Ап.паш 12 - У Сугынь

12 ГЛАВА 1-5 Иаковым пуштмаш да Петрым кучыктымаш. 6-19 Казамат гыч Петрын утлымыжо. 20-25 Иродын колымыжо.

¹ Тудо жапыште Ирод кугыжа черкыш коштшо-влак кокла гыч икмынярышт ӱмбаке, осалым ышташ манын, кидым нӧлталын.

² Тудо Иоаннын Иаков изажым керде дене пуштыктен.

³ Тыге ыштымаш иудей-влаклан келшымым ужынат, вара Петрымат кучыктен, тидыже Шергинде пайрем годым лийын.

⁴ Кучымеке, тудым казаматыш шынден да ныл еҥан ныл сарзе тӱшкалан оролаш коден. Кугече деч вара Петрым Ирод калык ончык лукнеже улмаш.

⁵ Тыгеракын, Петрым казаматыште ороленыт, а тиде жапыште черке тудын верч Юмылан чарныде кумалын.

⁶ Петрым Ирод калык ончыко лукнеже улмаш. Тылеч ончычсо йӱдым кок шинчыр дене шинчырлыме Петр кок сарзе коклаште мален. Орол-влак казамат омса воктенат ороленыт.

⁷ Кенета Господьын Суксыжо лектын шогалын да пӧлем волгалт каен, Петрым Суксо ӧрдыжшӧ гыч тӱкалтен помыжалтарен да каласен: «Кынел вашкерак». Петрын кидше гыч шинчыр мучыштен.

⁸ Суксо тудлан ойлен: «Ӱштал, йолышкет йолчиемым чие». Петр тыгак ыштен. Вара Суксо каласен: «Ӱмбал вургеметым чий да почешем мий».

⁹ Петр лектын да почешыже каен, Суксын ыштымыже чын улмо нерген пален огыл, а шинчажлан конча шонен.

¹⁰ Нуно орол-влакым ик вере эртеныт, вара вес вере, олаш лекме кӱртньӧ капка деке миен шуыныт, тудыжо нунылан шкеак почылтын. Нуно лектыныт, ик изуремым эртымеке, Суксо кенета тудым коден каен.

¹¹ Тунам Петрын шонымыжо рашемынат, каласен: «Ынде мый чынжымак палем: Господь Суксыжым колтен, мыйым Иродын кидше деч да иудей калыкын мый денем мо лийшашым вучымыж деч утарен».

¹² Тидым умылымеке, Мариян, Марк манме Иоаннын аважын, пӧртшӧ деке толын, тушко кумалаш шукын погыненыт улмаш.

¹³ А кунам Петр капкам тӱкалтен, Рода лӱман тарзе ӱдыр ончалаш лектын.

¹⁴ Петрын йӱкшым паленат, куанымыж дене капкам почын огыл, а куржын пурен да Петр капка воктене шога манын увертарен.

¹⁵ А погынышо-влак тудлан каласеныт: «Тый ушым йомдаренат мо?» Но ӱдыр чакнен огыл, а нунышт вашештеныт: «Тиде тудын Суксыжо».

¹⁶ Петр капкам тӱкалымым чарнен огыл, а почмекышт, тудым ужын, чот ӧрыныт.

¹⁷ Шыпланышт манын, Петр кидшым нӧлталын да Господь тудым казамат гыч кузе лукмо нерген нунылан каласкален, вара манын: «Тидын нерген Иаковлан да иза-шольо-влаклан увертарыза». Петр тушеч лектын да вес верыш каен.

¹⁸ Петр дене мо лиймым пален огытылат, эрдене сарзе-влак чот тургыжланаш тӱҥалыныт.

¹⁹ А Ирод Петрым кычалыктен, тудым муын огытылат, орол-влак деч йодыштын, нуным пушташ кӱштен, а шкеже Иудей гыч Кесарийыш каен да тушто икмыняр жапым эртарен.

²⁰ Тир ден Сидонышто илыше-влаклан Ирод шыдешкыше лийын, а нунышт тудын деке икоян толыныт, полатысе тӧрам, Властым, шке могырышкышт савыреныт да тыныслыкым йодыныт. Нуно Иродын вуйлатыме кундемже гыч кочкышым налыныт.

²¹ Палемдыме кечын Ирод, кугыжан вургемым чиен, судитлыме верыш шинчын да нунылан ойлаш тӱҥалын,

²² а калык кычкырен: «Тиде Юмын йӱкшӧ, а айдемын огыл!»

²³ Ирод Юмын чапшым нӧлтен огыл, сандене Господьын Суксыжо тудым тунамак перен, Иродым шукш-влак кочкыныт, тудо колен.

²⁴ А Юмын шомакше вияҥын да шарлен.

²⁵ Варнава ден Савл, полышым пуымо пашам шуктымекышт, пеленышт Марк манме Иоанным налыныт да Иерусалим гыч Антиохийыш пӧртылыныт.