Лк 24 - У Сугынь

24 ГЛАВА 1-12 Ылыж кынелмаш. 13-35 Еммаусыш кайыме корнышто. 36-49 Ылыжше Иисусын тунемшыж-влаклан кончымыжо. 50-53 Иисусын пылпомышко нӧлталтмыже.

¹ Шуматкече эрлашыжым, эрдене эрак, ӱдырамаш-влак, ямдылыме ӱйыштым налын, шӱгар деке толыныт. Нунын дене пырля икмыняр вес еҥ лийын.

² Нуно ужыныт: шӱгар аҥым петырыше кӱм кораҥдыме.

³ А кӧргышкӧ пурымеке, Господь Иисусын капшым муын огытыл.

⁴ Кунам ӱдырамаш-влак мом ужмыштлан ӧрыныт, кенета ончылнышт йылгыжше вургеман кок пӧръеҥ лектын шогалын.

⁵ Лӱдмышт дене ӱдырамаш-влак вуйыштым кумык сакеныт, да пӧръеҥ-влак нунылан ойленыт: «Молан те илышым колышо-влак коклаште кычалыда?

⁶ Тудо тыште уке, а ылыж кынелын. Эше Галилейыште улмыж годым мом тыланда ойлен, шарналтыза:

⁷ ”Айдеме Эрге языкан еҥ-влакын кидыш пуалтшаш, пудален сакыме лийшаш да кумшо кечын ылыж кынелшаш”».

⁸ Нуно Тудын мутшым шарналтеныт.

⁹ Шӱгар деч пӧртылмеке, чыла тидым латик тунемшыжлан да чыла молылан каласкаленыт.

¹⁰ Ӱдырамаш-влак Мария Магдалина, Иоанна, Иаковын Мария аваже да молат лийыныт. Нуно Апостол-влаклан тидым каласкаленыт,

¹¹ но нунылан мутышт так ойлыштмыла чучын, ӱдырамаш-влаклан ӱшанен огытыл.

¹² Туге гынат Петр тунамак шӱгар деке куржын. Ончалаш пӱгырнымеке, вӱдылмӧ вынер кийымым веле ужын да, мо лиймылан ӧрын, мӧҥгеш пӧртылын.

¹³ Тиде кечынак Иерусалим гыч Еммаус манме ялыш – тиде корным йолын кок шагатыште эрташ лиеш улмаш – кок тунемшыже каен

¹⁴ да, мо лийын, чылаж нергенат шке коклаштышт мутланеныт.

¹⁵ Мутланымышт да шонкалымышт годым Иисус Шкежат нунын деке лишемын да пырля ошкылын.

¹⁶ Но нунын шинчашт сокыр гай лийын, нуно Тудым пален огытыл.

¹⁷ Иисус нунылан каласен: «Кайышыла те мо нерген мутланеда? Молан те шӱлыкан улыда?»

¹⁸ Иктыже, Клеопа лӱманже, Иисуслан каласен: «Тиде кечылаште тушто мо лийме нерген палыдымыже Иерусалимыш толшо-влак коклаште Тый веле улат докан».

¹⁹ Иисус йодын: «Мо нерген?» Нуно каласеныт: «Назарет Иисус дене мо лийме нерген. Тудо пророк лийын, Юмо да уло калык ончылно паша денат, шомак денат виян,

²⁰ но мемнан архиерейна да вуйлатышына-влак Тудым кучен пуэныт да пушташ пунчалым луктыктеныт, Тудым ыресеш пудален сакеныт.

²¹ А ме ӱшанен улына: кӧ Израильым эрыкыш лукшаш, тиде – Тудо. Но але тиде чыла огыл: Иисус дене тыге лиймылан таче кумшо кече,

²² а теве мемнан ӱдырамаш кокла гыч икмынярже мемнам ӧрыктарыш. Нуно эрдене эрак шӱгар деке каеныт,

²³ Тудын капшым муын огытылат, пӧртылыныт да ойленыт: мыланна Суксо-влакат конченыт да Иисус ила маныныт.

²⁴ Мемнан дене пырля лийше кокла гыч икмынярышт шӱгар деке каеныт да ӱдырамаш-влак каласкалыме гайымак ужыныт, но Тудым Шкенжым ужын огытыл».

²⁵ Иисус каласен: «Могай те шонен моштыдымо айдеме улыда! Мом пророк-влак ойленыт, тудлан ӱшанаш тендан шӱмда могай юватылше!

²⁶ Христос тиде орланымаш гоч эртышаш да вара чапышкыже шушаш огыл ыле мо?»

²⁷ Вара Моисей деч да чыла пророк деч тӱҥалын, Шкеж нерген уло Возымаште мом каласыме, нунылан умылтарен.

²⁸ Кудо ялыш каеныт, тушко лишеммеке, Иисус умбакыжат каяш шонышыла койын.

²⁹ Но Клеопа да вес тунемшыже Тудым чареныт: «Мемнан дене пырля код, кече кас велке тайнен». Нунын дене кодаш манын, Иисус пӧртыш пурен.

³⁰ Нунын дене ӱстелтӧрыштӧ лиймыж годым Иисус киндым налын, благословитлен, тодылын да нунылан пуэн.

³¹ Тунам шинчашт почылтын да нуно Тудым паленыт, но Иисус нунылан койдымо лийын.

³² Тунемшыж-влак икте-весылан ойленыт: «Мыланна корнышто ойлымыжо, Возымашым умылтарымыже годым шӱмна ыш йӱлӧ мо?»

³³ Нуно кынелыныт да тунамак Иерусалимыш пӧртылыныт. Тушто пырля погынышо латик Апостол да моло тунемшыж деке миеныт.

³⁴ Погынышо-влак каласеныт: «Господь чынжымак ылыж кынелын да Симонлан кончен».

³⁵ А Клеопа ден йолташыже корнышто мо лийме да киндым тодылмыж годым кузе Иисусым палымышт нерген каласкаленыт.

³⁶ Нунын каласкалымышт годымак Иисус Шкежак коклаштышт шоген да ойлен: «Тыныслык лийже тыланда!»

³⁷ Нуно, чот ӧрын да лӱдын, шӱлышым ужына, шоненыт.

³⁸ Иисус нунын деч йодын: «Молан те тыге ӧрыда? Молан тендан шӱмыштыда кокыте шонымаш шочеш?

³⁹ Мыйын кидем да йолем ончалза – тиде Мый Шке улам. Мыйым тӱкалтыза да ончалза. Шӱлышын капшат, лужат уке, а Мыйын, шкеат ужыда, уло».

⁴⁰ Тыге ойлышыла, нунылан кидше ден йолжым ончыктен.

⁴¹ Нуно куанымышт да ӧрмышт дене эше ӱшанен огытылат, Иисус йодын: «Тендан иктаж-могай кочкышда тыште уло?»

⁴² Нуно кӱэштме кол ужашым да карашан мӱйым пуэныт.

⁴³ Иисус налын да ончылныштак кочкын.

⁴⁴ Вара каласен: «Эше тендан дене пырля улмем годым тидын нергенак ойленам: Мыйын нерген Моисейын законыштыжо, пророк-влакын книгаштышт да Псаломлаште возымо чылажат шукталтшаш».

⁴⁵ Возымашым умылен кертышт манын, вара ушыштым почын.

⁴⁶ Иисус каласен: «Тыге возымо: Христос орланышаш да кумшо кечын колымаш гыч ылыж кынелшаш улмаш.

⁴⁷ Иерусалим гыч тӱҥалын, уло калык-влаклан Тудын лӱм дене язык деч кораҥме да языкым касарыме нерген увертараш кӱлеш.

⁴⁸ Те тидлан таныклыше улыда.

⁴⁹ А Ачам мом сӧрен, Мый тыланда тудым колтем. Кӱшыч волышо куат тендам вӱдылмешке, Иерусалим олашак кодса».

⁵⁰ Иисус тунемшыж-влакым ола гыч Вифаний марте луктын, тушто Тудо кидшым нӧлталын да нуным благословитлен.

⁵¹ Тыгерак лийын: благословитлымыж годымак Иисус нунын деч торлен да пылпомышко нӧлталтын.

⁵² Нуно Тудлан, сукен, вуйым савеныт. Вара Иерусалимыш чот куанен пӧртылыныт

⁵³ да эре храмыште лийыныт, Юмым чапландареныт да моктеныт. Аминь.