Мк 8 - У Сугынь

8 ГЛАВА 1-10 Ныл тӱжем еҥым пукшымаш. 11-13 Юмын палым ончыкташ йодмаш. 14-21 Ирод ден фарисей-влакын руышт. 22-26 Вифсаидаште сокырым паремдымаш. 27-30 Петр Иисусым Христос манеш. 31-38 – 9:1 Иисус Шкенжын колымыж да ылыжмыж нерген каласкала.

¹ Тиде кечылаштак моткоч шуко еҥ погынен, а кочкашышт нимо лийын огыл. Иисус тунемшыж-влакым Шкеже деке ӱжын да каласен:

² «Нине еҥым чаманем. Нуно ынде кум кече Мый денем пырля улыт, а кочкашышт нимо уке.

³ Мый нуным шужышым мӧҥгышкышт колтем гын, корнеш ярнат. Южышт тора гыч толшо улыт».

⁴ Тунемшыж-влак Тудлан вашештеныт: «Чылам пукшаш манын, тыште, ир мландыште, кушеч тынар киндым налаш лиеш?»

⁵ Иисус нунын деч йодын: «Тендан киндыда кунар уло?» Нуно вашештеныт: «Шымыт».

⁶ Иисус калыклан мланде ӱмбалан верланаш кӱштен. Вара тиде шым киндым налын, Юмылан таум ыштен, тодылын да тунемшыж-влаклан, пуэдышт манын, пуэн. А нунышт киндым калыклан пуэденыт.

⁷ Нунын икмыняр изи колыштат лийын. Иисус тидымат благословитлен да шеледен пуаш кӱштен.

⁸ Чылан кочкын темыныт. Вара кодшо кинде катышым шым комдым погеныт.

⁹ Кочшо-влак ныл тӱжем нарын лийыныт. Иисус калыкым колтен,

¹⁰ тунамак тунемшыж-влак дене пырля пушышко шинчын да Далмануф кундемыш каен.

¹¹ Иисус деке фарисей-влак ӱчашаш манын миеныт. Тудым тергаш шонен, палдарыше палым ончыкташ йодыныт.

¹² Иисус келгын шӱлалтен да пелештен: «Молан тиде тукым палдарыше палым йодеш? Мый тыланда чынак ойлем, тиде тукымлан пале ок пуалт».

¹³ Нуным коден, уэш пушыш шинчын да вес серыш вончен.

¹⁴ Тунемшыж-влак пеленышт киндым налаш монденыт. Пушышто нунын ик сукыр гына лийын.

¹⁵ Иисус нунылан кӱштен: «Ончыза, фарисей-влакын руышт деч да Иродын ружо деч шекланыза».

¹⁶ А нуно шке коклаштышт шонкаленыт: «Мемнан киндына уке».

¹⁷ Тидым пален, Иисус каласен: «Те молан киндына уке манын ойледа? Те алят огыда ыҥле да огыда умыло мо? Шӱмда алят кӱэмалтше мо?

¹⁸ Тендан шинчада уло, огыда уж? Пылышда уло, огыда кол? Огыда шарне?

¹⁹ Вич сукыр киндым вич тӱжем еҥлан тодыл пуымем деч вара те кодшо катышыж дене мыняр комдым теменда?» «Латкокытым», – вашештеныт.

²⁰ «А кунам Мый шым сукыр киндым ныл тӱжем еҥлан тодыл пуэнам, мыняр комдо кодшо катышым погенда?» «Шымытым», – вашештеныт нуно.

²¹ Иисус нунылан каласен: «Те кузе огыда умыло?»

²² Вифсаидаш толмекыже, Иисус деке сокырым конденыт да тудын деке тӱкнаш йодыныт.

²³ Иисус сокыр еҥым кидше гыч кучен, ял гыч вӱден луктын. Вара тудын шинчашкыже шӱвалын, ӱмбакыже кидшым пыштен да йодын: «Иктаж-мом ужат?»

²⁴ Тудыжо ончалын да ойлен: «Мый эртен кайыше еҥ-влакым ужам, нуно пушеҥгыла койыт».

²⁵ Иисус тудын шинчаж ӱмбаке уэш кидшым пыштен. Иисус тудлан ончалаш кӱштен, да тудо паремын, чыла раш ужаш тӱҥалын.

²⁶ Иисус тудым мӧҥгыжӧ колтен да каласен: «Ялышке ит пуро да тушто тидын нерген нигӧлан ит каласкале».

²⁷ Иисус тунемшыж-влак дене пырля Филипп-Кесарий воктенысе яллашке каен. Корнышто Иисус нунын деч йодын: «Мыйым калык кӧлан шотла?»

²⁸ Тунемшыж-влак вашештеныт: «Иктышт – Тынеш Пуртышо Иоаннлан, весышт – Илиялан, кумшышт – пророк кокла гыч иктыжлан».

²⁹ Тудо нунын деч йодын: «А те кузе шотледа, Мый кӧ улам?» Петр вашештен: «Тый Христос улат».

³⁰ Шкеж нерген нигӧлан каласаш огыл манын, Иисус нуным чарен.

³¹ Вара Айдеме Эргын шуко орлыкым ужшашыж нерген Иисус тунемшыж-влаклан туныкташ тӱҥалын. Калык кугурак, архиерей ден закон туныктышо-влак Тудым йӧрдымыш луктыт. Тудым пуштыт, но кум кече гыч Тудо ылыж кынелеш.

³² Тидын нерген шылтыде ойлен. А Петр Иисусым ӧрдыжкӧ ӱжын да шӧрен ойлаш тӱҥалын.

³³ Но Иисус савырнен, тунемшыж-влак ӱмбаке ончалын да Петрлан пеҥгыдын каласен: «Кораҥ Мый дечем, сатана! Тыйын шонымет айдемын, а Юмын огыл».

³⁴ Вара Иисус калыкым да тунемшыж-влакым Шкеж деке ӱжын да каласен: «Кӧ почешем кайынеже, шке эрыкшым кудалтыже, шке ыресшым налже да почешем ошкылжо.

³⁵ Вет кӧ шке чонжым утарынеже, тудо йомдара, а кӧ чонжым Мыйын верч да Поро Увер верч йомдара, тудо чонжым утара.

³⁶ Уло тӱням кидышкыже налеш, но чонжылан зияным конда гын, айдемылан могай пайда?

³⁷ Айдеме мо дене чонжым сулен налеш?

³⁸ Яжарланыше да языкан тиде тукым коклаште Мый дечем да Мыйын шомакем деч кӧ вожылеш, Айдеме Эргат Ачажын чапше дене святой Суксо-влак дене пырля толмыж годым тудын деч вожылеш».