Мк 11 - У Сугынь

11 ГЛАВА 1-11 Иисус Иерусалимыш пура. 12-14 Саскадыме смоква пушеҥге. 15-19 Иисус храм гыч сатучо-влакым поктен луктеш. 20-26 Кошкышо смоква пушеҥге. 27-33 Иисус деч Тудын властьше нерген йодыштыт.

¹ Иерусалим деке лишеммышт годым нуно Елеон курыкысо Виффагий ден Вифаний деке миеныт. Иисус кок тунемшыжым ончык колтен

² да нунылан манын: «Ончылныда улшо ялыш кайыза. Тушко пурымекыда, те тымарте нигӧат кушкыждымо, йолыштен шогалтыме самырык оселым тунамак ужыда. Тудым мучыштарыза да вӱден кондыза.

³ ”Молан тидым ыштеда?” манын йодыт гын, каласыза: ”Осел Господьлан кӱлеш, вашке тудым мӧҥгеш колта”».

⁴ Тунемшыж-влак каеныт, уремыште капка воктеке йолыштен шогалтыме самырык оселым ужыныт да тудым мучыштареныт.

⁵ Тушто шогышо кокла гыч южышт нунылан ойленыт: «Мом те ыштеда? Молан самырык оселым мучыштареда?»

⁶ Тунемше-влак Иисус кузе кӱштымӧ семынак ойленыт. Еҥ-влак нуным колтеныт.

⁷ Нуно самырык оселым Иисус деке конденыт, осел ӱмбак вургемыштым пыштеныт. Иисус кушкыж шинчын.

⁸ Шукынжо корнеш вургемыштым шареныт, молышт – пушеҥге гыч пӱчкын налме укшым.

⁹ Ончыч кайыше калыкат, шеҥгеч мийыше-влакат кычкыреныт: «Осанна! Господь лӱм дене Толшо тек моктымо лиеш!

¹⁰ Мемнан Давид ачанан Господь лӱм дене лишемше кугыжанышыже тек моктымо лиеш! Тек осанна пылпомышто йоҥгалтеш!»

¹¹ Иерусалимыш мийымеке, Иисус храмыш пурен. Чыла ончен савырнен, но кас шуынат, латкок тунемшыж дене пырля Вифанийыш каен.

¹² Вес кечын Вифаний гыч лекмышт годым Иисусын кочмыжо шуын.

¹³ Тудо тора гычак лышташ дене леведалтше смоква пушеҥгым ужын. Ала саскаже уло манын, лишкырак ончалаш миен, но пушеҥге деке лишеммеке, лышташ деч молым нимомат муын огыл. Саска лийме жап але шуын огыл улмаш.

¹⁴ Тунам Иисус смоква пушеҥгылан каласен: «Тыйын саскатым ынде нигӧ нигунам ынже коч!» Тунемшыж-влак Тудын мутшым колыныт.

¹⁵ Иерусалимыш мийымекышт, Иисус храмыш пурен да тушеч сатум ужалыше ден налше-влакым поктен лукташ тӱҥалын. Тудо окса вашталтыше-влакын ӱстелыштым да кӧгӧрчен ужалыше-влакын теҥгылыштым савыркален кышкен,

¹⁶ храм кудывече гоч ӱзгарым нумал каяш чылалан чарен.

¹⁷ Тудо нуным тыге туныктен: «”Мыйын пӧртем чыла калык-влакын кумалме пӧртышт лиеш” манын возымо огыл мо? А те тудым агыше-влакын пыжашышкышт савыренда!»

¹⁸ Архиерей ден закон туныктышо-влак тидым колыныт. Иисусын туныктымыжо калыкым чот ӧрыктарен, сандене нуно Тудын деч лӱдыныт да, Тудым кузе пытараш манын, йӧным кычалаш тӱҥалыныт.

¹⁹ Кастене Иисус ола гыч лектын каен.

²⁰ Эрдене эрак, эртен кайымышт годым, нуно смоква пушеҥгым вож марте кошкен шогалшым ужыныт.

²¹ Мо лиймым шарналтен, Иисуслан Петр ойлен: «Равви, ончо! Тыйын каргыме смоква пушеҥгет кошкен!»

²² Иисус каласен: «Юмылан ӱшаныза.

²³ Тыланда чынак ойлем: кӧ тиде курыкланат ”Нӧлталт да теҥызыш шуҥгалт” манын кӱшта да, шӱмыштыжӧ кокытеланыде, кӱштымыж семын лиеш манын ӱшана гын, тыгак лиеш.

²⁴ Сандене тыланда ойлем: кумалмаштыда мом йодыда, чылажымат налына манын ӱшаныза, тунам йодмыда шукталтеш.

²⁵ Кунам кумал шогеда, тендан ваштареш еҥ-влакын титакыш пурымыштым кудалтыза, тунам Пылпомышсо Ачадат титакдам кудалта.

²⁶ Еҥын титакшым огыда кудалте гын, Пылпомышсо Ачадат тендан языкдам ок кудалте».

²⁷ Иисус тунемшыж-влак дене пырля адак Иерусалимыш толын. А кунам Иисус храмыште коштын, Тудын деке архиерей, закон туныктышо ден калык кугурак-влак миеныт.

²⁸ Нуно йодыныт: «Могай власть дене Тый чыла тидым ыштылат? Кӧ Тыланет тидым ышташ властьым пуэн?»

²⁹ Иисус нунылан вашештен: «Мыят тыланда йодышым пуэм. Мыйын йодышлан вашештыза, тунам Мыят могай власть дене чыла тидым ыштымем каласем.

³⁰ Иоаннын тынеш пуртымыжо Пылпомыш гыч але айдеме деч лийын? Мыланем вашмутым пуыза».

³¹ Нуно шке коклаштышт каҥашеныт: «Пылпомыш гыч манына гын, Тудо каласа: ”Вара молан те тудлан ӱшанен огыдал?”

³² Айдеме деч манына гын...» Нуно калык деч лӱдыныт, Иоанным чыланат пророкланак шотленыт.

³³ Сандене нуно Иисуслан вашештеныт: «Огына пале». Иисус каласен: «Тугеже Мыят могай власть дене тидым ыштымем ом ойло».