ghɛ avo.’

¹⁰ Hanamɔ achiya utaan ungwen unɔrun sɛ vɛ venda un mɔ, duwen kɔ ahang ukaan na,

¹¹ ‘Kas ihind ingiyen utar uwon ghi os kan avor aas, utɛsɛn ikav na, ghi tumbwe un utogh. Fɔn na Utorov unav Aonz uva kpember han ghu un.’

¹² Mɛ kaa un na ihɔ ijiri Aonz ahɛmba inan ahiye ungumɔ ichan ihɛmba utar sodom.

¹³ “Ghɛshiya ghu un gha, iyɔr Korasin ghɛ iyɔr Betsada! Itiyo ikaa ɔ ɛn akaa akondon iyɔr angan mɛ ɛr han ghu un, mɛ ɛr kɔ utar Tayi ghɛ Sidon hin vɛ gɛma asɛma avo ghi itsɔ, hin vɛ wa ikuse vɛ ish mtom itogh, utɛsɛn na vɛ de akaa abe avo.

¹⁴ Aonz akɔr, ishon ghu Tayi ghɛ Sidon ihɔ ijiri ahɛmba un.

¹⁵ Un iyɔr Kapanum, ɔ ɛnɛn na urun ghi itughun kɔ isa? Inga, Aonz azɔr un ugban kɔ uzu.”

¹⁶ Jizɔs akaa ayɛghɛnɛv anav na, “Ɔr ungwen amgba un sa amgbam. Ɔr ungwen avenda un sa avendam. Ɔr ungwen avendam sa avenda ɔr ungwen atindim.”

¹⁷ Ne ayɛghɛnɛv anav iti-atar ghu puwɛ ahar vɛru ihiren, ishighan tsɛng vɛ akaa ghu un na, “Uwun kas ajingɛjing abev vɛ aduwe kɔ ghi iyɔr, mɔ ghi tah itiye iyow.”

¹⁸ Akaa ghɛ avo na, “Mɛ ɛn Ijɔv iduwe kɔisa igba ɛn ku uriyam.

¹⁹ Mɛ na un ikɔw ungwen ɔ nyaren iyɔ ghɛ ayoz, ghɛ ikɔw ungwen ahɛmba ikɔw ajɔvɔ, ukwagh abe ɛr un gha.

²⁰ Kpa, aka ashiyan un na ajingɛjing abev amgba un gha, kpa ka shiyan un na atiye iyon vɛ angɛr kɔ ghɛ Aonz.”

²¹ Ukpɛ ungumɔ, kashiya Jizɔs shisha kɔ Ajingɛjing una Aonz, akaa na, “Utir, Aonz Uwun kɔisa ghɛ kan inya! Mɛ sigha uwɛ, ɛn uyɛr urɛhɛ ungun kɔ amban vɛ abugh ase ghɛ amban vɛ fɔ ukwagh, ta utagh kɔ myem ararɛv. Ukɔng Utir, kɛ awa isima uwow ne ɔ ɛr.

²² “Akaa amem utir uwam awam ghu uvo. Ɔr afɔn utu Uwan gha sa Utir, ɔr afɔn utu Utir gha sa Uwan, ghɛ kɔ amban Uwan atsuwa na atagh avo un.”

²³ Jizɔs agɛma kɔ ayɛghɛnɛv anav aram ghɛ avo kɔ avɛraves akaa na, “Umbun ikɔr shisha ungwen ghu ɛn akaa angan umbun ghi ɛnɛn man.

²⁴ Mɛ kaa un na aramenɛv ɛchi Aonz tsɛng ghɛ ator vɛ ker na vɛ ɛn akaa angan kpa vɛ ɛn gha, vɛ ker na atogh avo amgba akaa angan kpa vɛ amgba gha.”

Ɔr Samariya akɔr ishon

²⁵ Ihɔ igen ɔr ufɔn mɛnna una Mosis shisha itire ikaren Jizɔs ne apine un mpine na. “Ɔr utɛsɛn, kine mɛ ɛr ta mkor umuwa utserene?”

²⁶ Jizɔs arumun na, “Kine vɛ angɛr kɔ mɛnna? Ɔ ɔɔr aa nana?”

²⁷ Ɔr hun arumun Jizɔs na, “ ‘Kashiya uwɛ ghɛ Aonz Uwun uwow ghɛ isima iyow umem, umuwa uwow umem, ikɔw iyow umem mfɔ uwow umem,’ ” ghɛ “ ‘Ghɛshiya uwɛ ghɛ ɔr ungwen akpember ghu uwɛ ɛn ki iyɔr iyow.’ ”

²⁸ Jizɔs arumun una, “Ungwe jing, ɛr mɔ hin utser.”

²⁹ Ɔr hun aru na atɛs ukwagh ufɔn na un angwe jing, ne apine Jizɔs na, “Kɛ ana ne angwe ɔr ungwen akpember ghu mwe?”

³⁰ Jizɔs arumun un na; “Ɔr ugen ahiye uzend kɔ Jerusalɛm ghi zan kɔ Jɛriko, ne ayiv ghɛ itoworov vɛ chir un ihang. Vɛ hoor un akond vɛ gbire un, ashi ukpon.

³¹ “Ɔr ipɛɛn una Aonz aru izan hɔ ihang hun mɔ a ɛn ɔr ungumɔ agbir hɔ inya akar upav ayov.

³² Ɔr kɔ itum Lɛvi, ava ɛn ghɛ ana akar ihang upav ugen.

³³ “Kpa ɔr Samariya, mɔ aru kɔ ghu uzend, ava ɛnɛn ɔr hun mɔ, ishon ikɔr un ghu ɔr ungumɔ.

³⁴ Aza kɔr ɔr hun amir makurem ahaa masɔrum ɛn ki ichi akang atsar kɔ avav ɔr hun. Atɛng un urakum una aza na kɔ uzendɛv amba tsan mɔ, na a ɛnɛnyi ghɛ ana.

³⁵ Usov usen mɔ atɛng inarigh ikin ghi kuma ukimbin ahɔ utom ahar ana ɔr ɛrɛn utuwɛr ungumɔ akaa ghu un na, ‘Ikin ghi ikpend ɛr mɛ vayi mɔ mɛ va mɛ na ikin isoor mɔ.’

³⁶ “Jizɔs apine, hanagen kɛ ana kɔ avo atar amban angwe ɔr ungwen akpember hɔ ɔr ungwen ayiv vɛ gbire un mɔ?”

³⁷ Ɔr ufɔn mɛnna una Mosis arumun na, “Ɔr ungwen ishon ikɔr un ghu un mɔ.” Ne Jizɔs akaa na, “Za ɛr mɔ.”

Jizɔs aza kɔ itumbɛ Mata ghu Mɛri

³⁸ Mɔ Jizɔs ghɛ ayɛghɛnɛv anav vɛ azayi ishi ghɛ uzend kɔ Jerusalɛm mɔ, vɛ abiyen hɔ ahiye ugen ukwas ugen ungwen vɛ atayi na Mata a ɔz un ujin kɔ itumbɛ ina.

³⁹ Aru uwanomgban ukwas ungwen vɛ tayi na Mɛri, atɛma hɔ inya kpembere hɔ ikpar avoro Uwun, ghi mgban itɛsɛn ina.

⁴⁰ Kpa Mata abɛr atogh gha ɛchi uyor ungun aru iyɔrun mɔ. Ava kɔ ghu Jizɔs akaa na, “Uwun, uwa iko na uwanas ukwas avondum mwe tson ghɛ utom ɔ ɛrɛn gha? Kaa un hin ava wam uvogh.”

⁴¹ Kpa Uwun arumun “Mata, Mata uvihin isima shigh uzan iyɔr ghɛ akaa tsɛng.

⁴² Kpa ukwagh umɔm ne angwe itiyo ikaa. Mɛri achuwa ukwagh ungwen ahɛmba ishiyan, ɔr abe ahonz gha.”