РИМЛЯН-ВЛАКЛАН 4 - У Сугынь

4 ГЛАВА 1-12 Авраамым чынышке мо луктын? 13-25 Ӱшанымаш да Юмын сӧрымыжӧ.

¹ Тугеже Авраам ачана нерген ме мом каласен кертына? Айдемыла тыршымыж дене тудо кушко шуын?

² Авраам шке пашаж дене чыныш лукталтын гын‚ моктанен кертеш, но Юмын ончылно огыл.

³ Возымаш мом ойла? «Авраам Юмылан ӱшанен‚ сандене Юмо тудым чын ыштышылан шотлен».

⁴ Пашам ыштышылан тӱлымаш порылык дене пуымо пӧлек огыл, а пашадарым тудо сулен налеш.

⁵ Но кӧ пашам ок ыште‚ а языкан-влакым чыныш лукшо Юмылан ӱшана‚ тудо тиде ӱшанымашыжлан кӧра чын ыштышылан шотлалтеш.

⁶ Кӧм Юмо‚ пашажым ончыде‚ чын ыштышылан шотла‚ тыгайым Давидат поро пиалан манеш:

⁷ «Кӧн закондымылыкшым Юмо кудалтен да кӧн языкшым петырен‚ тудо поро пиалан.

⁸ Кӧлан Юмо языкым ок шотло‚ тудо еҥ поро пиалан».

⁹ Поро пиалан манмыже пӱчман-влаклан веле мо, але пӱчдымӧ-влакланат? Ме ойлена: «Ӱшанымыжлан кӧра Авраам чын ыштышылан шотлымо лийын».

¹⁰ А кунам тиде лийын? Пӱчмӧ йӱлам ыштымеке але пӱчмӧ деч ончыч? Пӱчмӧ йӱлам ыштымеке огыл‚ а пӱчмӧ дечын ончыч.

¹¹ Авраам пӱчдымӧ лиймыж годымак ӱшанымыжлан кӧра чын ыштыше улмаш, тидым ончыкташ манын, тудо пӱчмаш палым налын. Тыгеракын, ӱшаныше, но пӱчдымӧ еҥ-влакат чын ыштышылан шотлалтышт манын‚ Авраам нунылан чылаштланат ача.

¹² Тудо пӱчман-влакланат ача‚ но чылаштлан огыл, а ӱшанымаш дене илыше пӱчман-влаклан, Авраамын пӱчмӧ деч ончычак ӱшанымыж семын ӱшаныше-влаклан.

¹³ Тӱнян наследникше лияш сӧрымаш Авраамлан да тудын тукымжылан закон гоч пуалтын огыл. Авраам ӱшанен, санденак Юмо тудым чын ыштышылан шотлен да сӧрымашым пуэн.

¹⁴ Законлан эҥертыше-влак наследник лийыт гын‚ ӱшанымаш укешке лектын да сӧрымын вийже йомын.

¹⁵ Закон Юмын шыдыжым луктеш‚ а кушто закон уке‚ тушто законым пудыртымашат уке.

^16-17 Сӧрымаш Юмын порылыкшылан кӧра лийже манын, тудо айдемын ӱшанымашешыже негызлалтеш. Тыгеже сӧрымаш Авраамын уло тукымжылан пеҥгыде лиеш: законлан эҥертыше-влаклан веле огыл‚ но Авраамын ӱшанымашыжлан эҥертыше-влакланат. Возымо семын Авраам чылаланна ача: «Мый тыйым шуко калыкын ачажым ыштенам». Авраам Юмылан ӱшанен да Тудын ончылно мыланна ача лийын, а Юмо колышо-влаклан илышым пуа‚ лийдымым лиймашке ӱжеш.

¹⁸ Ӱшанен вучымаш шукталт ок кертла чучын гынат‚ Авраам инанен да ӱшанен‚ тидын дене «шуко калыкын ачаже» лийын. Тыгеракын, «Тыйын тукымет тунар шуко лиеш» манын каласыме шукталтын.

¹⁹ Авраамлан шӱдӧ ий наре лийын‚ капшат лывыжген‚ Сарранат кӧргыжӧ лывыжген. Чыла тидым ужын гынат, ӱшанымашыже иземын огыл.

²⁰ Юмын сӧрымӧ шотышто Авраам кокытеланен огыл, ӱшаным йомдарен огыл‚ а ӱшанымаш тудым пеҥгыдемден. Авраам Юмым чапландарен,

²¹ Юмын шке сӧрымыжым шукташ куатше уло манын‚ пеҥгыдын ӱшанен‚

²² санденак Юмо тудым чын ыштышылан шотлен.

^23-24 «Чын ыштышылан шотлен» манме шомак тудын шотышто веле огыл‚ а мемнан шотыштат серыме. Меат, Господьна Иисус [Христосым] колымаш гыч Ылыжтышылан ӱшаныше-влак, чын ыштышылан шотлалташ тӱҥалына.

²⁵ Мемнан сулыкланна кӧра Иисусым пушташ пуымо, мемнам чыныш лукташ манын, Тудо ылыж кынелын.