СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 8 - У Сугынь

8 ГЛАВА 1-13 У сугыньын Архиерейже.

¹ Мемнан ойлымаштына тӱҥжӧ тиде: пылпомышто Чаплылыкын престолжын пурла могырышкыжо шичше Архиерейна уло.

² Тудо святой верыште, чын скинийыште, служитла. Тиде скинийым айдеме огыл, а Господь шогалтен.

³ Кеч-могай архиерей пӧлекым да надырым пуаш шогалтыме лиеш, сандене мемнан Архиерейынат надырлан мом кондышашыже лийшаш.

⁴ Тудо мланде ӱмбалне лиеш ыле гын, иерейжат ок лий ыле, вет пӧлекым закон почеш кондышо иерей-влак Тудын деч поснат улыт.

⁵ Но нунын служитлымышт пылпомышсын сынже да ӱмылжӧ веле. Скинийым чоҥаш тӱҥалмыж годым Моисейлан каласыме улмаш: «Ончо, чылажымат курыкышто тыланет ончыктымо гайымак ыште».

⁶ Мемнан Архиерейна – сайрак сӧрымашеш негызлалтше, шуко пачаш сайрак сугыньын ходатайже, тидын дене келшышын, Тудын налме служитлыме пашажат утларак чапле.

⁷ Икымше сугынь ситыдымаш деч посна лиеш ыле гын, тугеже вес сугыньым кычалаш кӱлешыже уке ыле.

⁸ Но Юмо шке калыкшым шылтален ойла: «Теве кече-влак толыт, каласа Господь, Израиль тукым да Иуда тукым дене у сугыньым ыштем,

⁹ тугай сугыньым огыл, могайым Мый ачашт дене нуным Египет мланде гыч лукташ кидыштым кучымем ыштенам. Вет нуно Мыйын тудо сугынем шуктен огытыл, сандене нунын деч кораҥынам, ойла Господь.

¹⁰ Теве нине кече-влак деч вара Израиль тукым дене ыштышаш сугынем, ойла Господь: Шкемын законем нунын ушышкышт пыштем да тудым шӱмешышт возем, Мый нунын Юмышт лиям, а нуно Мыйын калыкем лийыт.

¹¹ Тунам шке лишылжым да иза-шольыжым, ”Господьым пале” манын, нигӧ ок туныкто, вет изижат-кугужат чылан Мыйым палаш тӱҥалыт.

¹² Мый нунын чын огылыштым кудалтем, языкыштым да закондымылыкыштым ынде ом шарналте».

¹³ У сугынь нерген ойлымыж годым Юмо икымше сугыньын тоштеммыжым ончыктен, а тоштемше да шӱкшемше – пытымаш деке лишыл.