Ап.паш 25 - У Сугынь

25 ГЛАВА 1-12 Павел кесарь ончылан судитлымым йодеш. 13-27 Павел – Агриппа кугыжа ончылно.

¹ Вуйлатыме кундемышкыже толмеке, Фест кум кече гыч Кесарий гыч Иерусалимыш каен.

^2-3 Тунам архиерей-влак да иудей кокла гыч кугурак еҥ-влак тудлан Павел ӱмбак вуйым шийыныт, Павелым Иерусалимыш пӧртылтымӧ дене мыланна поро кумылетым ончыкто манын, сӧрвален йодыныт. Вет нуно Павелым шолып ваҥынешт да корнышто пуштнешт улмаш.

⁴ Павелым Кесарийыште оролымаште кучат, шкежат вашке тушко каем, манын Фест.

⁵ «Тыгеже, – каласен тудо, – тендан вуйлатыше-влак кокла гыч икмыняр еҥ тек мыйын пеленем кая да, тиде еҥын иктаж-могай титакше уло гын, тек тудым титакла.»

⁶ Иерусалимыште кандаш але лу кече деч шуко огыл лиймеке, Фест Кесарийыш пӧртылын, а вес кечынже судитлыме верыш шинчын да Павелым кондаш кӱштен.

⁷ Павел толмеке, Иерусалим гыч толшо иудей-влак тудын йыр погынен шогалыныт, шуко неле титаклымашым ӱмбакше конденыт, но титаклымышт чын манын, ончыктен кертын огытыл.

⁸ Павел шкенжым арален ойлен: «Мый иудей закон ваштарешат, храм ваштарешат, кесарь ваштарешат нимогай титакым ыштен омыл».

⁹ Фест, иудей-влаклан йӧраш шонен, Павеллан вашештен: «Иерусалимыш кайынет? Тыйым титаклымым тушто мыйын вуйлатыме почеш ончена ыле».

¹⁰ Но Павел каласен: «Мый кесарьын судшо ончылно шогем, тудын ончылнак судитлалтшаш улам. Мый иудей-влак ваштареш нимогай титакым ыштен омыл, тидым тыят сайын палет.

¹¹ Мый титакан улам да титакемже мыйым пуштмым чыныш лукшо гын, колымаш деч кораҥаш ом тӧчӧ, а мыйын ваштареш титаклымышт чын огыл гын, нигӧ мыйым нунын кидыш пуэн ок керт. Кесарь ончылно судитлалташ йодам».

¹² Вара Фест каҥашым пуышыж-влак дене мутланен да вашештен: «Тый кесарьын судшым йодынат, кесарь декак кает».

¹³ Икмыняр кече эртымеке, Кесарийыш Фестым саламлаш Агриппа кугыжа ден Вереника толыныт.

¹⁴ Нунын тушто шуко кечым эртарымекышт, Павел нерген пашам кугыжалан Фест тыге умылтарен: «Тыште казаматеш Феликсын кодымо еҥ уло.

¹⁵ Иерусалимыште лиймем годым иудей архиерей ден калык кугурак-влак тудын ӱмбаке вуйым шияш толыныт да титаканыш лукташ йодыныт.

¹⁶ Титаклыше-влакым шинчаваш ужаш да титаклыме ваштареш шкенжым арален ойлаш эрыкым пуыде, кеч-могай еҥымат пушташ рим йӱла почеш огыт пу манын, мый нунылан вашештенам.

¹⁷ Тыгеракын, нунын тышке толмекышт, вес кечынак, шуйкалыде, судитлыме верыш шинчынам да тиде еҥым ончыкем кондаш кӱштенам.

¹⁸ Титаклыше-влак тудым авырен шогалыныт, но мыйын вучымем гай ик титаклымашымат конден огытыл.

¹⁹ Нуно шке ӱшанымашышт да колышо ала-могай Иисус нерген ӱчашеныт. Тудын нерген Павел, ила манын, пеҥгыдын ойлен.

²⁰ Тыгай ӱчашымаште кузе лияш, пален омыл, сандене мый йодынам: ”Иерусалимыш каен, тушто суд ончылан шогалнет мо?”

²¹ Но Август пунчалым лукмо марте Павел шкенжым оролымаште кодаш йодын, сандене, кесарь деке колтымешке, мый тудым оролымаште кучаш кӱштенам».

²² А Агриппа Фестлан каласен: «Тиде еҥым мыят колыштнем ыле». Тудыжо эрлак колышт кертат манын вашештен.

²³ Вес кечын Агриппа ден Вереника кугу пайремыш толмо гай толыныт, сарзе вуйлатыше да оласе эн пагалыме еҥ-влак дене пырля суд погынымо пӧлемыш пуреныт, да Фест кӱштымеке, Павелым конденыт.

²⁴ Вара Фест каласен: «Агриппа кугыжа да мемнан дене пырля тиде пӧлемыш чыла погынышо-влак! Теве тиде еҥлан кӧра иудей-влак Иерусалимыштат, тыштат мылам вуйым шийыныт да тудо илышаш огыл манын кычкыреныт.

²⁵ Но тудо пуштмым чыныш лукшым нимомат ыштен огыл манын, мый ужынам, а Август ончылно судитлалташ тудо шкеак йодын, сандене мый тудым тушко колташ шонен пыштенам.

²⁶ Но кесарьлан возаш мыйын нимо раш уке. Сандене, тиде йодыштмо деч вара мыйын мом возаш лийже манын, тудым тендан ончыко, поснак тыйын ончыко, Агриппа кугыжа, конденам.

²⁷ Мыйын шонымаште, кучен петырыме еҥым мо шотышто титаклымым ончыктыде, тудым кесарь деке колташ шот огыл».