Ап.паш 18 - У Сугынь

18 ГЛАВА 1-17 Павел Коринфыште. 18-23 Павелын Антиохийыш пӧртылмыжӧ. 24-28 Ефесыште Аполлос туныктен каласкала.

¹ Тылеч вара Павел, Афиным коден, Коринфыш каен.

² Тушто тудо Понтеш шочшо Акила лӱман иудейым да тудын Прискилла ватыжым вашлийын. Чыла иудейлан Клавдий Римым коден каяш кӱштен, садлан нуно шукерте огыл Италий гыч толыныт улмаш. Павел нунын деке миен.

³ Тудо нунын гаяк сомылым ыштенат, пырля пашам ышташ кодын. Нунышт вынер омашым ыштыше лийыныт.

⁴ Шуматкече еда, синагогышто мутланен, иудей-влакымат, эллин-влакымат ӱшандараш тыршен.

⁵ А Сила ден Тимофейын Македоний гыч толмекышт, Иисусын Христос улмыж нерген иудей-влаклан таныклаш Павелым Шӱлыш кумылаҥден.

⁶ Но иудей-влак торешланеныт да мыскыленыт, сандене Павел вургемжым почкалтен да нунылан каласен: «Тендан вӱрда шкендан вуйда ӱмбалне, тыште мыйын титакем уке, ынде чын Юмым палыдыме-влак деке каем».

⁷ Тушеч каен да Израильын Юмыжлан кумалше Иуст лӱман еҥ деке миен. Тудыжын пӧртшӧ синагог воктене лийын.

⁸ А синагог вуйлатыше Крисп чыла мӧҥгысыжге Господьлан ӱшанаш тӱҥалын. Коринфыште илыше кокла гыч Павелым колыштшо-влак шукышт ӱшаненыт да тынеш пуреныт.

⁹ Йӱдым кончымаште Павеллан Господь каласен: «Ит лӱд, ойло, шып ит лий.

¹⁰ Мый тый денет пырля улам. Тыланет осалым нигӧ ок ыште: тиде олаште Мыйын еҥем шуко уло».

¹¹ Юмын шомаклан туныктен, Павел тушто ик ий да куд тылзе илен.

¹² Ахаийыште Галлионын проконсул улмыж годым иудей-влак Павел ваштареш икоян шогалыныт, тудым судитлыме верыш конденыт

¹³ да ойленыт: «Тиде еҥ Юмылан закон почеш огыл кумалаш тарата».

¹⁴ А кунам Павел ойлаш тӱҥалнеже улмаш, иудей-влаклан Галлион манын: «Иудей-влак, иктаж-могай титак але осал паша гын, тендам колышташ амал лиеш ыле,

¹⁵ но кунам туныктымо, лӱм-влак да тендан законда нерген ӱчашымаш кая, шке ончыза, мый тыгайым ынем судитле».

¹⁶ Вара нуным судитлыме вер гыч поктен колтен.

¹⁷ Тунам эллин-влак чылан синагог вуйлатыше Сосфеным руалтен кученыт да судитлыме вер ончылан кыреныт, но Галлионым тиде тургыжландарен огыл.

¹⁸ Эше икмыняр жапым эртарымеке, Павел иза-шольо-влак дене чеверласен да, корабльыш шинчын, Сирийыш каен, тудын дене пырля Прискилла ден Акила лийыныт. Павел Юмылан мутым пуэн улмаш, сандене тудо Кенхрейыште ӱпшым тӱредыктен.

¹⁹ Ефесыш шумеке, тушан Прискилла ден Акилам коден, шкеже синагогыш пурен да иудей-влак дене мутланен.

²⁰ Кунам тудым тыште кужунрак лияш йодыныт, Павел келшен огыл,

²¹ а нунын дене чеверласен да каласен: «Лишемше пайремым мылам Иерусалимыште эртараш кӱлешак, а тендан деке Юмо пӧртылтынеже гын, пӧртылам». Тыге Ефес гыч каен. [Акила ден Прискилла Ефесеш кодыныт.]

²² Кесарийыш мийымеке, тудо Иерусалимыш миен, черкым саламлен да Антиохийыш каен.

²³ Тушто икмыняр жапым эртарымеке, лектын да радам дене Галатий кундем ден Фригийым эртен, чыла тунемшын чонжым пеҥгыдемден.

²⁴ Александриеш шочшо Аполлос лӱман ик иудей Ефесыш толын. Тудо ойлаш пешак уста лийын да Возымашым сайын пален.

²⁵ Аполлос Господьын корныжлан туныктымо лийын, чон йӱлен ойлен, Господь нерген сайын туныктен, но Иоаннын тынеш пуртымыжым веле пален.

²⁶ Аполлос синагогышто лӱдде ойлаш тӱҥалын. Акила ден Прискилла, тудым колыштмеке, шке декышт налыныт да Господьын корныж нерген эшеат сайын умылтареныт.

²⁷ А кунам Аполлос Ахаийыш каяш шонен пыштен, порын вашлияш кумылаҥдаш манын, иза-шольо-влак тусо тунемше-влаклан серышым возеныт. Тушко мийымекыже, Юмын порылыкшылан кӧра ӱшанаш тӱҥалше-влаклан Аполлос кугу пайдам конден.

²⁸ Тудо иудей-влакын ӱшандарымыштым калык ончылно пеш талын шӧрен ойлен, Иисусын Христос улмыжым, Возымаш гыч шомакым кучылтын, чыныш луктын ончыктен.