СВЯТОЙ АПОСТОЛ ПАВЕЛӸН ТИТЛӒН КОЛТЫМЫ СИРМӒШӸЖӸ 3 - У Согонь

3 ГЛАВА 1 Пурым ӹштӹ. 12 Кӓнгӓшӹм пумаш дӓ шӓлӓм келесӹмӓш.

¹ Вуйлатышывлӓн дӓ тӧрӓвлӓн шамакыштым колыштышты, ӹнжӹштӹ торешлӓнеп, керек-махань пуры пӓшӓмӓт ӹштӓш со йӓмдӹ лиштӹ манын, ӹнянӹшӹвлӓлӓн ӓшӹндӓрӹктӹ.

² Иктӹн гишӓнӓт худам ӹнжӹштӹ попеп, ӹнжӹштӹ соредӓлеп, йӹвӹжӓ, цилӓ доно пуры кымылан лиштӹ.

³ Андак мӓӓт шанен мыштыдымы, шамак колыштдымы, ямшы, сулыкан кымылын дӓ кыце-шон мындырланымын цорашты ылынна, худам ӹштен дӓ завидуен ӹленнӓ, йӹрнӹк дӓ икӹжӓк-иктӹнӓм ужын керддӹмӹ ылынна.

⁴ А кынам мӓмнӓм Ытарышы Йымын пурыжы дӓ эдемӹм яратымыжы пачылтын,

⁵ мӓмнӓн ӹштӹмӹ тӧр пӓшӓнӓ гишӓн агыл, а угӹц шачыктышы мышмаш дӓ Святой Шӱлӹш доно уэмдӹмӓш гач Тӹдӹ ӹшке пурыжы доно мӓмнӓм ытарен.

⁶ Иисус Христос Ытарышына гач Святой Шӱлӹшӹм вӹкӹнӓ Йымы кукырланыде опталын.

⁷ Тенге мӓ, Тӹдӹн благодатьшы доно тӧрӹш лыкмывлӓ, ӹнянен вычымы курымаш ӹлӹмӓшӹм нӓлӹн кердӹнӓ.

⁸ Ти шамак тӧр. Тӹлӓт теве мам ӹштӓш шӱдӹнем: тидӹм ӹняндӓрен пингӹдемдӹ. Йымылан ӹнянӓш тӹнгӓлшӹвлӓ пуры пӓшӓм соок ӹштӹштӹ. Тидӹжӹ эдемвлӓлӓн яжо дӓ керӓл ылеш.

⁹ Но шотдымы кӹрмӓшӹмӓш, роды-шачышым пыргедмӓш, соредӓлмӓш дӓ закон гишӓн икӓнӓ-иктӹ ваштареш шалгымаш гӹц каранг, тидӹ нимахань пайдам ак пу, керӓлжӓт уке.

¹⁰ Ик гӓнӓ дӓ вес гӓнӓ шижтӓрӹмӹкет, лоштыда пайылалтмашым ӹштӹшӹ эдем дорц каранг.

¹¹ Тӹнь пӓлет: техень эдем локтылалтын, тӹдӹ сулыкым ӹштӓ, ӹшке вӹкӹжӹ суйымашым канда.

¹² Кынам тӹнь докет Артемам ӓль Тихикӹм колтем, мӹнь докем Никопольыш йӹлерӓк тол, тӹштӹ мӹнь телӹм эртӓрӓш шанем.

¹³ Законым тымдышы Зинам дӓ Аполлосым корныш яжон йӓмдӹлӹ, нӹнӹлӓн ма келеш, цилӓ лижӹ.

¹⁴ Мӓмнӓнвлӓӓт, кӹцкӹдӹмӹ лиӓш агыл манын, палшык келмӹ годым пуры пӓшӓм пиш цацен ӹштӓш тыменьӹштӹ.

¹⁵ Мӹнь сагаэм ылшывлӓ цилӓн тӹлӓт шӓлӓм колтат. Мӓмнӓм ӹнянӹмӓшӹштӹ яратышывлӓлӓн шӓлӓм келесӹ. Цилӓдӓ доны благодать лижӹ. Аминь.