Почм 6 - У Сугынь

6 ГЛАВА 1-17 Тӱҥалтыш куд печатьым почмаш.

¹ Пачан шым печать гыч иктыжым почмыжым мый ужынам да ныл илыше гыч иктыжын кӱдырчӧ гай йӱк дене «Тол да ончал!» манын каласымыжым колынам.

² Вара мый ужынам: теве ош имне, тудын ӱмбалне шинчышын пикш йоҥежше лийын. Тудлан вуйшӱдышым пуэныт, тудо сеҥыше семын да сеҥаш лектын.

³ А кунам Пача кокымшо печатьым почын, мый ныл илыше гыч кокымшын «Тол да ончал!» манын ойлымыжым колынам.

⁴ Тул гай йошкар вес имне лектын. Еҥ-влак икте-весым пуштедышт манын, тудым кушкыж шинчышылан мланде ӱмбач тыныслыкым налаш вийым пуэныт, тыгак тудлан кугу кердым пуымо.

⁵ А кунам Пача кумшо печатьым почын, ныл илыше гыч кумшыжын «Тол да ончал!» манын каласымыжым колынам. Теве шем имньым ужынам, тудын ӱмбалныже шинчышын кидыштыже виса лийын.

⁶ Ныл илыше кокла гыч лекше йӱкым колынам, тудо каласен: «Хиникс виса шыдаҥ ик динарийым шога, кум хиникс виса шожат – динарийымак. А олив ӱйым да йошкар аракам ит локтыл».

⁷ А кунам Пача нылымше печатьым почын, мый ныл илыше гыч нылымшыжын йӱкшым колынам, тудо ойлен: «Тол да ончал!»

⁸ Мый ужынам: теве ужар-сур имне да ӱмбалныже имнешке, тудын лӱмжӧ колымаш, почешыже тамык коштын. Тудын кид йымакыже мландын нылымше ужашыже пуалтын. Керде дене, шужымаш дене, чер дене да янлык-влак дене еҥым пуштедаш тудлан власть пуалтын.

⁹ А кунам Пача визымше печатьым почын, жертвенник йымалне мый Юмын шомак верч да таныклымышт верч пуштмо-влакын чоныштым ужынам.

¹⁰ Нуно виян йӱк дене кычкыреныт: «Святой да Чын Господь, эше мыняр жап Тый мланде ӱмбалне илыше-влакым от судитле да мемнан вӱрна верч ӱчым от шукто?»

¹¹ Нунылан кажныжлан ош вургемым пуэныт. Тендан дене пырля пашам ыштыше еҥ да иза-шольо-влак кокла гыч шукыштым тендан семынак пуштыт, нунын чотышт тичмаш лиймешке, эше икмыняр жап чытыза манын, нунылан каласеныт.

¹² А Пачан кудымшо печатьым почмекыже, мый ужынам: теве мланде чот чытырналтын, кече шем чоштыра куэм гайыш савырнен, тылзе вӱр гай йошкарге лийын.

¹³ Кушкын шудымо смоква саскам кугу мардеж рӱзен велыме семын кавасе шӱдыр-влак мланде ӱмбаке йогеныт;

¹⁴ вӱдылка книгам пӱтырымӧ семын кава чакнен йомын, чыла курык да остров-влак шке верышт гыч тарваненыт.

¹⁵ Мландӱмбалсе кугыжа, тӧра ден поян-влак, сарзывуй да виян-влак, чыла кул ден чыла эрыкан-влак мланде помыш ден курык шелше коклаш шылыныт

¹⁶ да курык ден кӱ-влаклан ойленыт: «Ӱмбакына камвочса да престолышто Шинчышын чурийже да Пачан шыдыж деч мемнам шылтыза!

¹⁷ Вет Тудын шыдыжын кугу кечыже толын, да кӧ тидым чытен шоген кертеш?»