Мф 15 - У Сугынь

15 ГЛАВА 1-20 Юмын кӱштымыжӧ да айдемын йӱлаже. 21-28 Ханаан калык ӱдырамашын ӱшанымыже. 29-31 Иисус еҥ-влакым паремда. 32-39 Ныл тӱжем еҥым пукшымаш.

¹ Тунам Иерусалим гыч Иисус деке фарисей ден закон туныктышо-влак толыныт да ойленыт:

² «Молан Тыйын тунемшет-влак ача-кочана-влакын йӱлаштым пудыртылыт? Киндым кочмышт деч ончыч кидым огыт муш».

³ Иисус нунылан вашештен: «А молан те шке йӱлаланда кӧра Юмын кӱштымыжым пудыртылыда?

⁴ Вет Юмо кӱштен: ”Ача-аватым пагале”, тыгак ”Кӧ шке ачаж але аваж нерген осал мутым ойла, тудым тек пуштыт”.

⁵ А те ойледа: кӧ ачажлан але аважлан ”Мом тыланет пуышаш улам ыле, тидым Юмылан надыр шотеш пуэнам” манын каласа,

⁶ тудо ачаж-аважым ок пагале гынат кертеш. Тыге те шке йӱлаланда кӧра Юмын кӱштымыжым ӧрдыжеш кодеда.

⁷ Сайла кояш тӧчышӧ-влак! Кунам Исаия тендан нерген пророкла ойлен, чын лийын. Тудо каласен:

⁸ ”Тиде калык Мый декем мутшо дене лишемеш, Мыйым йылмыж дене пагала, но нунын шӱмышт Мый дечем мӱндырнӧ.

⁹ Арам нуно Мылам кумалыт: Мыйын туныктымем олмеш айдемын кӱштымым веле туныктат”».

¹⁰ Иисус Шкеж деке калыкым ӱжын да каласен: «Колыштса да умылыза.

¹¹ Умшашке мо пура, тудо айдемым ок амырте, а умша гыч лекше – айдемым амырта».

¹² Тунам тунемшыж-влак лишемыныт да ойленыт: «Палет мо, ойлыметым колын, фарисей-влак ӧпкелалтыныт».

¹³ Иисус вашештен: «Мыйын Пылпомышсо Ачам шынден огыл гын, кеч-могай кушкылымат вожге сомылат.

¹⁴ Фарисей-влакым шотыш ида нал, нуно сокыр-влакын сокыр вӱден коштыктышышт улыт. А сокыр сокырым вӱда гын, коктынат вынемыш пурен каят».

¹⁵ Петр Тудлан каласен: «Тиде туштен каласыметым мыланна умылтаре».

¹⁶ «Теат але огыда умыло мо? – йодын Иисус.

¹⁷ – Эшеат огыда ыҥле мо: умшашке пурышо – айдемын кӧргыж гоч эрта да тӱжваке лектеш,

¹⁸ а умша гыч лекше – шӱм гыч лектеш, тидыже айдемым амырта.

¹⁹ Вет шӱм гыч осал шонымо, пуштмо, еҥ вате дене коштмо, яжарланыме, шолыштмо, шойышт таныклыме, мыскылыме лектыт.

²⁰ Тидыже айдемым амырта, а кидым мушде кочмыжо айдемым ок амырте».

²¹ Тушеч лекмеке, Иисус Тир ден Сидон кундемышке каен.

²² Теве тиде кундемыште илыше Ханаан калык ӱдырамаш толын да Тудлан кычкырен: «Господь, Давидын Эргыже! Мыйым чамане! Ӱдырем осал шӱлыш дене шучкын орлана!»

²³ Но Иисус тудлан ик мутымат вашештен огыл. Тунемшыж-влак Иисус деке лишемыныт да йодыныт: «Кораҥаш тудлан кӱштӧ, почешна кычкыра».

²⁴ Иисус каласен: «Мыйым Израиль калык кокласе йомшо шорыкышт деке веле колтымо».

²⁵ А ӱдырамаш Иисус деке миен, кумык возын да ойлен: «Господь, полшо мыланем!»

²⁶ Тудыжо вашештен: «Йоча деч киндым шупшын налын, пийлан кудалташ сай огыл».

²⁷ «Господь, тидыже тыгак, – каласен ӱдырамаш. – Но пий-влакат озаштын ӱстембач камвочшо пудыргым кочкыт.»

²⁸ Тунам Иисус тудлан каласен: «О, ӱдырамаш, тыйын ӱшанымашет пешак кугу, тек тыланет шонымет семынак лиеш». Тудо жапыштак ӱдыржӧ паремын.

²⁹ Иисус тушеч каен, Галилей теҥыз деке толын, курыкыш кӱзен да тушан шинчын.

³⁰ Тудын деке моткоч шуко калык лишемын, пырля окшакым, сокырым, йылмыдымым, чолакым да шуко молым конденыт да Иисусын йол воктекше пыштеныт. Тудо нуным паремден.

³¹ Йылмыдымым ойлаш тӱҥалшым, чолакым тазам, окшакым коштын кертшым, сокырым ужаш тӱҥалшым ужмеке, калык моткоч ӧрын да Израильын Юмыжым моктен.

³² А Иисус тунемшыж-влакым Шкеж деке ӱжын да нунылан каласен: «Нине еҥ-влакым чаманем. Нуно ынде кум кече Мый денем улыт, а кочкашышт нимо уке. Корнышто ынышт ярне манын, нуным шужышым ынем колто».

³³ Тунемшыж-влак вашештеныт: «Тынар шуко еҥым пукшаш ситыше киндым ир мландыште кушто муына?»

³⁴ «Тендан кунар киндыда уло?» – йодын Иисус. «Шым сукыр кинде да икмыняр изи кол», – каласеныт нуно.

³⁵ Тунам Иисус еҥ-влаклан мланде ӱмбаке шинчаш кӱштен.

³⁶ Шым сукыр киндым да колым налын, Иисус тауштен пелештен да тодылын, тунемшыж-влаклан пуэн, а нунышт – калыклан.

³⁷ Чылан теммешке кочкыныт, кодшо катышым шым комдо тич погеныт.

³⁸ Ӱдырамаш ден йочам шотлаш огыл гын, кочшо еҥже ныл тӱжем лийын.

³⁹ Калыкым колтымеке, Иисус пушыш шинчын да Магдала кундемыш каен.