Почм 15 - У Сугынь

15 ГЛАВА 1-8 Шым Суксо да шым азап.

¹ Пылпомышто мый кугу да ӧрыктарыше вес палдарыше палым ужынам: пытартыш шым эҥгекым кучышо шым Суксо. Нине шым азап дене Юмын шыдыже мучашлалтеш.

² Мый тул йӧре варыме янда теҥыз гайым ужынам. Янлыкым да тудын тӱсшым, палыжым да лӱм чотшым сеҥыше-влак янда теҥыз ӱмбалне шогеныт да Юмын кӱсле-влакшым кученыт.

³ Нуно Юмын тарзыже Моисейын мурыжым да Пачан мурыжым муреныт: «Господь Юмо, Чылакучышо, Тыйын ыштымет кугу да ӧрыктарыше! Святой-влакын Кугыжашт, Тыйын корнет чын да поро!

⁴ Господь, кӧ гына Тый дечет огеш лӱд, кӧ гына лӱметым ок чапландаре? Тый веле святой улат. Калык-влак чылан толыт да Тыйын ончылнет, сукен, вуйым сават, вет Тыйын чын пашат-влак почылтыныт».

⁵ Вара мый ужынам: теве пылпомышто таныклымаш скинийысе храм почылтын.

⁶ Шым эҥгекым кучышо шым Суксо храм гыч лектын. Нуно волгалтше ару йытын вургеман лийыныт, а оҥыштышт шӧртньӧ ӱштӧ лийын.

⁷ Вара ныл илыше гыч иктыже курым-курымеш илыше Юмын шыдыж дене темыме шым шӧртньӧ чашым шым Суксылан пуэн.

⁸ Юмын чапше ден Тудын куатше деч лекше шикш храмым темен, да шым Суксын шым эҥгекше шукталтмешке, храмыш нигӧ пурен кертын огыл.