Почм 10 - У Сугынь

10 ГЛАВА 1-11 Вӱдылка книгам кучышо Суксо.

¹ Вара мый эше ик Суксым ужынам. Тудо кугу куатан лийын, пылпомыш гыч волен. Вургемже пыл лийын, вуй ӱмбалныже – шонанпыл, шӱргыжӧ кече гай, йолжо тул меҥге гай.

² Кидыштыже тудо почмо книгам кучен. Пурла йолжым теҥыз ӱмбаке шынден, шолажым – мланде ӱмбаке,

³ да лев ырлыме семын виян йӱк дене кычкыралын. А кунам тудо кычкыралын, шым кӱдырчӧ кажныже шке йӱкшӧ дене ойлаш тӱҥалын.

⁴ Кажне шым кӱдырчӧ шке йӱкшӧ дене ойлымеке, мый возаш шонышым, но пылпомыш гыч йӱкым кольым: «Шым кӱдырчӧ мом ойлымым ит палдаре, тидым ит возо».

⁵ Вара теҥыз да мланде ӱмбалне шогышо мыйын ужмо Суксо кидшым пылпомыш велке нӧлталын

⁶ да кавам да тушто улшым, мландым да тушто улшым, теҥызым да тушто улшым Пӱрышӧ, курым-курымеш Илыше дене товатлен: «Ынде жап ок лий.

⁷ Шымше Суксын пучшо йоҥгалтме кечылаште Юмын тайныже Тудын пророк тарзыж-влаклан увертарымыж семынак шукталтеш».

⁸ А пылпомыш гыч мыйын колмо йӱк адак мылам каласен: «Мий, теҥыз да мланде ӱмбалне шогышо Суксын кид гычше почмо книгам нал».

⁹ Мый Суксо деке мийышым, книгам пуаш йодым. А тудо мылам ойлен: «Нал да коч. Тыйын кӧргыштет тудо кочым луктеш, но умшаштет мӱй гай шере лиеш».

¹⁰ Мый Суксын кидше гыч книгам нальым да кочкым, умшаштем тудо мӱй гай шере ыле, а кочмекем, кӧргыштем кочо лие.

¹¹ А тудо мылам ойлен: «Тыланет шуко калык, тукым, йылме да кугыжа нерген адакат пророкла каласкалаш кӱлеш».