2 Ин 1 - У Сугынь

1 ГЛАВА 1-3 Саламлымаш. 4-11 Чын да йӧратымаш. 12-13 Чеверласымаш.

^1-2 Старец деч – Юмын ойырен налме госпожалан да тудын икшывыж-влаклан. Мемнан дене ушнен шогышо, мемнан дене курымеш лийшаш чынлан кӧра мый тендам чын дене йӧратем, да мый веле огыл, а чыным пален налше-влак чылан йӧратат.

³ Тек Юмо Ача да Ачан Эргыже Господь Иисус Христос деч порылык, чаманымаш да тыныслык тендан пелен чын да йӧратымаш дене лиеш.

⁴ Ачан мыланна кӱштымыж дене чын почеш илыше-влакым тыйын икшывет-влак коклаште ужмемлан пешак куанышым.

⁵ А ынде тыйым, госпожа, йодам: икте-весынам йӧратышаш улына; мыйын возымо тиде кӱштымашем у огыл, тудым мыланна тӱҥалтыштак пуымо,

⁶ а йӧратымашыже Юмын кӱштымашыж почеш ыштымаш лиеш. Тидыже – тӱҥалтыш гычак колмо кӱштымашда, те тудын почеш илышаш улыда.

⁷ Тӱняшке ондалыше шуко лектын. Нуно Иисус Христосын тӱняшке толмыжым да кап дене илымыжым шӧрен ойлат. Тыгай еҥ-влак ондалыше да антихрист улыт.

⁸ Шкендам шекланыза, мемнан паша лектышнам йомдарышаш огынал, тек мыланна тичмаш суап лиеш.

⁹ Кӧ Христосын туныктымыжым ок кучо да тудын деч ӧрдыжкӧ кораҥеш, тыгайын Юмыжо уке. А кӧ тиде туныктымашым куча, тудын Ачат, Эргат уло.

¹⁰ Кӧ тендан деке толеш да тиде туныктымашым ок кондо гын, тудым пӧртышкыда ида пурто, тудым ида саламле.

¹¹ Вет тудым саламлыше осал пашашкыже ушна.

¹² Тыланда шуко возышашем уло, но мый тидлан кагаз ден чиям ынем кучылт, а тендан куанда тичмаш лийже манын, тендан деке мийынем да ваш шинчын мутланынем.

¹³ Юмын ойырен налме акатын икшывыж-влак тыланет саламым колтат. Аминь.